鬼強
有線電視《怪談》主持

潘紹聰
香港人網節目《恐佈在線》主持

今日好玩嘢

怪談咁鬼熱靈探本地遊

2013年03月06日 ~~ 第302期 Face

洛杉磯 Cecil酒店發生嘅加拿大華人藍可兒離奇命案，疑點重重，酒店更愈揭愈多恐怖背景，頓成全球知名靈探熱點，引來鬼話連篇。
其實，香港都有唔少靈探團到本港傳聞中嘅猛鬼之地一探虛實，今期就由鬼王潘紹聰、怪談主持鬼強帶路，嚟一次鬼咁地道灣仔靈探遊。

互動片段

鬼王聰講鬼

iPhone測靈　闖灣仔鬼屋

今次我哋去嘅係灣仔船街有名鬧鬼熱點紅屋南固臺同附近荒廢 10多年嘅聖路琦中學， Edmond分享咗部分靈探用器材，其中最有趣莫過於 iPhone磁場 app「 Paranormal State」。 Edmond試過帶住佢靈探，又真係喺師傅話有嘢時響，覺得佢有料到。
我哋就帶住佢同夜視 cam周圍拍，未入到屋， Edmond喺南固臺附近一棵大樹下忽然停低，佢話：曾經有個男人喺呢度吊頸身亡，仲叫記者用「 Paranormal State」 app睇吓磁場計，數值果然升到好高，事後睇番仲係成個靈探之旅期間嘅最高數值！記者返到屋企，上網查番原來真有其事，仲係上年至發生嘅事，咪話唔驚！

Edmond話靈探用 cam拍片一定要開夜視模式，兩位靈探多年，喺香港拍到靈異跡象只有 Edmond喺某殮房試過一次，話影到有團白影衝埋嚟，今次我哋就影唔到嘢喇。

現場有幾邪？
南固臺於 1918年落成，有傳為日治時期慰安婦囚禁之地， 03年就有港聞報道幾名年輕人夜探紅屋撞鬼，一名少女變男聲兼力大無窮，要出動 4位警員先制服到！

灣仔有間鬼酒店

入到戲肉，唔知記者我係好彩定唔好彩，大屋上晒鎖根本入唔到去，最終當晚喺紅屋乜都拍唔到，潘紹聰見我唔係好驚，行行吓開始講本地酒店鬼故我聽。「地點係灣仔一間酒店，有晚深夜櫃枱職員就見到個外籍女人走埋嚟，同佢講喺自己間房唔見咗部 Palm。喺房唔見嘢咁大件事就 call晒保安去查，一查就發覺間房根本冇人住，睇番閉路電視，個櫃枱職員由頭到尾都同空氣講嘢，個外籍女子根本唔存在！」我就帶住少少緊張嘅心情，跟兩大鬼王去下一個 location聖路琦中學，再鬼過！

Edmond話曾有男子於南固臺附近大樹吊頸身亡，查番新聞，其實係上年嘅事，行過呢棵樹時 Paranormal State嘅磁場計成個靈探之旅升得最勁，咪話唔驚。

靈探四法寶

熱感靈探機
內置 EMP同溫度計，除咗磁場變強，傳聞靈體出現亦會令溫度驟降。

舊式錄音機
潘紹聰同鬼強都話愈新嘅電子器材靈探時愈易出故障，所以會帶舊式錄音機收怪聲。

夜視 cam
據聞靈異現像要用夜視模式才能捕捉，加上夜探靈探場地多數都天昏地暗，冇佢乜都睇唔到。

搵鬼訊 app
據聞有鬼喺附近磁場會變強，手機 app「 Paranormal State」原理就係將 iPhone當作磁場探測器 EMP，探測附近嘅磁場力量。

潘紹聰：兇案酒店有邪教背景！

近期最詭異事件，始終都係藍可兒命案，件事愈講愈奇怪，最怪高登有巴打根據外國 forum資料，指出兇手可能係樂隊《 Dynasty of Darkness》主唱 Morbid，此子信奉撒旦教仲話自己殺過人又住過 Cecil酒店。潘紹聰（ Edmond）就話間酒店確有邪教背景，「未知係咪同藍可兒（的死亡）有關，有加拿大線人報料，指間酒店同當地好有勢力嘅宗教團體有關。亦有人話藍可兒屍體喺水箱嘅姿勢同邪教倒十字相似。」
至於司徒法正師傅睇完電梯短片就話見到有靈體喺𨋢入面：「初初入𨋢個女仔好正常，可能遇到邪靈令佢行為變異，佢手語嘅意思可能係讓個靈體入𨋢，我要再研究吓先。」

名人分析藍可兒事件

Morbid被外國網友爆料，曾於 YouTube網站暗示自己殺咗人。香港網友即刻轉載分析，連台灣新聞報道都讚香港網友係鍵盤柯南。（圖片轉載自高登討論區）

靈探奇緣　高人分享有料廢校照

再行到去南固臺對面嘅聖路琦中學，可能因為呢度鬼名遠播，同時已被市建局計劃活化，當晚帶咗兩位專家喺門外考察，發現已經重門深鎖，本以為無功而回。人哋成日話同靈界接觸講緣分，呢個時候我哋 3個竟然遇到位不願上鏡嘅外籍高人，佢對我哋嘅靈探行動好有興趣，原來佢都曾經從後山潛入學校內部，仲同我哋分享咗幾張疑似拍到靈體嘅學校相片，記者睇睇吓又真係好似見到個鬼面具喎！不過喺度提提大家，擅闖私人地方業主有權民事追究，擅闖政府地方最高可處罰$500或監禁 3個月，要自己衡量法律責任。

現場有幾邪？
聖路琦中學對正南固臺，有傳當年學校要到天台上體育堂，後來校方喺冇交代原因下突然禁止師生再到天台，從此傳來鬧鬼之說，傳說廢校 10多年𠵱家都仲聽到打波聲。

聖路琦中學傳說中有個猛鬼地下室，不過高人去唔到最下層，只能夠從天井影落去。

班房照，高人覺得黑板上有人臉，不過最離奇都係窗口爛晒，入到去居然覺得空氣唔流動，仲有種壓力添。

奴 COMMENT

雲海好猛
最猛一次係同雲海做節目去長洲，成班工作人員試部測磁場機，指住雲海時指數即刻暴升，我哋不嬲覺得雲海鬼鬼哋，啲機係有料到呀！至於靈探，我絕不鼓勵人探訪兇案現場，如果真係好有興趣研究嘅，都係日頭去好喇，夜晚太危險，跌親都好大件事，係有鬼嘅日頭都有喇！

細數猛鬼之地

靈異之地豈止灣仔，潘紹聰同鬼強兩人主持靈異節目多年，去靈探多過我哋行山，仲同我哋 share咗幾個香港猛鬼之地。

域多利拘留所
俗稱白屋，傳聞係港英政府監禁政治犯之地， Edmond透過特別途徑入過去，係其中一個感覺強烈嘅靈探場所。

摩星嶺炮台
摩星嶺炮台為日戰時期軍事要地，唔少人上去打 War Game，但盛傳兩幫人開戰時往往會多出不應存在嘅第三軍。

黃竹洋村
有傳村民一日之間全部搬走，但 Edmond考察過係假嘅，到今時今日仍然有人返去祭祖。

元朗達德學校
盛傳日本佔領期間曾於此屠殺大量反抗村民， 2011年一班初中靈探團到訪， 3名少女相繼暈倒同情緒失控咬人。

司徒法正教路　靈體接觸似古惑仔撩女

司徒法正　玄學大師

上一上 facebook search，發覺唔少年輕人自發組團搞靈探。 Edmond老實同大家講，靈探係危險嘅，但佢覺得人對未知事物總係充滿好奇，唔會反對年輕人靈探。但大前提係一定要有資深師傅在場。「冇經驗嘅人絕對唔鼓勵，最好參加一啲有經驗嘅靈探團，我自己都會定期組靈探團，可以 email聯絡我參加。」（ mailto:edmondpoon0202@yahoo.com.hk）

早前《蘋果日報》都有報道大學生搞靈探，仲帶晒溪錢招魂， Edmond就唔係咁讚成，話一定要有師傅陪同。

咁如果真係唔好彩懷疑自己撞到嘢點樣自救？司徒法正師傅就用古惑仔撩女仔去做比喻，同靈體接觸最忌挑釁！「靈界有自己規律，唔係有好大怨氣或者因果，係唔會無端端攻擊人，好多時只係好奇、玩吓你，好似古惑仔撩女仔咁。如果你口多駁嘴，咁就會招惹到佢哋進一步行動，最忌就係講一啲唔驚佢、唔信佢、挑釁性嘅說話。最好都係扮見唔到走開就冇手尾。」對於一般人去靈探，師傅認為靈界好多幻像，唔建議亂試。「以前都會帶人遊地獄，但見到有啲人好似吸毒咁沉迷落去，已唔再做，只在拍攝節目時先會搞靈探。」

咪自己去！鬼強親述撞鬼體驗

上年喺曹公潭溪澗靈探時試過反白眼入院休克送院嘅鬼強，話靈異接觸好少親眼睇到，主要透過感覺同觸覺去察知。「啱啱開始靈探時，我其實唔係太信，但每次師傅話有嘢時都會有頭痛同想嘔嘅感覺，慢慢我就開始覺得呢啲 signal係代表有靈界事物喺附近。再進一步係會覺得有人摸你，最誇張有一次係真係有個手掌印喺腳上面，見到嘅反而唔多。」經此一役，佢覺得身體狀況至緊要。「學法啲人講精氣神，瞓唔夠去到啲陰森地方，壓力一大冇鬼都會暈。去靈探其實有如行山，要做好安全準備，帶齊電筒同水緊要過你帶護身符。」

司徒師傅話七、八年前去高街拍節目，攝影器材明明 check過晒充好電，一入到去啲裝備全部死晒，用手機又影到黑色人影，仲聽到有人打麻雀。

上年鬼強喺曹公潭出事佢話自己因素較大，因為有親人喺曹公潭過世，所以當時壓力好大。

後記

聖路琦中學後山圖片，由窗戶到山邊其實有條２米闊空隙，要跳落僅有一個人闊嘅石屎支柱，再爬窗而入，失足嘅話離地 4米高，唔死都斷骨，分分鐘自己成為下一單鬼故事嘅主仁翁。

高危活動風險自負
親身經歷靈探一夜，如 Edmond所言，人嘅好奇心唔易抑制，成晚心思思想撞鬼勁刺激。不過諗番起冇撞鬼都危機處處，到後山視察潛入廢校路線，一個唔好彩叉錯腳碌落山，未見鬼先枉死。再加上聽返嚟嘅撞邪故事，令我諗起熱氣球慘劇，未出事前旅遊熱點人人想玩，但有起事上嚟可以好嚴重，打算去靈探嘅人唔好單被其刺激吸引，忘記潛在嘅危機評估。