呢鑊我同你攬炒！
呢一場， Kratos真係好似《魔戒》入面甘道夫同怪物一齊跳橋咁樣，一邊跌一邊打。

漫遊毒物

God of War: Ascension光頭神降臨

2013年03月06日 ~~ 第302期 Face

戰神、戰神、又係戰神，由第一集殺神報家仇，殺到眾神之神宙斯都死埋，點解光頭佬 Kratos仲係怒火不斷？鬼咩，你睇由第一集董伯伯時代民不聊生，到第二集煲呔時代樓價飛升，到今集群狼亂舞大家仍然係買唔起樓， Sony廠都明知大家一股怒氣無處發洩，光頭佬惟有再出山俾各位劈劈斬斬出啖氣，而且今集仲可以上網圍揪，唔夠薑去佔領中環，都可以集結圍體力量一齊降火。

機種： PS3
廠商： SCE
類型： ACT
人數：１人（連線 8人）
售價：$398（ 3月 12日發售）

人火爆景靚爆

《 GOW3》已定位為系列一個完結，今集故事同上次 PSP《 GOW:Ghost of Sparta》一樣屬前傳性質，而且時間更係第一集之前，敘述傳奇斯巴達戰士 Kratos慘遭戰神阿瑞司設計，親手殺死摯愛妻子同囡囡。遊戲開始時 Kratos已被復仇三姐妹判處瘋狂罪孽，囚禁在為泰坦監牢之中，不過偉大嘅火爆光頭佬又點會乖乖坐監，一開 game已經玩《 Prison Break》，展開一段殺神旅程。
今集玩法上基本不變，但畫面雕琢得更靚，仲隨住遊戲路線不停變化，無論嘍囉戰及 boss戰都經常同背景連環互動，完全將 PS3機能扭乾扭淨。記者仲覺得啲場景有少少「奧斯卡 feel」，跟好多電影非常相似，加上超震撼管弦配樂，令人打到手心冒汗。不過都要多口彈一句，得為咗令場景睇落宏偉，主角實在太細粒，要用大電視玩先得！

《 GOW》正章有 3集， PSP外傳有兩集，而本作故事比之前 5作發生得更早。不過 Kratos冇學《 DmC》改造型扮後生，仍然係同一個「雞子頭」樣。

呢位女神無論個樣同把聲都非常難頂，女權人士請原諒光頭 K對佢冇面畀。

有冇令你想起《夜神起義》入面， Batman被 Bane打斷腰一幕？

虐殺敵人爆晒腸

基本打法係以輕攻擊同重攻擊組合成連續技，更加入新動作「抓取」，嘍囉戰時隨時按「 R1」就可以揮出其中一把混沌之刃將敵人捉實，雖然少咗把劍用而且動作變慢，但再按重攻擊就可以將敵人四處拋，面對一大堆敵人時解圍一流。
隨住故事發展，新武器大劍、長矛會陸續出現，按下就可以使用副武器攻擊，更可以揮出超勁特殊技，除咗可以更效率殺敵，仲可以出空中 combo，玩家可以用 R1掣將怪物打飛，再跳上半空追打，部分敵人會被打到肚爆腸流，論爽快血腥度勁過《 DmC》多多聲。

可短暫時間捉住大怪物殺嘍囉，控制佢當武器打人，爽死！

練熟空中 combo，可令敵人落唔番地，喺半空爆腸而死。

狂神網戰

雖然水準仍然 keep到，不過龍肉連食六次點都會悶，眾望所歸下今集終於首次加入 online多人模式。當中設有多種對戰模式，例如「 Domination」就係互奪武器，鬥快殺死場上巨人。而「 Favor of The Gods」就係最大路大亂鬥玩法，容許四個戰士落場互片睇吓邊個殺人最多為勝。玩家更可選擇侍奉之神祇：主神「宙斯」、戰神「阿瑞斯」、海神「波塞冬」、冥王「哈迪斯」。例如侍奉宙斯就會得到魔力強化及「雷」之力量，侍奉阿瑞斯就會令打擊力提升及「火炎」神力等。

斯巴達戰士互相爆腸，殺到興起更可將敵人左右開邊，相當誇張！

除互劈一番，多人模式中更有 RPG升呢要素，從場戰鬥中可得到「神之祝福」（經驗值），藉以強化各種能力。不過斯巴達戰士係冇女人揀㗎！

互相靠害當然係大亂鬥最大特色。

喺「 Domination」模式內除咗要攻擊巨人，仲要防範巨人打番你轉頭。