採訪當日，慧慧站在工廈天台的邊緣拍照，面無懼色，「呢啲係小兒科啦，又唔使我跳落去。」

青雲路女替身

撞車跳樓爆玻璃　女替身憑大膽入行

2013年03月06日 ~~ 第1102期交易通．搵車快線

有些行業永遠是男性主導，就像特技演員，飛車跳樓這些高難度動作，一般女生早已卻步，但慧慧卻是例外，她外形纖瘦、沒有功夫底子，兼由臨記領班半途出家，卻憑着大膽肯搏，得到不少導演、監製賞識，曾拍過《旺角黑夜》、《綫人》等多部電影及不少廣告，成為行內罕有的專業女替身，巾幗不讓鬚眉。

政府一個戒煙廣告內，片中兩位男女演員被車撞倒後，沒有受傷，走到路旁抽煙，卻因吸煙而死亡，這位演員正是慧慧，還以為廣告全是特技效果，「特技效果只係 key咗條街，但撞車嗰幕，我哋真係被車撞，要計好時間，架車一撞過嚟，自己就要彈開，避免受傷。」
撞車對今年 35歲的慧慧而言，只是小兒科，她連跳樓、碌樓梯、跳海及爆玻璃等高難度動作都做過，「做得呢行就要夠大膽，同埋唔怕痛，我哋成日要撻嚟撻去，有時着夏天衫，冇得墊 pad，成日跌到瘀晒，好似喺《綫人》裏面做桂綸鎂替身，有一幕講桂綸鎂喺荒廢嘅學校課室俾人打到飛起，疊高咗好多枱凳，我要俾人打到成個人跌埋去，撞到手腳瘀晒。」
前年曾志偉監製的《我愛香港開心萬歲》中，有一場景講到吳君如被黎耀祥撻又用花瓶仆頭，這也是由慧慧做替身，「拍完場戲真係頭暈，仲流埋血，不過志偉好好人，好關照我哋呢班替身，見我拍得辛苦，畀咗雙工我，真係好多謝佢。」

上年年尾慧慧拍了一個政府戒煙廣告，她在片段內要被車撞到，還拍了宣傳海報。

每次演出心存感激

做替身工作令慧慧認識不少本地和外國明星，圖中是她與奇洛李維斯合照。

除了曾志偉，慧慧對不少曾用過她的導演、監製和武指也心存感激，「多謝」二字常掛在口邊，「因為我冇功夫底子，冇跟過任何師傅，可以喺呢行立足，真係要多謝用過我嘅人。」
自小跟着做小販的媽咪在街頭擺檔的慧慧， 17歲中學畢業後，在世叔伯的餐廳做侍應，及兼職賣健康產品，在餐廳認識了臨時演員公司老闆， sell健康產品之餘，趁着放假貪玩跟去做臨記，因為夠細心，做了 5、 6次臨記後，便被老闆升做帶隊，「即使係做臨記，我都好專心做嘢，會留意好多細節，好似見到之前個 shot係有兩包飲品喺枱，再開機變咗 1包，會主動提番場務。」

替陳慧珊跳海上癮

其實慧慧一直對替身工作感興趣，「覺得佢哋做到咁多危險動作，真係好堅，可惜細個冇機會去學。」
99年，她已做了全職臨記帶隊，當年她帶着一班臨記去拍攝由羅嘉良和陳慧珊主演的電視劇《先生貴性》，令她獲得做替身的機會，「導演突然話要搵個大膽啲嘅女仔，代陳慧珊跳落海，我就膽粗粗試吓，嗰次我要面向個海大字形撻落去，要跌中海入面麻包袋個位置，唔可以 NG，我居然一 take搞掂，現場工作人員拍晒手掌，不過我就撻到成身痛。」
雖然痛，但那份滿足感，令慧慧上了替身癮，可惜之後苦無機會，直至 04年，她帶隊拍陳忠泰任武指的電影《大阪撻一餐》後，才正式入行。「當時佢想搵個大膽嘅女仔，拍一幕被人撻落海嘅戲分，知道我跳過海，就搵我試吓，雖然拍得一場戲，但我都唔介意剪短頭髮去拍。」陳忠泰此後經常找慧慧做替身，令她在行內漸有名氣，之後愈來愈多人找她拍戲，令她踏上替身之路。

慧慧為不少電影演出，如《綫人》內她做桂綸鎂替身，在電影尾段她被撻落一堆枱凳度（小圖）。

大膽肯搏不怕受傷

因為慧慧十分大膽，她試過幫手做攝影師，吊威吔到 30呎高為珠寶廣告進行拍攝工作。

替身這個行頭，男多女少，全行女替身約得 4個，除慧慧外，其餘 3人也有武術和跳舞底，「得我係一張白紙，乜都唔識，不過我勝在夠大膽，咩動作都肯去搏，其他人可能會揀簡單啲嘅動作做，但我絕對唔錫身。」
慧慧也很努力練習，等埋位或空閒時，會跟其他武師學玩兵器，又經常練習各種動作的反應，如撞車要如何就位和保護身體等，將勤補拙。「每次從高處跳落嚟，下盤要穩，之前又練腰力，唔係好易拗柴。」
即使勤於練習，受傷在所難免，撞瘀、拗傷已屬小事，慧慧為拍《 Laughing Gor之變節》，搞到腳骨裂，休息了半年。「我替陳法拉由 2樓跳到下面架貨車頂，再滑落地面，嗰日個地好濕，我喺試動作時冇做好準備，一跳已經拗到腳，痛到頭都麻痺，但我忍住痛，扮冇事繼續拍，拍咗兩 take後，已痛到標冷汗，返到屋企隻腳已經行唔到，去醫院檢查，原來腳骨裂咗，要打石膏，結果唞咗半年。」

拍水底戲險些送命

拍電影《情謎》時，慧慧拍潛水戲時，差點游不上海面，險些爆肺，幸好在場有潛水人員幫忙。

這次受傷仍然沒有嚇窒她，傷愈後又再做替身，但說到最驚險，便是拍水戲。「有次代陳文媛拍《幽靈情書》，有幕要着住婚紗，由海中心艘郵艇，跳落水游上岸，點知套婚紗勁長，喺水中纏住我對腳，搞到我游得好辛苦，差啲沉落水底唞唔到氣，後來搏命拉開條裙，先游到返去。」另一次替舒淇拍《情謎》，又有落水戲，慧慧要潛到水底，被水底的鉛帶纏住，險些爆肺。
替身工作很危險，又不是日日有工開，所以慧慧一早謀定後路，與拍檔於 08年開設「神畫映像」臨時演員公司，有時她甚至會做出鏡做埋演員，像在《旺角黑夜》中，做張栢芝的朋友等，現時慧慧平均月入 2、 3萬以上，「我知道替身呢行冇得長做，但我冇諗過幾時退，因為我仲好享受呢啲過程，每次完成某啲動作，我覺得好有滿足感，我希望做到冇得做為止，𠵱家我最想試吓由 4樓跳落嚟，之前最高只係跳過 3樓咋。」

錢嘉樂

現時錢嘉樂開戲都會找慧慧合作，如在約旦拍《逆戰》時，錢找她做白冰替身。

我喺《旺角黑夜》中，要搵個女仔扮妓女，要着住高踭鞋撻低，當時慧慧做緊臨記帶隊，叫佢去試拍，我見佢拍得唔錯，覺得佢好有心做呢行，之後有咩嘢就會搵佢，唔經唔覺同佢合作咗 10年。

點入行？

除了替身工作外，慧慧亦有不少幕前演出機會，她在電影《第一戒》中飾演被鬼上身的女警，與余文樂有對手戲。

想入行做特技演員，一般要拜資深武指、武師等為師傅，自小跟他們練功做起，像成家班、洪家班等，不過也可以像慧慧般，由臨時演員做起，不過屬於極少數。至於薪酬方面，以一組戲為單位，不過慧慧坦言酬金不算多， 9小時為一組戲，公價 4位數字，估計約 3千元起。「如果極高難度動作，例如高過 3樓，即 4、 5樓跳落嚟，就會有雙工。喺一組戲內，無論做幾多個動作，都係計一組錢。」

神畫映像
facebook： Myth Pictures
電話： 2137 7010

後記：習慣周身傷？

為拍片試過腳骨裂，搞到要用石膏包紮，休息近半年。

兩次約慧慧做訪問，都見她雙腳滿是瘀痕，不過縱然渾身痛楚，也應記者要求，不斷上下爬在天台鐵梯上，兼單手維持甫士拍照半小時，專業精神可嘉之餘，連相交非深的記者也為她感心痛，家人又怎會贊成她做替身？「我媽咪最初都好反對，但慢慢接受咗，𠵱家佢不時會幫我煲田七湯去瘀。」畢竟身體髮膚受諸父母，還是錫身一點好。