五花大綁採訪「冥婚」期間，Theresa跌入奸人圈套，最後更被五花大綁蹧躓。

上年8月，臨飛北京拍劇前一日，傅穎突然於活動上爆前度羅仲謙大鑊，結果經理人公司星皓老闆王海峰一怒之下，cut晒Theresa所有工作，北上唔成，仲要擺入雪櫃急凍。零工作近4個月，Theresa深明率直冇運行嘅道理，學精收口，即獲公司安排拍攝國內第一套3D電影《詭婚》，仲做埋女主角。據知國內不少導演睇中Theresa，今年Theresa將長駐北京接拍多部內地電影及電視劇，乖乖哋咪有運行囉！


剛於北京煞科的《詭婚》係國內首套3D懸疑片，由Theresa、陳小春及夏文汐主演，最近便爆出片中的配角，內地演員江雨霏同小春拍戲黐埋。《詭》片的故事講飾演外國留學生的Theresa，因採訪「冥婚」題材而捲入靈異事件。

北京撞鬼
傅穎逗留北京2個月，每日都對住啲神怪嘢同紙紮公仔，據知劇組入住嘅酒店，仲鬧鬼添！Theresa說︰「拍嗰陣成日都聽到劇組人員話俾鬼壓，有位演員嘅朋友上嚟探班，仲懷疑俾鬼上身，講一大堆我哋聽唔明嘅嘢；有一晚我瞓到半夜，喺睡床望出客廳，見到一個着住斗篷嘅人企咗喺門口……真係好驚，唔敢再望。」不過，撞鬼總好過冇工開吖！經一事長一智，Theresa決定封口唔再提羅仲謙，重新開始，「總之好開心家做到自己想做嘅嘢，同公司亦都溝通得好好，我會珍惜每一個機會。」

7月再戰書展
過去6年均於書展出書的Theresa，今年亦會繼續推出相集兼散文集，今次已經係第7本作品，星皓亦準備書展前為Theresa再谷人氣，誓要迫爆會展；而一向畫得吓嘅Theresa，年尾亦會推出畫集，修心養性，專心工作。

賺人仔買樓
據知，國內已經有另一導演睇中Theresa，4月將會開拍另一套內地愛情片《愛神丘比特》，7月再出散文集，年尾又出相集，而今年Theresa會長駐北京，公司亦安排佢見導演和傳媒，增加機會和知名度。北上發展嘅Theresa，今年目標係賺到第一桶金買樓做業主，佢話女仔始終都要有瓦遮頭先有安全感，「希望今年可以，雖然，未來日子可能大部分時間都喺國內，但有層樓先有安全感嘛。」男人靠唔住，Theresa惟有靠自己。

北京桃花劉家良侄仔力追
一向惹桃花嘅Theresa，今次北京之行又有新料，據聞佢曾經係TVB藝員，家吓升呢做咗監製嘅劉家良師傅侄兒劉永健力追，劉正係《詭婚》監製，由佢欽點Theresa於《詭》片做女主角。據知，劉除咗日日喺片場獻殷勤，仲喺微博認做粉絲添！不過Theresa就話︰「吓？我又唔覺喎，我哋微博係有互相關注，但返到香港都冇聯絡，但佢喺片場做嘢好認真囉。」Theresa果然精咗。 ####


激咀小春《詭婚》講外國返嚟嘅Theresa為採訪民間對「冥婚」嘅報道，而跟老婆過世的小春撻着。情到濃時二人咀起上嚟，不過只係拍戲，現實二人全冇過電。


每日對住啲紙紮公仔，Theresa仲要自己住一間酒店房，好彩公司會派同事上去陪佢。


雖然《詭》已煞科，但由於加入3D科技，所以最快都要年尾才上畫。呢套戲係內地第1套3D懸疑片，夠晒noise！


博入屋上年未爆大鑊之前，星皓已經幫Theresa準備北上發展，仲安排佢上遊戲節目《快樂邀請》。


Theresa最後一次喺香港出席活動，已經係上年11月，公司刻意幫佢扮靚靚出席雜誌活動，轉型洗底。


上年8月爆出疑似被虐事件後，Theresa同羅仲謙出席記者會都要前後腳現身。事隔半年，Theresa已學精，遠離是非。


Theresa上年出嘅《A Time To Love》首日賣出5,000本，係威係勢。


微博狂讚


劉永健曾係TVB藝員，拍過《洗寃錄》及《尋秦記》等電視劇，最近已轉型做幕後，替內地電影任監製。


劉永健（右三）喺微博盡訴對傅穎傾慕之情，話自己係佢嘅粉絲之餘，更大讚佢係美人。


劉永健5歲就跟父親劉家榮到台灣拍戲，之後一直留喺無綫拍劇，其伯父劉家良更加係揚名國際嘅動作武師。近年佢轉攻幕後製作，05年電影《七劍》中仲擔任助理指導。《蘋果日報》圖片

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄