炙燒三文魚茶漬飯$68
湯底用上日本珍貴魚種「真鯛」熬成，清淡卻帶魚香，配以略為燒過米飯及米通粒，濕潤而焦香，喜歡香口者必愛。

潮𡃁便當

和風飯誘惑

2013年03月06日 ~~ 第302期 Face

韓風雖然激吹，但講到底，食日本嘢始終係王道，新店長開長有，最近，同一時間多咗唔少新舊丼飯、洋式咖喱奄列飯專店，其中兩間聯乘 Chocolate Rain及 Global Work，有靚衫有靚裝修睇，飽眼福之餘，食得更和味！

上環夢見屋× Fatina一起發夢
獨賣番茄咖喱丼

茶漬飯，以熱茶倒入米飯之中，簡單快捷，日本古時物質唔豐富，平民最愛，不過今時今日，通常高級日本料理店先有得食。上環新開的夢見屋就以平民價$68提供茶漬飯，有別一般茶漬飯，不用茶，用上「真鯛」（魚的品種），湯底熬製 1天 1夜，湯身望落去雖然淡如清水，但有魚鮮味，配合微焦的飯粒及米通粒，咬落卜卜脆但又唔會食到口乾，加埋海帶淡淡鹹香， match番晒淡淡燒過三文魚肉香。除了茶漬飯，本店更獨賣一款芝味蝦肉番茄咖喱丼飯，芝士帶焦香，番茄細細粒但茄味濃郁 juicy，番茄汁撈入咖喱，好辛香，配粒粒分明的飯，好好咬口！
另外，有別一般分店，上環店夢見屋首次與本地創作品牌 Chocolate Rain聯乘，所以店內有不少 Fatina及男友 Chefo穿上和服的公仔擺設、掛畫，仲有開幕當日由 Chocolate Rain親手繪畫的玻璃櫥窗。 Fatina系列甜品及飲品有成 9款，一款印有 Fatina模樣的銅燒餅，手板咁大，非常鬆軟，夾咗小倉紅豆，甜而不膩！

《 FACE》推介
芝味蝦肉番茄咖喱丼$65
番茄汁茄味濃郁，食到尾帶咖喱辛香，伴飯食一流，比之帶焦香味的芝士更為突出。

Fatinaの秘密花園$55
銅燒餅用上蛋糕材料，入口更鬆軟，紅豆配忌廉香甜幼滑，雪糕滑得嚟奶香味重。

Check!

既然同得 Chocolate Rain聯乘，店內當然唔少得以一系列有關 Fatina設計，好似餐廳特地請了 Chocolate Rain設計穿上和服的 Fatina及 Chefo擺設，以及 4款杯墊，講 Fatina同男友 Chefo同遊富士山及泡溫泉。

Fatina是個喜歡經常閉着眼發夢的女仔，跟夢見屋的店名很有緣。

Chocolate Rain由 Prudence Mak（麥雅瑞）在 2000年創立，靈感自兒時夢想及奇妙旅程， 2011年曾在大英博物館展出，在上海、倫敦、巴黎均有工作室。

鐮倉和茶房夢見屋

地址：上環德輔道中 317-321號啟德商業大廈地下 G及 H鋪
電話： 2581 3283
營業時間： 11am-11pm

北美 Style辣汁丼飯

丼飯人人都食過，在銅鑼灣登龍街新開了一間丼飯小店，有別於一般丼飯，均會加入自家調配過的醬汁，當中一款角切魚生丼，加入特製辣汁，甜甜酸酸入晒飯粒之內，食到尾辣味漸濃，加上飯內有青瓜粒，配合酸辣汁，好開胃。呢種辣汁伴丼飯的食法，乃北美人士食丼飯的習慣，由於店主曾在北美居住過，所以丼飯正正靈感自此，辣汁其中一款秘密材料，更是從北美運來，著重帶出辣汁香味，喜歡汁撈飯的朋友要試！

天婦羅櫻花蝦野菜餅丼$108
野菜餅內有南瓜、番薯、露筍，炸得脆卜卜唔算油膩，上面加咗櫻花蝦，鹹香即時撲鼻，畫龍點睛。

辣醬角切魚生丼$98
丼飯本身帶醋酸味，加入酸酸辣辣的汁醬後，更加開胃，好容易食多咗。

辣醬三文魚及吞拿魚丼$118
吞拿魚選用日本赤身吞拿，肉身肥美，吞下後甘香在喉頭久久不散。

自家醬汁
店內最少有 5種醬汁，其中辣汁甜中帶酸，配丼飯酸酸哋好開胃，唔食辣者，亦可以揀胡麻汁。

食客 Candy售貨員

我第一次嚟，呢度魚生好大件，下午茶有烏冬又有飯， 60幾蚊好抵食。

天一丼

地址：銅鑼灣登龍街 36號登輝大廈地下 E號鋪
電話： 2893 3228
營業時間： 12:30pm-10:30pm

全球首間
Global Work× UCC Cafe

行開街的朋友，都會留意到最近 UCC新 cafe在世貿中心插旗，這間新店更是全球首間「時裝洋食屋」，因為它 crossover日本年輕時裝品牌 Global Work，店員的制服也是 Global Work所製。 Cafe主打奄列飯、意粉、三文治等，當中奄列飯特別配上來自日本的牛肉汁，勁重牛肉味，牛魔王至愛，隔籬仲係 Global Work專門店，食完行夠晒就腳。

漢堡奄列飯$86
漢堡扒以全人手製作，肉身腍而微微帶汁，牛肉汁則專誠從日本空運來港，充滿牛肉香，極有和洋配風味。

UCC是全港獨家使用光學彩虹吸式咖啡壺慢煮咖啡的餐廳，由於光波受熱均勻，咖啡飲落唔會酸， after taste強。

制服乃 Global Work店員限定之休閒服，從日本訂來，特地設計成 casual wear款，夠親民。

GLOBAL WORK Cafe by UCC

地址：銅鑼灣 wtc more世貿中心 P303- 303A鋪
電話： 3102 0518
營業時間： 12nn-10pm

最強 3.7牛奶攻勢
滑蛋咖喱

去到上環白熊咖喱就見到大大個雪糕 counter在大門當眼處，對於食開屯門總店的朋友，雪糕機固然係新嘢，有原味同綠茶 2款口味，加$5仲可以加藍莓、粟米片、糯米糍等配料，雪糕更以 3.7牛奶製成，奶香特濃。不過說到底咖喱飯才是重點，芝士豚肉扒奄列蛋咖喱飯，在奄列內繼續加入 3.7牛奶，蛋汁滑不溜口，細嘗之下帶奶香，配香濃豚肉咖喱及鹹香芝士伴飯食，平衡番略嫌太濃的芝士味，頂頭仲有一嚿重 120g的豚肉免治，塞飽你個肚！

芝士豚肉扒奄列蛋咖喱飯$78
芝士單獨吃鹹香滿溢，但配合咖喱汁同超滑奄列後，就似有 3種不同醬汁撈飯，口感豐富。

北海道宇治綠茶軟雪糕$23

大大個雪糕 counter喺門口，好難忍得口。

白熊咖喱

地址：上環信德中心 2樓 228-230號鋪
營業時間：星期日至四： 11am-10pm；星期五、六： 11am-11pm

重口味醬油飯

專門提供日式丼飯的丼丼屋，上月（ 2月）在德福廣場開業，連埋附近剛開的拉麵店及烏冬店，多咗好多日本嘢食。而為慶祝新店開張，餐廳提供 2款全新丼飯，推介關東味噌玉子豬柳丼，睇落同一般豬扒飯無疑，但焦點為味噌汁「關東赤味噌」，乃日本關東人士偏愛，特意校濃醬汁味道，香甜香濃中帶果香，能有助消化，撈埋味道淡的流身溫泉蛋伴飯吃，正！

關東味噌玉子豬柳丼$85
醬汁較重口味，香甜帶果香，配以流身溫泉蛋伴飯吃就唔會太濃味，仲有大量椰菜絲畀您慢慢點汁食，健康又好味。

香葱吞拿魚腩丼$108
吞拿魚即叫即剁，食時最好加入撈好的芥末及豉油，吞拿入口綿軟成茸，間或咬到葱粒及芝麻，味道更豐富。

食客 William＆ Zoe學生
我哋食吞拿魚醬油漬，吞拿好鮮味，大大件放得又靚，增添食慾。