男人最痛，當然可免則免，偏偏有青年站在街頭舉起紙牌，請途人任踢子孫根，更拍成短片，上月放上網後瞬即引來火紅點擊；當中有嘲笑，有感同身受，但更多的是指摘，批評他們浪費青春。「咁點先叫唔浪費？我覺得最緊要係無悔！」當街踢 J之後，還有諷刺唐英年僭建的短片，和一批 90後青少年《天與地》式追逐夢想的故事。記者：譚志輝、梁琬珊、麥超億
拍攝「免費踢 JJ Free Kick In The Nuts」短片的 Ken19歲，他說：「踢 J條片只係第一炮，我哋想借玩 Jackass（死蠢鬥一番）呢樣嘢去反映社會被遺忘嘅一面。我 14歲睇過外國人做嘅 Jackass，已經有呢個念頭，個世界係咁叫我哋應該點點點，無第二條路咩？」來自小康之家， Ken入中學後已被師生當「異類」，只因瘋狂玩法多多。「其實根本唔係怪，好似玩『閹』咁，大部份人後生都玩過，係咪大個咗就否定呢樣簡單快樂？」中五成績欠佳，他決定投身工作：「成功係咪一定要入到大學呢？我想用結果話畀大家聽：唔係！」父母當然反對，「我唔係去學壞，唔係不事生產。同屋企最緊要溝通，我家喺機場做物流，夠自己食仲畀到家用，算有少少經濟基礎，係時候試一試」。Ken在網上找來一班《天與地》式的志同道合朋友，包括 20歲便創業的阿望。「我一樣中途輟學，但我家係一間錄音室嘅老闆。」阿望說：「我夾 Band出身，好鍾意音樂，但靠音樂喺香港搵食百中無一，我都要面對現實，賺到第一筆錢就決定開錄音室，做番自己鍾意嘅嘢。」阿望與父母協議 20歲前會找到自己第一桶金，否則重拾書包，結果贏得漂亮：「所以 Ken搵人搞 Jackass，我第一個支持，因為當中嘅精神就係相信自己。」阿望還找來正讀副學士的 Band友阿謙，加上同學阿狗，還有兩名 90後攝影師，「我哋叫自己做無腦（ The Brainless），因為我哋個腦放滿咗青春，無位裝其他嘢。」
放大圖片 
阿望挑戰「連隊」 48支美樂多，結果嘔吐大作。他指在拍 Jackass的過程中，最重要是面對自己。麥超億攝
放大圖片 
90後 BAND友拍片搞 Jackass，望如《天與地》般誓要走出屬於自己的路。右起為發起人阿 Ken、阿望、阿謙及阿狗。
提醒大家都有青春
網友批評他們所謂青春就是無聊搞事如踢 J：「好多嘢未成功前都會俾人話無聊。我哋講嘅青春，就係勇於嘗試，大個咗唔會後悔，我哋第一炮玩踢 J，係想提醒番大家都有或者曾經有青春，喺中學甚至大學，男仔之間都會玩呢樣嘢。」傷害不到人，但可會傷害自己？「拍之前已經估計過途人反應，一般唔會用力踢落嚟，真係遇到癲嘅我識避嘛！」事實上，途人大都只是輕輕碰阿 Ken，最後一名途人應邀狠踢「小 Ken Ken」，「嗰一刻我唔識痛，我好開心，因為條片成功在望！」結果短片上月 21日推出後，在 YouTube累計近 5萬點擊。「屋企人都有睇，免不了鬧幾句，我咪再同佢哋傾條底線囉，最緊要大家肯傾。唔係好似家香港咁，只容許一種聲音。」日前他們再推出短片《面皮超人》，阿 Ken穿超人服飾穿梭鬧市名店，諷刺特首候選人「僭建年」面皮比他更厚。稍後他們再推出其他諷刺候選人的短片。正如歌詞說：「如果命運能選擇」，他們會說一句，無悔青春。
女市民點睇
放大圖片 
陳小姐 金融人員好差，大人知道係玩，但家上網咁方便，小朋友睇咗跟住做，教壞細路。
放大圖片 
戴小姐 港大生覺得可能係假，剪接出嚟。如果係真都好想知佢哋背後想帶出何種 message。
放大圖片 
Michelle 售貨員香港 open咗、外國化咗！都幾好、幾有趣！
放大圖片 
陳小姐 財務人員冇所謂，年輕人玩乜都 OK！佢哋冇嘢搵嘢玩，睇完得啖笑。
特稿：《死蠢鬥一番》熱爆美國
阿 Ken掛在口邊的 Jackass，原本是一句美國俚語，用來罵人蠢蛋、白癡。 2001年，美國推出同名的電視真人騷《死蠢鬥一番》，由 Jackass鼻祖 Johnny Knoxville主演。節目中他帶領一班特技演員，玩盡各種變態自虐、甚至互虐遊戲，如用尿兜盛尿洗澡、裸跑等。該節目極受年輕人歡迎，翌年再推出同名電影，同樣大收旺場。
模仿自虐橋段屢奪命 放大圖片 
《死蠢鬥一番》系列掀起熱潮。圖為《死蠢鬥一番 3D》劇照。
節目及電影出街後，吸引不少年輕人模仿當中的自虐橋段。雖然《死蠢鬥一番》播出時有警告字句，提醒觀眾節目內容有危險性，切勿模仿，但仍有不少青少年因模仿導致受傷甚至死亡，節目因而一度遭嚴厲批評。雖然大部份人覺得這班人無聊，但在網絡世界仍有一定支持者，不少人嘗試自拍 Jackass片段放上網；在一片謾罵聲中，偶然得到讚美欣賞。這班人裝瘋扮儍，做出大膽、傷風敗俗等自虐行為，吸引別人眼光之餘，為的是要製造難忘回憶。雖然 Jackass在港未算流行，原來藝人吳彥祖也曾拍過 Jackass。片段中，吳穿上裝備，坐着嬰兒三輪車，一口氣從香港山頂道頂往下衝。山頂道既窄且斜，彎多又急，加上三輪車過於矮小，吳屈曲雙腿稍稍離地，三輪車即往下衝，高速跟身旁的車輛擦身而過，險象環生。《蘋果》記者 
畀人踢「 JJ」，阿 Ken笑言沒有痛楚，只有成功的快樂。
留言列表
{{ article.title }}
