面對面
人活着賴一口氣 江若琳
上月初（ 2月 6日），香港電影金像獎公布了第 32屆入圍提名名單。影后一獎，由《聽風者》和《大魔術師》的周迅、《春嬌與志明》的楊千嬅、《高海拔之戀Ⅱ》的鄭秀文；以及《高舉•愛》的江若琳角逐。
周迅，出道 22年；楊千嬅，出道 18年；鄭秀文，出道 25年； 25歲的江若琳才出道 6年，人家票房億億聲，男主角是梁朝偉，和江若琳做對手戲的是杜汶澤，《高舉•愛》香港首日票房僅得 6萬，不論計資歷定睇數據，江若琳這次真的是入圍已經當贏，爭番啖氣。
江若琳說，兩年前《高舉•愛》的導演邱禮濤拿着劇本來找她，為啖氣，她曾經拒演：「我聽過一番說話，有人話，增肥 20磅扮舉重運動員，全香港個個女演員都得，惟獨江若琳冇可能做到。嗰一刻，我頂住道氣，你睇死我，我咪順吓你意，唔做囉……」
好在，最後關頭，又係為啖氣，她改變主意：「太多人睇死我啦！所以呢套戲，我係含住兩泡眼淚、抱着體育競賽精神去完成㗎。」
所以說，人活着就賴一口氣，發悔氣還是爭口氣，就在一線之差。
那一年，我坐在山頂位
江湖傳聞，江若琳 05年陪朋友參加寰宇電視劇《伙頭智多星》演員招募，在女廁巧遇老闆娘趙雪英，誤打誤撞被簽為寰宇旗下藝員，受訓三年後正式踏入娛樂圈。江若琳說，入行拍電影足足六年，從來沒有參與過香港電影金像獎，反倒是第一年簽約，入過場做過觀眾：「嗰年公司有飛剩，畀咗兩張我帶個朋友去見識吓。我仲記得我哋坐喺山頂，入場時離遠望住個紅地氈閃光燈閃吓閃吓，諗都唔敢諗幾時輪到自己行、有冇機會提名提到我。就算自己公司，都冇預算，大家講笑咁講，乜名都報齊，最有機會提名可能係電影歌曲。」
出道六年，一共拍過 16部電影，大多數都是青春片、單元戲，江若琳說拍親戲連角色名清一色都是照搬真人，不是「小琳」就是「阿 Ling」，別人和自己都沒把江若琳當成演員對待：「兩年前邱禮濤導演攞住個劇本嚟搵我，我滿腔熱誠，不過身邊就一個二個一盆冷水兜頭淋，朋友、導演、經理人個個都係咁講，話我未夠料、話我未使考呢個演技牌，警告我演衰咗冇人可憐冇得翻身，同我講：『你都係拍番偶像劇罷啦……』我本來已經冇信心，俾人咁講更加灰心，一等等咗半年仲未開機，以為連邱禮濤導演都對我有動搖，有一日，終於喊住咁同公司講，我唔拍啦，反正個個都睇死我……辭演之後，邱禮濤話好傷心，佢話佢有直覺我一定得。又話當年佢搵黃秋生演《人肉叉燒包》、搵劉美君拍《我不賣身我賣子宮》都係無人睇好，佢叫我要信佢信自己喎……以前，我拍戲唱歌都計到盡，期待呢套帶畀我新嘅機會、希望呢首歌可以得到幾多回響，成日想做啲嘢出嚟扭轉人哋睇法，結果永遠期望愈高、失望愈大，呢一次我乜都唔理，就信導演一次，原來做人就係咁，放開咗，反而得到更多……我諗都冇諗過自己有機會贏周迅、 Sammi同千，拍得成呢套戲，我已經贏咗自己！」
江若琳增肥 20磅，練舉重，在《高舉•愛》中飾演坎坷運動員，結果爆大冷入選金像影后入圍名單。
同偶像同年競逐影后，鄭秀文出道那年，江若琳才出世。《壹週刊》圖片
簽約後得寵指數爆表，又擠走原寰宇一姐李彩華， 08年曾經傳出江若琳介入老闆林小明婚姻。《壹週刊》圖片
上一世，我得罪得人多
25歲的小女孩而已，江若琳總說自己剛從人生低潮走出來。明明是個基督徒，江若琳卻說自己很信因果輪迴那一套：「我成日覺得，人哋條路行得順，係前世做得好事多。我要經過咁多磨練，吃咗咁多苦都改變唔到人哋睇法，我諗係因為前世踩親好多人條尾啩！」
所謂低潮，江若琳說得是四年前老闆林小明與老闆娘趙雪英婚變，她被指是第三者的傳聞：「相比之下，啱啱出道時嘅整容、爭寵傳聞簡直微不足道，話我破壞人婚姻、話我靠旁門左道，咁樣詆毀我人格，絕對係我人生最灰暗嘅一段日子。我性格遺傳晒媽咪，硬頸唔認輸，亦都唔愛應酬。一年幾個月喺大陸拍戲，人哋叫我去玩，話呢個導演好話得事，去打好啲關係啦……我係都唔去。我唔介意自己條路行得遠過人、我唔怕零下 2度浸落啲屎水度拍戲、冬天着住短裙喺天台吹風，但係我好介意俾人覺得自己要靠食飯唱 K去換個角色返嚟囉。拍《高舉•愛》，要增肥 20磅、每日同班專業舉重運動員一齊受訓。由舉晾衫竹開始，逐磅加上去，每日踎低起身三個鐘，去到第三日咋，我已經伸唔直隻腳唔識行路。教練冇當過我係演員，照樣用棍拍我，叫我挺直腰、擺啱姿勢……公布提名嗰晚，我成晚瞓唔着，諗番每個拍《高舉•愛》嘅點滴，每日我都係含住兩泡眼淚死頂捱過。嗰一晚，我喊，最好嗰班朋友陪我一齊喊，大家自拍張喊樣上 group chat分享，我諗，今次我向每個曾經睇死過我嘅人證明到，你哋睇錯我喇！」
小三傳聞後，江若琳曾經落淚拿出 58元結餘存摺力證清白：「話我靠人係詆毀我人格！」
去年被拍得去杏花邨睇樓似入市，江若琳自稱得個睇字，現時身家得六位數字。《壹週刊》圖片
下一次，我會鼓起勇氣
老闆以外，江若琳入行後的緋聞男友還有吳卓羲和踩唔死嘅阮民安（ Tommy），江若琳說都是好兄弟。自己不愛應酬，怕惹閒言閒語，感情空窗多年，連追求者也沒有：「有時見到人哋同男朋友、女朋友傾電話、傳短訊，好 sweet咁，不知幾羨慕。成日拍戲一拍三個月，晚晚都係一個人返房，有時受咗傷、生咗病，一個人攤喺張床度，冇個人撒嬌、嗌痛都冇人聽到，真係好寂寞。我 25歲咋，我都係青春少艾咋，我想搵個人錫、拍吓拖啫，有錯咩？」
少女懷春是沒有錯，不過曾經有一段美好的愛情放在眼前，卻因為自己膽小怕事而白白錯過，江若琳說是自己的錯：「又係四年前，全世界都鬧我、睇唔起我，有一個人走出嚟，話鍾意我、信任我。嗰一刻本來好溫暖，但係我驚咗，驚拖多個人落水、又驚啲新聞扭曲，唔敢出街又唔敢見佢。一個月之後，佢主動提出，不如算啦……咁就四年，我仲係一個人，佢已經有個好好嘅另一半。下一次再有一個咁嘅人出現，我一定有勇氣去馬。我已經唔係四年前嘅江若琳，我知道自己係咩人、想要啲咩，人哋講乜都好，咪由得佢囉！」
回鄉的報紙
25歲提名金像影后，我問江若琳，知道中學同學還有同齡朋友現在的去向嗎？江若琳笑笑口向後望，原來中學好友現職寫字樓，趁放假來影樓湊熱鬧。中學女同學留着短髮，說話很 man，卻說：「佢跳舞唱歌，又騎馬又落屎水，成班朋友都估唔到佢會做到。淨係一個人瞓酒店房呢樣，我已經唔敢啦！」
簽約頭三年，零收入食住靠母親，江若琳說母親一直睇死個女發明星夢：「過年返咗廈門鄉下，媽咪買咗同日幾份報紙擺喺阿婆屋企，個個上嚟拜年就攞出嚟揭一次、個個上嚟都要讚一次：『我個女幾叻？我都估唔到佢咁捱得呀！』」
一步一腳印，改變了外人的看法，還能讓自己人刮目相看，誰說做明星，就是整容黐老闆咁容易？
被指與入行前相貌有大出入，江若琳否認整容。
愛情空白，江若琳身邊陪伴的都是同性朋友，拍照當日就有中學同學跟場。
撰文：朱小博
攝影：范仲良
化妝： Cyrus Lee
髮型： James Lee@HAIR
形象： Bryan@theFlaming
留言列表
{{ article.title }}
