新車激試

唔怕雞蛋裏挑骨頭　 VW第 7代 Golf GT 1.4 TSI

2013年03月06日 ~~ 第1102期交易通．搵車快線

呢 5年香港車迷對日本車冇晒胃口，唔係話日本車冇料到，只不過德國車太吸引！
比日本車貴少少，就可以擁有一部品牌、質量、甚至科技都更勁嘅德國車，係人都識揀啦！
最先打倒日本車嘅係 VW第 5代 Golf，接住落嚟 4年前嘅第 6代更勁，連 M-Benz同 BMW都忍唔住要推出
新 A-Class同 1系應戰！
似乎 Golf已腹背受敵，第 7代可以點先突圍而出？
唔怕你貨比貨，唔怕你奄尖腥悶，第 7代 Golf實行以最強規格登場，外表似乎冇乜大變，但其實新設計多到你驚！
連擁有元祖 Golf GTI車主 Mike，試過都話佢堅！

新 Golf（左）車長達 4,255mm，已比第 1代長 440mm。

早 10年前， Golf轉款根本冇乜香港人會理，但今時唔同往日，經過第 5、 6代嘅爆紅， Golf推出第 7代，絕對大件事過 Corolla轉款！其實 Golf並唔係咩曠世勁車，由 1976年第 1代推出時已講明係穩打穩紮家庭車，第 7代都一樣，其貌不揚但內裏改良度極大。 Mike：「睇外表唔算好吸引，但試過車就知成部車比上代有好大進步。」

激烈瘦身 100kg

早講過 Golf其實係一部實而不華嘅車，所以睇見新一代外表，雖然同上代真係好似，只有將整體線條再銳利一啲，但都鬧唔出口，因為新款唔着墨喺外表，反而做咗好多睇唔到嘅嘢。據廠方表示，新款軸距增加 59mm，但整體車重竟然下調 100kg！張減肥清單中有份減重嘅部件包括懸掛系統、冷氣系統、引擎、車架、車廂及座位等等，每樣加加埋埋就做出 100kg！足足一個半成年男士咁重！「其實我一試車都覺部車好輕快，雖然唔夠我部 GTI咁只得 810kg，係就係大部咗，好似少咗小跑車味道，但揸落就知佢比上代 Sporty。」

車身雖然比上代輕巧，但仍大幅採用高拉力鋼為車架主要材料。

第 1代 Golf車主 Mike

升級迎戰同鄉

其實 Golf一直都係歐洲平價車模範，根本就係歐洲人嘅 Corolla，不過隨近年 Golf愈來愈齊料，又愈整愈靚，令到用家大幅增長，出開貴價車嘅德國同鄉 M-Benz、 BMW都出招搶生意，以 A-Class、 1系攻打揭背車市場。

一出即大賣 M-Benz A200

第 3代 A-Class根本係一個全新設計車系，外表唔再扮 cute，改為 hot hatch！據知代理去年都未公布車價已有大量訂單。 A200採用 1.6公升 Turbo引擎，輸出 156匹馬力，比 Golf GT多 16匹，但車價就要$309,000起，以 Golf GT價錢，連 122匹嘅 A180都買唔到！

操控冠同級 BMW 118i

全新 1系以 118i最多人追捧，全因用 1.6公升、 170匹 Turbo引擎，車價只係$275,000起，抵玩到不得了！當然呢個價設備唔會多，只係齋版。 118i最過癮係罕有喺揭背車用尾驅設定，令行車表現充滿玩味，不過後座空間亦係同級中最窄。

設備多到冇投訴

唔搞外表崇拜，新 Golf只專注喺低調嘅設備升級，中控台冇浮誇嘅桃木裝飾或真皮，但新增嘅 Touch mon就非常好用，可以好似 iPad咁掃 mon轉頁。此外， Touch mon下面嘅冷氣改用左右獨立恆溫，兼且有發熱座位按鈕，整體感覺高級到好似 Passat咁！講到高科技嘢，點可以唔提新加、有 Auto Hold功能嘅電子泊車掣？呢類系統好少出現喺 Golf呢類平民車上，就連對手 M-Benz A-Class同 BMW 1系都冇！
由於軸距增加咗 59mm，所以後座都比上代寬敞少少，而且有後座冷氣出風口，更加舒服。前座方面，雖然只有駕駛席有電動功能，但承托力唔錯，有埋腰部支撐添！「其實 Golf一直都係平價車仔，你睇我部 GTI就知，冇真皮又簡單，呢一代明顯高級咗好多，車廂設備、舒適性都好好，已經有 Audi A4水準。」

第 1代
初代嘅 GTI駕駛艙都非常簡單。

第 7代
整個駕駛艙用好工整嘅設計，實而不華。

電子泊車手掣仲有 Auto Hold功能，一停車就可以防止溜後。

顯示屏唔只可以用手指篤，仲可以好似 iPad咁用手撥。

軚盤預設多功能控制，而且仲有加減波撥片。

頂級科技變民用

實用為先嘅車最重要係咩？唔係性能，亦都唔係外表，而係慳油！上兩代 Golf主要以 DSG波箱達到慳油目的，但新一代就唔再得一道板斧。首先，停車自動熄匙系統已經係基本設備，新引擎仲加入咗 ACT（ Active Cylinder Management）系統，可以由電腦控制喺 1,400-4,000rpm時關閉其中兩個汽缸，令直四引擎變直二引擎，同類系統都有用喺 Bentley Continental GT V8上。
ACT引擎系統配合停車自動熄匙系統、 DSG波箱之後，令新 Golf可以做到 4.7L/100km耗油量！直迫 hybrid車！實際揸起上嚟， feel唔到 ACT系統由 4缸變兩缸，表現好順滑。除慳油係賣點外，仲首次加入 DCC（ Dynamic Chassis Control）系統，可以切換行車模式，分別有 Normal、 Sport、 Eco及 Individual，其中 Individual可以獨立設定軚盤、引擎、冷氣等，直迫 Audi A6咁多高級料。

引擎加入多項新系統，慳油之餘， GT版唔用孖叉都有 140匹馬力！

波棍旁可操作停車自動熄匙系統，上面就有 DCC系統按鈕。

DCC系統有 4個設定模式，駕駛者可以喺 touch mon選擇。

易快好彎多樂趣

暫時嚟香港嘅 Golf有 120匹 Comfortline版，同埋 140匹 GT版，而今次測試嘅係 GT版。其實 Comfortline同 GT都係用 1.4公升 turbo引擎，只係調校唔同，而上代嘅 160匹孖叉 GT會取消。筆者試車發覺，新車引擎表現好似自然吸氣引擎，幾乎感覺唔到 turbo lag，而引擎發力點集中喺前、中段，所以一起步就會感到 Mike所講嘅輕快感覺。此外，新 Golf嘅彎路表現都提升咗，車頭指向更中性，令部車更加靈活。「我覺得新 Golf好易揸，軚感好好，對比我之前試過嘅 Benz B-Class好得多！不過有一點仍需要改，就係路面噪音較大。」

後座空間受惠增長咗嘅軸距，腳部更加舒適。

前座只有駕駛席有電動功能。

車體輕巧咗，最大分別就係彎路表現，相信比上代 GT好多 15%。

DSG波箱係 Golf近代殺食設備，今代再改良到更快、更順。

易手夠保值

第 6代 Golf R車主方先生：「我買 6代 R版係因為 42萬訂價吸引，而且設備好齊，市場上根本冇對手！而且最重要係保值，𠵱家易手都仲要 33萬左右。第 7代雖然未有 R版，但我個人興趣唔大，因為同第 6代太似樣嘞，吸引唔到第 6代車主。」

DSG夠慳油

第 5代 Golf R32車主阿輝：「我當日買第 5代梗係因為個 DSG波箱啦！當年夠晒噱頭，而且實際表現我都好滿意！第 7代個樣比第 6代更吸引，不過我未試過車好難評價，希望車廠可以快啲出 GTI或 R版。」

Golf GT1.4 TSI Spec.

引擎： 1,395c.c.直四 turbo
馬力： 140hp/4,500rpm
扭力： 25.5kgm/1,500-3,500rpm
傳動： 7前速自動、附+/-模式
懸掛：前麥花臣、後四連桿
制動：前通風碟、後實心碟
車身： 4,255× 1,790× 1,452（ mm）
車重： 1,290kg
耗油： 4.7L/100km
0-100km/h： 8.4秒
車價：$269,800
查詢： Volkswagen HK（ 3698 9688）