李典

漫遊毒物

真．三國無雙 7 無雙七旋斬 Shin Sangoku musou 7

2013年03月06日 ~~ 第302期 Face

最近碧咸轉戰法甲，拍 CK廣告已經要用 Pat Pat model移花接木，但落到場打波，七旋斬助攻仍然寶刀未老。
同樣係斬，《真．三國無雙 7》今集一樣磨利刀槍唔欺場，唔只有新人、新招、新版圖加入，記者最想試佢個 if新故事模式，歷史會隨住你打機成績而改變：孫策同郭嘉都可能唔使死，能夠參加赤壁之戰，趙子龍可能救唔到阿斗， FF愛想友有排玩！

佢支長棍前面有個大齒輪，劈劈吓仲會飛出嚟當飛鏢。

魏

樂進

一直係大眾臉阿叔樣嘅樂進終於正名，型仔得來武器雙鈎夠實用。

蜀

關興

關公之子，武器叫雙翼刀，斬斬吓真係會自轉，好似對鳥翼咁旋轉斬友。

關銀屏
關公個女都落場，武器似街市婆，長棍兩邊有 2個鐵錘，好大力呀！

張苞

張飛之子，右手拳套上有把可以伸長嘅連刃鞭，攻擊範圍非常之大。

晉

文鴦

晉國勢力向來比較少角色，今次連大茄文欽個仔文鴦都要出埋，佢武器冇乜特別，反而一身聖鬥士裝甲就非常型仔。

張春華

司馬懿老婆都要出來打仗，佢武器係一對爪，仲可以放出鐵線綁擊四周敵人。

賈充
成個視覺系 rock友咁，武器係一把可以投擲嘅短身斧頭。

蜀

魯肅
記者唔係咁喜歡呢類軍師型角色，支武器係豬八戒九齒鈀，老土。

韓當

個設計似日本人多過中國人，勝在武器短戟夠簡單實用。

機種： PS3、 XBox360
廠商：光榮
類型：動作
人數： 1至 2人
售價：約$539
中文版 3月 28日發售，售價未定。

新招逆轉勝負

尋晚食完飯，今晚一樣要食。打得家用遊戲機，《無雙》系列真係要玩㗎！無雙打慣唔使教，不過今集武器分為天、地、人 3種屬性（ 1人可帶 2把兵器出戰，出戰前可轉款），兩種新增招式都係靠屬性相剋去操作（天→地→人→天）：如果敵將武器屬性弱過你，就可以打到對方頭暈氣絕，頭頂出現藍色方塊 icon，此時可埋身按掣就可以做出「 Stream dash」追打，威力拍得住出超必；「 Variable counter」一樣係利用三種屬性，當屬性有利、對手儲氣出無雙亂舞時，埋去斬佢一下，可以扣到對手一滴氣都冇晒，好多時能夠起死回生，記得多多練習呀！

見到頭上有……

認住對手頭上嘅藍/紅色盒仔 icon，一見到知道對手屬性係強/弱過你，此時可按 R1轉武器，就算勁唔過人，最少都平手。

藍盒仔
即代表對手比你強。

紅三角
對手比你弱，可埋身出屬性攻擊。

Dash埋身！
當屬性比你弱的對手擋格時，連續按掣即可以「 Stream dash」追打。

出 Counter！
喺對手出無雙時，埋去按 R1，唔只可以阻止對手儲氣，仲可以爆到佢一滴氣都冇，出唔到無雙。

中國人覺醒吧！

嗱，我講緊打機咋，咪河蟹我。今集多咗一個「覺醒狀態」系統，當左下角人物圖案左邊嘅紅色 Bar儲爆時按一下右 analog棍，就會進入覺醒 mode，所有能力強化，出無雙時仲會免費升級至真．無雙亂舞。至於各個角色爆珠時可能升啲乜，當然又係喺過版後用點數去開。
總體而言記者覺得《真三 7》畫面靚咗好多，武器升呢同屬性玩法改晒冇咁悶，但我就嫌佢啲邊打邊出對話嘅故事有啲煩，唔夠爽！

今集之無雙亂舞仲會加到 1人 3招，可因應不同需要去出，比如操哥呢招打擊角度廣，最啱清兵仔。

一爆「覺醒狀態」，角色連行步路都閃晒電，好威威。

除咗自強爆珠，團結力量玩雙打都好緊要，今集一樣有上下分割畫面 2P，合作時可以出最強版「激．無雙亂舞」。

If……假如點點點

最後講番 if模式係點玩，今集模式分為 Story mode、 free mode同埋將星 mode，後者係使用自製武將由小將一路打到成為國王，有好重 RPG元素。而 if反而會出現喺 Story mode內，故事劇情會跟住你打嘅成績改寫。比如樊城一戰成功救出關羽唔使死，咁蜀國成個歷史就會改寫。

如果唔係郭嘉死咗，曹操就唔會俾孔明玩殘，敗走華容道。

周瑜係俾生神仙左慈咒死，點先可以達成條件，令佢生存落去？