拍拖半年非人生活　鄭嘉穎舊愛徐靖雯：唔想提呢個人！壹週刊 1080期－娛樂八掛大放送★

拍拖半年非人生活　鄭嘉穎舊愛徐靖雯：唔想提呢個人！
2010年11月18日
今年八月，鄭嘉穎被本刊踢爆他窩藏比自己後生二十年、廿三歲國產名模徐靖雯（ Jenny）於西貢屋企七十二小時，事後女友大方讚他成熟有風度，但習慣拍拖唔認數的鄭嘉穎，則死撐二人是普通朋友。據知，自從禁室拍拖事件曝光後，向來疑心重的鄭嘉穎咬定女友利用他上位，除了鬧爆對方在他屋企拉窗簾令戀情斷正，更即時勒令徐靖雯離開香港返北京。
男友行徑愈來愈離譜，徐靖雯亦不再吞聲忍氣，主動提分手，她承認：「唔想再提呢個人。」
唔知佢係乜水
為保住乖仔形象，從來未正式承認過任何女友的鄭嘉穎，之前被踢爆劈腿背周麗淇偷食佘詩曼，面對千夫所指，他竟照舊龜縮，推阿佘出去擋風雨求自保。同阿佘分手後，每次跟前度同場，小器鄭嘉穎永遠黑面，保持距離。一視同仁，八月跟徐靖雯拍拖斷正，又懷疑對方利用自己搏上位，鄭嘉穎對女友態度愈來愈差。
「 Jenny五月去朋友生日 party識咗鄭嘉穎，因為少睇電視，當時根本唔知佢（鄭嘉穎）係藝人，不過佢就成晚扯住 Jenny唔放，攞咗 Jenny電話號碼後，就狂 send SMS俾佢，拍拖無耐，鄭嘉穎同 Jenny講香港狗仔隊好勁，佢哋唔可以出街食飯，其實 Jenny都覺得奇怪，兩個人都未結婚，就算拍拖都正常，但佢就解釋話因為傳媒針對佢，仲話對 Jenny係真心，希望 Jenny可以體諒。」徐靖雯身邊人透露。
我同你係普通朋友！（《忽然 1周》圖片）

八月中，徐靖雯到鄭嘉穎西貢屋企過夜，男方先行離開，女方離開前，拉開窗簾望街，被記者拍下照片，事後被鄭嘉穎鬧爆。

每次到鄭嘉穎屋企「拍拖」的徐靖雯，來去都要搭的士，男方從來未接送過。
在戲中鍾意做乖仔的鄭嘉穎，近排終於肯改變形象，剃頭練大隻在新劇中做拳手。

過往電視節目巡禮，受客戶追住影相的鄭嘉穎，今年跟唐詩詠及梁靖琪拖手出場，受歡迎程度不再。（《蘋果日報》圖片）

晨早致電狂鬧
凡事以男友為先，一直只能跟鄭嘉穎在屋企偷偷摸摸的徐靖雯，今年八月中，才被拍到在西貢男友屋企過夜，共度七十二小時。
「拍拖報導出街後，鄭嘉穎晨早八點就打電話狂鬧佢，問佢點解要走去拉窗簾，又話 Jenny害死佢，仲好惡咁要佢即刻搭飛機返北京，短期內唔可以留喺香港，之後如果有人訪問 Jenny，都要同佢夾好晒啲內容。 Jenny覺得好委屈，事關嗰日係戴思聰舉殯，好多記者跟住佢，佢仲要 Jenny半夜先到。其實 Jenny已經好就佢，咁耐以來，佢從來冇接送過 Jenny，每次都要佢一個人走出村口搭的士，兩個人亦都冇試過出街食飯，因為鄭嘉穎每次都係叫外賣。」

徐靖雯屬 Elite旗下模特兒，由於在國內有知名度，所以不時來港做 show拍廣告。

近年形象插水的鄭嘉穎，這一年來，只接拍了一個銀行廣告。

曾經一度是樂易玲愛將的鄭嘉穎，因形象不斷下滑，多次出手相救的樂易玲亦開始放手唔理。

年中推出的《鐵馬尋橋》收視高企，男主角鄭嘉穎被網友批評演技差，反而男配角馬國明則被受讚賞。（《蘋果日報》圖片）

提都唔想提
一直照顧徐靖雯在港工作的模特兒公司女助手，對於 Jenny被指借鄭嘉穎上位，亦不吐不快：「 Jenny喺大陸一早已經有知名度，成日爆騷，好多名牌都指定要用佢，使乜借鄭生上位。」
上週六（十一月十三日）中午，不再委屈做鄭嘉穎唔見得光女友的徐靖雯出現中環，對於前度是否為「拉窗簾」鬧爆她等傳聞，她只回應：「唔想再提呢個人（鄭嘉穎），唔開心嘅事過咗就算。」
翻版張栢芝
身高 1.77米，擁有 44吋長腿的徐靖雯，大學時期，已被星探邀請拍戲拍廣告，大學一年班，她在電視劇《排球女將》中擔任女主角，不過因抵受不住艱辛訓練，身體不能負荷，最後無奈辭演。 06年，徐靖雯在朋友游說下參加「中國之星模特兒大賽」，獲得「最上鏡獎」及十佳模特兒獎，當時仍在北京大學文學系修讀最後一年的她，由於貌似張栢芝，因而獲模特兒公司垂青正式入行，先後拍過 Canon、 Sony、北京銀行等大品牌廣告，她亦行過不少內地大型時裝騷，如北京時裝騷，中國國際時裝騷等。 08年，被趙式芝睇中，簽約旗下模特兒公司，轉移到香港發展，約滿後，今年初轉投 Elite， 8月跟鄭嘉穎傳出緋聞後，她先後接了十個活動，跟陳豪、 Jessica.C等人一齊行騷。

爆出跟鄭嘉穎戀情後，徐靖雯在出席攝影產品活動時，大讚男方大方有風度。

○八年轉投趙式芝（左一）模特兒公司，徐靖雯在十二月時跟鄺文珣（右二）及徐子淇（右一）出席「智行基金會」活動。（《蘋果日報》圖片）

無品男
鄭嘉穎入行以來有不少緋聞，但他例牌否認，偶一不慎斷正，他亦從不顧女方感受，最經典莫如踢「佘」落車，自私又無品。
佘詩曼

一直否認戀情的鄭嘉穎和佘詩曼，去年 3月男方駕車接載女方「屈佘」返家過夜斷正，同年 8月再被發現他載阿佘離開南圍寓所，其間發現記者尾隨，男方一度踩油飛車，更在情急下要女方落車，戴住口罩遮面的阿佘無奈唯有狼狽落車截的士離開。鄭嘉穎狠心欠風度，兩人戀情隨即玩完。
周麗淇

03年與周麗淇合作《翡翠戀曲》戲假情真，但兩人一直否認戀情， 06年兩人再度合作《天幕下的戀人》，令鄭嘉穎人氣急升登上視帝，第三度合作《最美麗的第七天》，戀情漸漸浮面。 08年，鄭嘉穎背住周麗淇與合作拍《法證先鋒Ⅱ》的佘詩曼撻着，與周麗淇五年情玩完，被指負心的他形象即插水。
陳敏之

搭上佘詩曼後，鄭嘉穎被翻舊賬指他五年來背住女友周麗淇暗溝六位女星，當中包括陳敏之。 04年男方趁周麗淇不在港，向陳敏之埋手，女方更被影到出現他屋企，事後有指鄭嘉穎向周麗淇解話指對方只是契妹，受騙的陳敏之向友人哭訴，兩人反臉。