視帝熱身賽　陳豪力壓黎耀祥壹週刊 1080期－娛樂八掛大放送★

咪急，輪住嚟！（設計對白）"
埋牙較量
視帝熱身賽　陳豪力壓黎耀祥
2010年11月18日
《義海豪情》熱播，但黎耀祥卻被指演技過火，令陳豪大有機會憑《公主嫁到》的駙馬爺一角，鍊贏劉醒，捧走今年視帝。
早前《無綫節目巡禮 2011》，全台藝人奉命為公司拉客娛賓，唔使埋位拍《心戰》（新劇）的陳豪，一到場即被半百中女生擒圍攻，影相簽名排晒長龍，場面壯觀。轉頭入到廠，陳豪又主動服侍汪明荃，氹到阿姐變汪四萬，又同傳媒吹水打牙骹，成晚歡樂先生上身。
攞視帝講演技，更講民心，陳豪明顯睇高一線。
中女混戰
《無綫節目巡禮 2011》當晚，近期熱爆的黎耀祥所到之處，不時被師奶 fans叫停，拉住影相簽名，但論墟冚程度，同陳豪仍然有一段距離。
晚會六時半開始，搭正七點，陳豪到，會場內的陳豪粉絲馬上起哄，大聲高呼：「陳豪！陳豪！」一班中女 fans甚至肉緊地說：「我今晚一定要同陳豪影到合照！」講完，即一窩蜂湧上前將陳豪包圍。
高峰時期，包圍陳豪的 fans人數多達五十人，場面混亂，要勞動保安出手，分批安排瘋狂中女排隊，維持秩序。
面對如狼似虎的女 fans，陳豪難免露出尷尬神情，但仍逐一為排晒長龍的 fans做人肉布景，直至工作人員嗌 last round，才入場埋位做騷。

陳豪被中女 fans圍攻，簽名影相排晒長龍。

《義海》熱播，黎耀祥被 fans包圍，但人數明顯同陳豪差一截。

阿姐跣腳，陳豪機警從後抱住，順勢為她披上披肩，令阿姐化險為夷。

歡樂先生
氹女有一手，對住生人勿近的汪阿姐，陳豪同樣應付自如。等入廠期間，阿姐唔小心差點跌低，站在身後的陳豪，眼明手快極速攬實阿姐，還有風度地順勢為她披上披肩，搞到阿姐「汪四萬」上身，冧爆！
成晚做歡樂先生，陳豪連一班企足成晚的攝記都唔放過，主動埋身吹相機經，甚至借相機試影做攝記。換轉其他人，一定俾人話搏上鏡，但在陳豪身上，就叫親民，黎耀祥想冧庄，唔係咁易！
晒背鬥高
屬有料之人的廖碧兒，當晚封胸露背，唔鬥心口肉，改同徐子珊（紅衫）、田蕊妮（藍衫）鬥（鞋）踭高。

明刀明槍
呂慧儀同高海寧出力唧肉幫公司拉客，亦成功為自己爭取不少曝光。

忽然一露
胡定欣（右）當晚中空晚裝，南半球乍現，叫人眼前一亮。