假結婚黨攻陷旺角寡佬身價倍升 一年吸金四億
【本報訊】入境處近年嚴厲打擊假結婚，但內地女子做過埠新娘換香港身份證意欲未減，收錢娶假老婆的單身港漢身價水漲船高，由過往不過三萬元，飆升至近期最高九萬元。《蘋果》直擊假結婚黨集中的旺角區，發現中介「媒人」生意應接不暇，「相睇」內地女子隨傳隨到，更出現爭奪港男情況。有內地公安表示，現時約三分之一中港婚姻或涉造假，以此推算，假結婚集團每年生意額隨時高達四億元。記者：邱錦綉、吳子葵、林熊、黃江奇
揭開報章分類廣告，涉假結婚的多不勝數。記者日前致電查詢，表明「等錢用」，接洽人王太即約記者翌日中午到旺角見面。當日下午，王太與男拍檔帶記者到銀行中心附近的美心快餐，甫坐下，記者發現身邊有不少假結婚中介人，懷疑他們屬同一夥人。他們叫應徵者做「腳」，當了解記者基本資料後，便各自打電話給合適的內地女子，亦即他們口中的「老闆」。「係呀，隻腳喺度，收你三萬五，過嚟望吓」一名鄉音極濃的中介人細聲說。「唔係收四萬二咩？」另一名中介人在質疑。
放大圖片 
等候假結婚的內地女子在附近街頭等候「相睇」。
放大圖片 
一名持雙程證來港的內地女子在中介人安排下「相睇」。
五年內分段收錢
王太的拍檔不想收「老闆」的價錢被「腳」聽到，即時叫停他們，頓一頓後才跟記者開價。「結婚嗰日收萬五，之後三年每年返大陸一次，每次收五千，女仔嚟咗香港就可以離婚，再收二萬」。假如中介人收「老闆」三萬，然後支付萬五予記者作首期，即中間抽水「萬五」元。王太的拍檔說，約四至五年便可以完成整個假結婚過程，記者合共可收五萬元，中間和尾數會由「老婆」支付，他們不參與。記者問他為何不是廣告中說的九萬，他即解釋︰「要睇情況，如果你有物業，咁可以叫高啲價，因為容易啲申請個女仔落嚟。」
揀啱即上律師樓
稍後，王太與另一名男子到餐廳外「接老闆」，記者見四名內地女子已在等候，但只有一名中年女子來「相睇」。「佢 35歲，離咗婚，如果冇問題，可以同你一齊去律師樓做寡佬證，跟住排期， 12月 3號就可以註冊」。此時，一名中年漢突然坐下，仔細端詳記者。「佢個妺係老闆嚟， 29歲，佢叫哥哥睇吓你個樣啫」王太即時解釋，並將「哥哥」手上的證件攤開，讓記者看看「妹妹」的樣貌。記者這時才知道原來有不少「老闆」在附近徘徊等「相睇」。「你有冇帶身份證、回鄉卡同住址證明，唔好諗咁多，十幾日後就有錢收啦！」王太不斷催促，記者則說擔心離婚後對方要分身家，王太即哈哈大笑︰「人哋好有錢㗎！」記者表示要考慮，王太即致電另一個 45歲的「腳」，說：「老闆喺度，正㗎，個樣得㗎！大波腳長， 35歲。」記者發現該集團甚具規模，分工清晰，王太負責與「腳」接洽，身旁六至七名拍檔負責招呼「老闆」及睇水。他們主要在銀行中心一帶搵食，是因為附近有不少律師樓，方便等候「相睇」的自由行「老闆」揀啱「腳」即辦手續。統計處數字顯示，過去五年平均每年有約 2.4萬宗中港婚姻（在港結婚或申領單身證明書個案）。有熟悉情況的內地公安人員指，每年約有三分之一中港婚姻或涉假結婚，以每宗個案涉款 5萬計算，每年假結婚集團的生意額或高達四億元。入境處表示，今年截至 10月共成功檢控超過 1,000名涉及假結婚人士，尚有 2,000宗個案待處理，該處已成立專案小組偵查及打擊，例如問話及搜查居所。根據法例，任何人士干犯串謀欺騙罪，最高可判監禁 14年。 
一名假結婚中介人在旺角街頭聯絡「相睇」雙方，手中三個手機響個不停。林熊攝
噩夢纏繞港男假結婚一身蟻
現年 28歲的阿明，六年前因為想租下一間套房而跟內地女子假結婚，噩夢纏繞至今。「嗰時離家出走，冇朋友肯收留，要住露宿者之家，嗰度環境好差，自己好想有個竇，有宿友話同人假結婚可以賺到一萬蚊，夠我租房有餘」阿明說。該名宿友原來是假結婚集團的中介人，阿明為早日實現「有個竇」的願望，便答應他。沒多久，該中介人帶他到婚姻登記處，一名不到 20歲的內地女子和父母站在一旁等候，雙方「認識」了一會，便入內註冊。「簽完紙後，個中間人玩失蹤，我一毫都收唔到，後來先知佢俾人拉咗去坐監，連集團主腦都好似出事，自己先識驚」。
另有真愛不敢求婚 放大圖片 
阿明「假老婆」在港的阿姨，被指找私家偵探尋找阿明下落，但她否認。
阿明怕入境處追查到自己，想盡快離婚，卻連一萬幾千的律師費也無法支付，申請法援又怕被人揭發是假結婚，結果搞到精神崩潰。「最驚入境處啲人走去父母屋企問話，佢哋根本唔知我同人假結婚！自己成日亂諗嘢，好怕坐監，總之好大壓力，啲朋友話我黐咗線，帶我去睇醫生，食完啲藥變到懵懵哋，剩係識瞓覺」。後來他認識了一名單親媽媽，在她鼓勵下找到一份清潔工作，還儲夠錢租了這間套房。他承認自己已愛上對方，但礙於自己「已婚」，一直不敢求婚，擔心拖下去這段戀愛亦保不住。沒想到，早前一個中午，一名私家偵探找上阿明，告訴他內地的「老婆」正在找他。「佢帶我去見一個女人，原來佢係『老婆』喺香港嘅阿姨，佢話花咗兩萬蚊請私家偵探搵我」。該名阿姨要求阿明跟她一起返回內地和「老婆」見面夾口供，再到公安局辦理單程證。「佢嚇我話洗濕咗個頭，如果唔搞埋啲手尾，啲官問起話上嚟，大家都要坐監」阿明惟有就範。「之後佢寫低資料要我背，好似老婆住喺邊，佢父母叫乜名等，話隨時有人打電話問話，搞到我精神好緊張。我唔知仲要捱幾耐！」《蘋果》記者 
拿着「假老婆」資料的阿明說，六年前假結婚後弄至一身蟻，現找到真愛亦無法結婚。吳子葵攝
每日一單「尋夫尋妻」私家偵探生意旺
入境處近年嚴打假結婚，不斷抽查中港夫妻，甚至突擊搜查住所，令原本各不相識的「假夫妻」，要急忙尋回另一半了解背景，私家偵探由此而來的尋人生意大旺。私家偵探張大偉說，最近兩年幾乎每天都接到一單「尋夫」或「尋妻」的生意，當中以福建、湖南和廣東韶關女子尋港夫的個案最多。「佢哋淨係知道老公個名同身份證號碼，住邊、做乜，樣樣唔知，連一張相都冇，佢哋唔講我都估到係假結婚。呢啲個案好難做，搵到機會只係百分之三十」。
成功尋人收六千元
張說兩個月內若成功尋人，便會收客人 6,000元，找不到就只收一半。律師黃國桐指出，內地配偶一旦申請單程證，便是入境處展開調查的時候，即使「配偶」獲發單程證到港，之後離婚，入境處仍會進行離婚覆查，任何時候都可以被起訴，刑責跟足一世。「就算冇事，但離婚時分分鐘同你分身家。有啲搵唔返『配偶』嘅，要搵律師幫你查移民局，又要登報紙尋人，再向法庭申請代派票通知書，程序好繁複，收費肯定過萬蚊，得不償失」黃說。《蘋果》記者
留言列表
{{ article.title }}
