新婚陳小春　踢爆阮兆祥秘婚 face週刊 182期－娛樂八掛大放送★

陳小春與應采兒搵嚟阮兆祥當婚禮司儀和扮律師主持證婚儀式，點知一個唔該踢爆咗祥仔結婚，真係夠晒贈興。"
大發現
新婚小春　踢爆阮兆祥秘婚
2010年11月17日
相戀四年嘅陳小春與應采兒，今年情人節於拉斯維加斯終成正果註冊結婚，上週六（ 13日）更在香港迪士尼樂園酒店豪使百萬補辦婚宴，筵開 52席宴請圈內外好友。
二人邀請「福祿壽」之一阮兆祥（祥仔）擔任婚禮 MC兼監禮人。好識搞氣氛嘅祥仔仲祝福新人︰「希望你哋好似我個名『阮兆祥』咁，長長久久﹗」
婚宴當日，祥仔女友 Crystal冇影，但婚宴座位名單就以阮兆祥「太太」稱呼祥仔拍拖 10年嘅圈外女友 Crystal。唔覺意爆咗祥仔已婚，祥仔笑住詐傻：「應該係打錯咗！」
互動片段

直擊小春采兒童話婚禮

43歲阮兆祥因外形圓碌碌夠親民，所以一直多桃花，除咗曾與黎瑞恩拍拖，亦有跟梅小惠及陳彥行傳緋聞。
愛得低調嘅祥仔上年 11月被拍到與女友 Crystal繑住手行街食飯，二人仲共同育有愛犬，生活一早已經似老夫老妻。

祥仔於本週一（ 15日）出席活動時，對於 Crystal的老婆身後被曝光，一直表現受落，仲一改之前唔會結婚嘅口風，放聲氣話恨結婚添。

座位表爆已婚
不過祥仔自 00年跟圈外女友 Crystal拍拖，便開始修心養性。雖然上年曾傳出何麗全侄女介入，都動搖唔到 Crystal正印地位。今年祥仔憑扮嘢節目《荃加福祿壽》再度彈起，添食拍劇集兼踩埋上紅館，愈做愈 hit。但祥仔就一直未肯公開講會娶 Crystal做老婆。
之不過上週六「陳丁婚宴」賓客座位表上，「唔覺意」稱呼 Crystal做「阮兆祥太太」，驚爆祥仔已經秘密結婚。而據有份出席嘅賓客透露，當日 Crystal並冇出席。
座位表穿煲
據場內嘅賓客座位表顯示，即使如田蕊妮般「有名有姓」，大會都稱為「杜汶澤太太」；而情侶關係嘅賓客亦直接稱為「 XX女友」， Crystal被嗌「阮兆祥太太」，證明佢哋已經結咗婚喎，唔似祥仔口中「打錯咗」囉！

祥仔：我想結婚
本週一（ 15日），本刊追問祥仔秘婚一事，佢笑住咁話：「佢（ Crystal）係女朋友啫。（但係名單上稱 Crystal做你太太喎？）應該係打錯咗，我都想結婚 o架……」潮流興公開喎！
美女與野獸
43歲嘅陳小春與 27歲嘅應采兒（原名丁文），相識 6年直至 07年撻着。起初不被睇好，而應采兒亦於訪問維護小春，情願佢一早「玩過、花過、壞過、曳過」，但對佢孝順雙親而深受感動，呢對「美女與野獸」組合選擇於迪士尼完婚，亦夠晒適合。

古惑夫婦
婚禮當日早上玩完接新娘，身穿傳統嫁衣嘅應采兒唔顧儀態，嫁雞隨雞，與小春一齊踎街擔煙扮古惑仔夫婦。

戒指轉色
小春話因為佢哋在美國註冊嘅結婚戒指係銀色（小圖），於是專登再買一對新嘅金戒指紀念呢日喺香港結婚。新娘中指亦多咗隻約 2卡心形訂婚戒，小春都好揼本喎。

小春和采兒於今年 2月 14日（年初一）在美國賭城拉斯維加斯註冊結婚，當時在場見證的藝人只有證婚人曾志偉、向華強夫婦及鍾鎮濤等。

阿澤爛 gag
與小春相交十幾年嘅杜汶澤，於晚上婚宴擔任 MC，於台上搞盡爛 gag都反應一般，佢話：「因為要顧全大局，所以玩得未盡興。但作為兄弟，終於睇住小春呢個浪子被個惡女人治到佢，已經好好笑啦！」

播片喊晒
全場最感動位係播出二人童年片段和相識經過，小春上台多謝屋企人和兄弟時喪喊，感觸過新娘。

大玩懷舊
小春與采兒搵嚟攝影師朋友徐永明為婚禮拍攝一輯以 50、 60年代為主題嘅懷舊造型，又扮民國 look又扮紅衛兵仲有水手裝，夠晒搞鬼。
採訪、撰文、攝影：娛樂組