傳 Neway 大少 18歲澳洲結婚　陳法拉懵變第三者 face週刊 182期－娛樂八掛大放送★

雖然有傳大少結過又離過婚，不過都係前事啫，筍盤又邊使怕二手貨先！"
結兩次
傳 Neway大少 18歲澳洲結婚　陳法拉懵變第三者
2010年11月17日
無綫台慶劇《義海豪情》大熱，劇中飾演患心漏病的陳法拉楚楚可憐受歡迎，佢同黃浩然有情有義但又唔知幾時開花結果，觀眾睇到戥佢心急。
不過 28歲嘅法拉現實早有 32歲 Neway大少薛世恆做伴侶，兩人更在 08年於美國秘密註冊，法拉薛大新抱地位穩陣，但本刊卻得悉，有傳薛世恆 18歲留學澳洲時，曾瞞住薛父母，與名叫 YoYo的同校師妹結婚，直至 07年大少與法拉撻着，才正式與 YoYo斬纜，搞到法拉懵盛盛做「第三者」。
雖然據傳大少仲有畀錢供養前妻，不過前度啫，大少家陣專心錫法拉咪得囉！
陳法拉同 Neway大公子薛世恆戀情雖低調，但外界早已認定佢哋係金童玉女，年頭更指佢哋已在 08年於美國秘密結婚，薛大少奶地位，打風都打唔甩。
傳澳洲瞞婚
確實薛大少平日唔蒲超老正，但有傳薛大少 18歲留學澳洲時，曾經跟同校女友結過婚。知情者透露：「 Daniel 18歲讀緊新南威爾斯大學修電腦時，識咗同校港女 YoYo，同聲同氣加上對方又幾靚女，所以一撻即着，後生仔女愛得激烈，佢哋一齊冇耐，就瞞住薛父薛母喺當地結埋婚！」
據傳向來家教甚嚴嘅薛父薛母，知道薛世恆求學期間私下結婚曾大感不滿，知情者續說：「薛父知道好激氣，仲一怒之下實行財政封鎖，除咗基本生活費，其他開支一律冇得傾，希望令佢明白做乜嘢都要自己負責任，但自從畢業後， Daniel返香港工作， YoYo亦跟住大少返嚟，不過日子愈耐，兩個關係愈嚟愈疏，之後聽講仲離咗婚；不過 Daniel好有情義，繼續有支付 YoYo同佢屋企人生活費。」

經濟封鎖
薛世恆 18歲澳洲留學時認識當時女友 YoYo，二人打得火熱，仲傳極速私下結婚，薛父知道後嬲到爆，立刻作出經濟封鎖，十足釣魚台中日關係企到硬。

主動出擊
陳法拉 06年喺一次朋友唱 K活動中認識薛世恆，當時薛公子對法拉一見鍾情，可惜法拉怕醜超被動，又怕薛大少係花花公子，最後薛大少以行動證明係乖乖仔，成功追到法拉。

K局邂逅
至 07年，薛大少喺一 K局認識法拉後，更有傳他斷舊情再力追法拉，知情者續說：「嗰時法拉啱啱選完華姐， Daniel喺個 K局中識法拉嘅，聽講當時 Daniel同前妻感情已經好淡，既然佢決定追法拉咯，咪同前妻搞離婚囉！」但據傳 Daniel離婚再追法拉，更有傳兩人在 08年於美國拉埋，再次令薛父動怒，遂決定將 Neway生意交由諸葛梓岐男友、二少薛嘉麟主理。
週日（ 14日）本刊就大少曾結婚傳聞詢問薛父薛濟傑，但薛父一聽 YoYo名字便臉帶怒容一言不發，至於法拉週一（ 15日）截稿前仍未回覆。

稟告結婚
去年 6月，本刊影到陳法拉孖住薛世恆入電視城餐廳高調撐枱腳，據知當日就係法拉帶埋老公向樂易玲報告婚訊。

波子氹女
本來薛大少同二少（薛嘉麟）夾錢買 130萬波子氹爸爸開心，但新車未落地，就俾大少揸咗接法拉出巡，薛父知道又一肚氣，誤會法拉放料畀傳媒出風頭，報道出街翌日薛父仲車牌都換埋。《蘋果日報》圖片

薛父黑面
週日（ 14日），本刊搵薛父回應就大公子 18歲是否結過婚，佢一聽到就即時黑面走人，其實薛父應該開心，大公子搵到法拉咁乖新抱，前事不計啦！

大少低調
今年 7月薛大少成立星煥國際，陳法拉（右一）係其中一位加盟藝人，擺明力谷佢出碟，不過記招當日，薛大少避嫌冇出席。《蘋果日報》圖片

薛大少有法拉女友，二少都唔輸蝕有諸葛梓岐，不過對方就光明正大得多，不時公開孖住晒恩愛，對於未來叔仔結過婚，諸葛就話：「我唔講人哋啲嘢啦，你問番佢哋啦！」

人妻洗底
法拉拍劇試過挑戰電視尺度，三點式俾郭政鴻推油同除衫晒 bra，不過為打好薛家大少奶份工，法拉已積極洗底，除咗拍《公主嫁到》時要求同馬國明嘴對嘴戲改為冇睇頭錫面場面，《義海》更變短髮清純仔，雖然高登仔冇晒遐想，但法拉誠意薛家有眼睇！

'07︰水着推油
07年法拉拍《師奶兵團》時着住三點式比郭政鴻推油一幕，成為唔少高登仔 wallpaper，連對手郭政鴻都話超尷尬。

'09︰除衫晒 bra
拍《有營煮婦》時，飾演記者妹嘅法拉就有一幕除衫晒 bra鏡頭，網友又將片段造成動畫，放上網狂煲。

'10 8月︰改錫面珠
搞笑劇《公主嫁到》中，法拉同馬明有場嘴對嘴戲，對法拉本來冇難度，但有傳佢怕薛家唔高興，主動要求改為咀面珠。《壹週刊》圖片

'10 11月︰扮純潔仔
台慶劇《義海豪情》，靚女法拉在戲中段要扮短髮男仔頭，以往女神 look冇晒，不過成功保住純殼。《蘋果日報》圖片