女星爭電懷舊大波浪　張曼玉勁娘　關之琳之之索爆忽然1周 798期－娛樂八掛大放送★

張曼玉劉海出事
「張曼玉個波浪太過鬈，佢仲要將啲波浪梳散晒，搞到好高好爆炸，令到個人太成熟。加上佢前面既劉海又扁又鬈，個造型即刻變得好老套。佢只要將個劉海分界，已經可以前衛啲。」"
明星髮廊
女星爭電懷舊大波浪　曼玉勁娘　之之索爆
2010年11月12日
今季秋冬流行復古大波浪髮型，最近無論大美人關之琳、阿姐汪明荃都爭住電鬈髮，散發古典女星味道。
但鬈髮好易令人變娘，本刊找來曾任張國榮、梁朝偉御用髮型師的 Marek評下邊個電得最靚。結果一向以型見稱嘅張曼玉竟然輸俾之之，令人大跌眼鏡！睇完復古大波浪髮型，仲有星級髮型師 Boffy介紹今季勁 hit紳士頭。
關之琳古典美人
「之之個髮型長度啱啱好，而且鬈度亦都好恰當，唔會太鬈太誇張。佢識得將個頭中間分界，又喺髮尾輕輕一卷，令佢好有古典美人味道。」

王菲夠新潮
「王菲呢個髮型襯喺佢身上，即刻新潮咗好多，雖然佢同之之嘅髮型亦都係中間分界，不過阿菲嘅波浪比之之大，而個劉海亦都令佢後生唔少，感覺上比之之型。」

劉嘉玲老咗汪阿姐 young晒
「嘉玲同汪阿姐個髮型都係分側面界，不過兩個都係太短。嘉玲因為太鬈，所以顯得老咗。反而汪阿姐側邊分界露埋個額頭，仲後生咗，有驚喜。」

李美鳳夠優雅
「李美鳳個髮型其實有啲娘，不過因為佢本身五官好靚，而且個妝亦都好襯個髮型，令佢散發優雅嘅女人味。」

男人都鬈得
周柏豪型過陳柏宇
「周柏豪同陳柏宇嘅髮型都好相似，不過柏豪就 handle得好啲，因為佢本身面形好修長，額頭同鼻樑比例都好好。陳柏宇因為面形較瘦削，電呢個頭變咗上闊下窄，出嚟效果好奇怪。」

Eason襯鬈毛
「 Eason個面形本身有少少肥，但就因為呢個髮型，反而令佢塊面瘦咗 sharp咗，整個頭形都合乎比例。」
Marek教電復古大波貼士
星級髮型師溫有成 Marek是 Kim Robinson愛徒，曾為多位紅星如梁朝偉、陳慧琳、關之琳、劉嘉玲等設計髮型， Marek現與 Kim Robinson於中環開設「 kr+ Ready to wear Hair髮廊」。周嘉玲、錢慧儀、雷林靜怡都是他的長期客仔。
Marek表示，今年女士髮型回歸 70-80年代大波浪造型，不過要有些少改良，「以前大波浪髮型都會比較長同大幅，不過近期流行嘅改良版本會比較短，長度介乎腮骨以下肩膊頭以上，而且要電大波浪，最好有少少直，形成垂直波浪紋。如果再電細波蛇仔紋，或者前排『 o靚模』好流行嘅一把長鬈金髮，就會好娘好 out。要 keep住髮型，記住洗完頭唔好梳，用手撥下得喇。呢個髮型唔啱頭細面尖嘅人，面圓嘅人反而可以遮面，睇落去瘦啲。！」
今季流行嘅大波浪髮型係改良自 70年代美國電視劇《神探俏嬌娃》女星花拉科茜髮型，不過變奏版較短。

近期有唔少外國時裝雜誌紛紛為模特兒換上大波浪髮型，不過造型會較誇張，未必個個適合。

劉華城城力撐紳士頭
除了復古大波浪，張栢芝、劉嘉玲御用髮型師 Boffy表示今季亦勁 hit紳士 all back頭，「前排好受男士歡迎嘅『飛輪海』頭，或者『陳冠希摷亂頭』今季都 out咗，今季將會流行 all back紳士頭，劉華、郭富城近期都經常梳呢個頭。呢個髮型嘅重點係用大量啫喱膏，分側面界向後梳，令頭髮貼服整齊，營造出令立立嘅效果，不過千祈唔好 gel到好似賭神咁唔分界，會好娘！」

劉華斯文
劉華最近喺新歌 MV扮完差里卓別靈後，就開始就梳呢個紳士頭，令本來官仔骨骨嘅佢更斯文靚仔。

城城型仔
城城不嬲都夠晒男人味，所以佢無論着便服定西裝，襯起紳士頭都咁好睇。

容祖兒有中性美
Joey前排出席演唱會記招時就梳起一個紳士頭，配合鮮紅色嘅唇膏，令 Joey成個 look好整齊之餘，亦帶點中性美。

劉嘉玲唔夾
嘉玲除咗潮玩大波浪外，亦曾以 all back頭示人，不過明顯與一身鑽飾格格不入。

Sammi cool爆
一向都有型有格嘅 Sammi以鮮紅唇 Smokey eye襯 all back頭，令造型格外冷酷。

Boffy說：「男女都適合 all back頭，大前提係襯番服裝同化妝。女士化妝可以誇張啲，造型可以妖冶啲；男士最好就着整齊嘅名牌西裝，再配襯番少少誇張色調嘅服飾，好似 shocking pink同 electric blue嘅鞋或飾物就最好。」
今季有唔少男裝大牌子搞花生騷，男模都以紳士頭配西裝。

除咗高級男裝外，外國女裝近來亦都喜愛以貼服 all back頭為模特兒造型。