以 US$199（約 HK$1,550）開售嘅 Google Nexus 7，即時掀起細尺寸 tablet熱潮。

CLOSE-UP

五大回顧

2013年01月03日 ~~ 第1191期香港《壹周刊》

有人話，上年係「換屆年」，無論港台大陸美日韓，同埋幾個歐盟大國都換領導人，夾啱晒 timing。
數碼產品同樣換屆， Windows 7變 Windows 8、十吋 tablet變細、 3G變 4G、 MSN變微信……明明前年仲係紅爆產品，踏入一二年變籮底橙，追 products追死人。
領導人換屆可以做番三五七年， gadgets肯定冇咁長命。雖然長線睇唔清，但中短線走勢尚算明朗，唔好入錯貨。

第一位　玩細尺寸

夠膽違背 Steve Jobs祖訓，將 iPad縮細成 7.9吋 iPad Mini，結果真係大賣，你可能會質疑只係掛住 Apple牌頭先會搶手，但唔好忘記，仲有部賣到開巷嘅 Google Nexus 7，足證細吋數係 tablet新方向，仲用十吋 tablet， out晒！

仲會 hit幾耐？
兩部機走勢凌厲， Google、 Acer亦傳聞會出只售 99美元（約 HK$770）嘅七吋 tablet，一旦成事，肯定有排 hit！

第二位　平玩全片幅

DSLR同埋 snapshot DC
均配備全片幅感光元件， full frame時代正式開始。

上年 Canon同 Nikon一齊「造市」，推冧全片幅相機價位， Nikon D600淨機賣$18,800， Canon EOS 6D淨機更只賣$15,980，比以前平足五成有多；最癲要數 Sony RX-1，將全片幅玩到落 snapshot DC。

仲會 hit幾耐？
Sony喺上年九月 Photokina相機展漏口風，話 2013年落力搞全片幅 NEX換鏡相機，加上早前同 Olympus達成合作協議， Olympus大有機會出埋全片幅機，引發新一輪減價戰！

第三位　 4G殺到

上年最 hit話題之一，係 SmarTone符碌扑中用 1800MHz頻譜發展 4G，成為唯一被 Apple承認用到 iPhone 5 4G網絡嘅香港電訊商。

香港六間電訊商上年先後推出 4G，理論速度高達 100Mbps，比 3G快幾倍，最正係今年會有大量配備高清芒手機推出， 4G終於大派用場，以後出街睇高清片，唔怕再窒窒吓。

仲會 hit幾耐？
5G技術剛起步，最快要 2020年先面世，跟住幾年依然係 4G天下。

第四位　 Windows升呢

力谷 Windows 8，微軟更一反常態出埋平板電腦 Surface，惹嚟唔少硬件商不滿。

摒棄傳統介面， Windows 8變成全觸控操作，開閂機速度更快，用落夠爽！最筍係用$319就可以升級新系統，難怪推出一個月後，已賣出四千萬套。

仲會 hit幾耐？
Windows系統全球市佔率高達 83%，強如 Apple都無法改變「慣性收視」，下一代 Windows推出前，無可避免一定要用 Windows 8。

第五位　微信大熱

上年進軍香港，搵 Big Four做代言人，落重本。

直迫三億用家嘅微信，上年下半年進軍香港，慢慢開始追上 WhatsApp，成為本地熱門 chat app，最正連字都唔使打，錄段音就可以 send俾人。

仲會 hit幾耐？
老老實實， app壽命唔夠 gadgets長，但市值超越 Facebook嘅騰訊，早年推出 QQ已儲落七億用戶，一直冇人能打破壟斷，而家微信個勢仲好過 QQ，怕且冇咁快會 out！

還看今年

除咗五大，上年亦有其他差少少就上榜嘅「大事」，隨時今年大發圍。

Nokia重生

Nokia副總裁 Kevin Shields示範戴住手套，照樣可以㩒 Lumia 920個芒。

硬件規格強勁，兼且有個 PureView靚相機， Nokia終於有部似樣翻身作， Lumia 920推出後大獲好評算爭番啖氣。當然全年埋單， Samsung GALAXY大軍贏晒， S III及 Note II熱賣，成功將 iPhone舊客收歸旗下，韓 phone大勝！

仲會 hit幾耐？
手機週期短，新機一出，舊機就冇人記得，最想睇 Nokia下部機保唔保持到水準，抑或只係虛火曇花一現。

全上雲端

隨時用手機就可以 upload嘢上 Dropbox，仲使乜用記憶卡或者硬碟做備份。

以前就話驚唔見 USB手指會洩密，而家所有嘢掟上雲端，手指都慳番！ Apple大力推 iCloud應記一功，不過 Dropbox等網上硬碟狂送免費容量，亦都加速雲端 hit爆。

仲會 hit幾耐？
唔使錢又方便，諗唔到理由會 out。

國產平霸

Meizu大大間鋪開喺旺角西洋菜街，新機開賣時仲出現過人龍，唔係 iPhone先有人排隊炒㗎！

鍾意名牌會搶 iPhone，但真正講究功能同價錢嘅人，近年已轉投國產手機懷抱，當中 Meizu、小米及華為做得最出色，兩、三千蚊有部四核機，造工同埋機能仲要唔差，邊度搵？

仲會 hit幾耐？
平價機長賣長有，除非 iPhone肯出平價機， Google平機嚟到香港又真正平賣，否則國產手機永遠不死。