米白色上衣售價待定 COS
深藍色西裝外套$8,590 3.1 Phillip Lim
黑色皮革長褲售價待定 Costume Natimal
金色高跟鞋 Editor’s Own
Cover Story
無味人生 吳君如
2013年01月03日 ~~ 第1191期 香港《壹周刊》
娛圈女星，哪管幕前崗位是正印花旦還是搞笑丑角，為了靚為了上鏡，減肥遂成為求存目標，五臟未嘗一刻半滿溫飽。
二度冧莊獲得「十大傑出衣著人士大獎」的吳君如， 2013年大計，便是由現時的 104磅，減至 100磅齊頭數字的目標進發。
「哈哈哈，我依家成日同人講笑話志願做政府工，考機動部隊！」
一年內二度相見，一次比一次纖瘦，著細碼衫都要加夾至扣得實的君如，貫徹搞笑人生，將減肥背後痛苦全付諸嘻嘻哈哈談笑之中。
「我依家每晚發夢都夢見打邊爐食雞髀呀！」
不是說夢境正正是心理的反映嗎？現實是無味人生，早晚吃的盡是謝絕油鹽糖等一切調味，清心寡「肉」的烚菜、烚雞肉和兩隻蛋白，連劏雞都唔知有冇力，卻仍要天天付出汗水勞力日日做運動。
「我的志願是減磅成功後，叫陳可辛幫我影張標準 model黑白相，即是要 show到兩邊肋骨那種，私家珍藏。」
厲行減磅，以為打落門牙和血吞，是因為不辱獲獎使命，打爛傑出衣著的金漆招牌，怎知說穿了，背後原因卻涉及中年危機。
「我識陳可辛的時候，冧把已經由三轉四，他大我三年，大家一把年紀個女先得 6歲，唔到我唔諗。」
一語道盡幾許晚婚遲生後趕上尾班車的父母殘酷哀歌。
一切由衣衫開始
黑色飾皮草上衣售價待定
Neil Barret from Lane Crawford
金色半截裙售價待定 Lanvin
吳君如有一經典金句：「世上沒有醜女人，只有懶女人。」
由那些年在《霸王花》、《賭聖》、《家有喜事》做盡下把，然後一步步、一吋吋的以身演活丑女大翻身傳奇，由減肥血淚以至傑出衣著，凡此種種，一直為港女們所津津樂道。
「我爸爸做這行，媽咪又好貪靚，耳濡耳染，一定有影響。記得七十年代好興著家庭裝，一塊花布就已經做晒全家人包括埋兩個細佬的衣服，但屋企得我一粒女，媽咪又錫，所以根本唔使諗，買衫一定買俾我。阿媽最厲害地方，雖然著衫好師奶勁喜歡著 bling bling衫加窄身褲，然而買衫俾我方面品味卻往往是兩回事，記得有年她去法國旅行，買了件藍色恤衫給我做手信，那隻藍色，我鍾意到不得了。
「到了 14歲，我擁有人生第一筆利是錢，總數 800元——大嗱嗱 800元，在當年，已經不得之了，可以買到好多好多嘢，而我竟在 Walter Ma金巴利道間鋪花掉 800元買了一套衫，可知我當時已知道乜嘢叫貪靚。後來謝師宴，我又用零用錢在尖東帝國中心一間專買 Thai Silk的鋪頭，請老闆幫我度身造了套型型哋的飲衫……記憶中，細細個已經對時裝好有自己一套主見。
「後來 18、 19歲出來社會做事，阿媽第一次帶我去英國玩，求阿媽俾我自己留低兩三日。當時真係膽粗粗，身上無乜多餘錢，住了兩晚好差只需五十鎊的酒店，其餘的，大部分用來買了一對 Versace boots。那時好興著 Versace，我雖然都貪慕虛榮，但亦俾我有本事在芸芸當中揀到對最唔 loud、最唔似 Versace、個款仲有少少 classic的 boots，如果對 boots無丟到，我覺得今時今日絕對可以著得番。
「從事件當中亦睇得出我買嘢並非為 show off，要好有嘢好暴發地話俾全世界知呢件嘢有幾貴。我記得除了買 boots，那次英國之旅仲買到成喼時裝雜誌，一直都唔捨得丟， so far我屋企的時裝雜誌書量總和，真係拍得住一個美術指導屋企的珍藏。
「每個年代都有自己一套時裝風格，我由七十年代經歷到現在，點會無被巨浪衝擊過。八十年代最恐怖的大膊衫和 oversize大褸，今時今日又興番，陳可辛口口聲聲話憎，我覺得點都有改良有唔同，即使無，著嘅人身材唔同咗年紀唔同咗氣質唔同咗，樣樣加加埋埋，都一定有唔同！正如我，即使將八十年代時興元素通通著上身，亦無可能著得番當年原汁原味的所謂潮流。
「如果你問我當下對時裝的要求，我一定唔會再傾家蕩產只為買一樣嘢，已經過了那種一時衝動的心態。於我而言，著衫風格和品味，是會隨眼光、閱歷、性格、心態和行為有所改變。我不是花旦，一出道就做丑角，既然在電影裡頭已經出盡力有咁 loud得咁 loud，點解連現實生活做人著衫都要咁攰？我寧可追求簡單：做人如是，著衫也如是，買嘢只不過是一種娛樂，尋開心啫，買俾個女，或者陪陳可辛行街買嘢都一樣可以好開心。」
去年的五十大壽
黑色晚裝裙售價待定
Jil Sander from Lane Crawford
是的，吳君如和陳可辛這對伴，即使只欠一紙婚書，在旁觀者的眼中，也早已是老夫老妻了——套用當事人的口吻，是真正的「老夫老妻」，君如早兩個月特別為這位壽星公搞了個五十大壽，宴請親朋，好不熱鬧。
「我好鍾意鼓勵陳可辛買嘢，始終拍戲好大壓力，電影以外，佢冇娛樂，買嘢某程度可以幫助發洩，現階段同佢行街買嘢睇戲食飯係最 enjoy，作為一個伴，由 fashion到生活，多多少少，彼此一定有影響。」
「點解會為陳可辛搞生日 party？事緣我今年生日時，夾都無咁蹺請齊這幾年拍戲好開心經常 keep住聯絡的朋友：古天樂和他的爹哋媽咪、張家輝兩公婆、邱淑貞一家人、杜汶澤田蕊妮、張學友、奚仲文和甄子丹……每個屋企都帶埋仔女出來，老有老玩，嫩有嫩玩，成晚好熱鬧，高興到不得了。
「事後陳可辛問我：到佢 50歲生日係咪都可以搞個咁嘅 party？佢好想請番由 UFO年代開始拍戲認識的朋友出來見面，當中有好耐無見的，有好想見但已經失去聯絡的；不過你知男人好怕被人拒絕，於是我用自己名義幫佢搞；又好好彩，個個都好快覆，本來話嚟唔到嘅，最後都有出席，好似柏安妮、劉偉強……通通有來，高朋滿座，陳可辛不知幾開心。
「作為另一半，我梗有上台講幾句：『陳可辛係一個好難頂、好奄尖、好惡搞、好執着的人，但這些缺點同時亦是優點，如果佢唔係咁執着，未必行到今時今日這個地步。』講完陳可辛即刻上台 complain我：『吳君如從來唔會聽我講嘢，人哋同佢講嘢硬係唔上心！』跟住輪到志偉上台打圓場，佢話：『陳可辛咪少爺囉，全公司都要就佢；吳君如咪老爺囉，結果咪得到兩仔爺咁囉。』好好笑。
「其實佢講嘢我點會唔聽，只不過男人講嘢吟吟尋尋，而我本身性格大剌剌，連朋友都睇得出我倆之間關係：一個情緒化，一個乜都唔理話之你，結果兩個撞埋一齊，又啱數。
「感觸原因，來自老。講真，大家都唔細，搵個理由藉口，有機會聚吓都開心。早 10年，陳可辛心態仲成日覺得自己係小飛俠，長不大，仍後生，打不死；但眨吓眼都 50歲了，好多事邊話得埋？好似我身邊朋友好多都開始有事，呢樣病嗰樣痛，連從來不做運動的陳可辛都俾我感染到。
「無計，去到我哋這個年紀，坐埋一齊一定係研究食乜嘢最健康，食邊隻藥做乜運動對身體最好。點樣將 50歲 keep到似 40歲， 40歲 keep到似 30歲，你估唔辛苦？其他人將時間用去玩，我就將時間用來死做爛做運動， train好副偈，無非想令自己 keep得後生啲，這些全部都要付出代價，尤其，當你仲有個 6歲小朋友要照顧，更加望自己可以活得長命，望多個女兩眼。」
上一世的情人
黑色百褶無袖上衣$8,995 Maison Martin Margiela
黑色皮草腰帶$1,295 Christopher Kane
紅色長褲$5,995 Maison Martin Margiela
All from Maria Luisa
常言道：女兒，是父親上一世的情人。
在陳可辛和陳是知這對父女身上，亦靈驗了。
於陳可辛 50歲生日派對上，女兒當眾高歌了一曲《 Happy Birthday》，事後這位身為人父的向傳媒表示，聽完，好冧。
「以前阿女仲係一嚿飯，陳可辛又唔識湊，更不會沖涼餵奶氹小朋友開心；依家個女啱啱開始有少少自己睇法，識得講，會表達，陳可辛開始好縱。有時佢一去拍戲幾日無見，返嚟就話要帶阿女去買玩具。我已經叫陳可辛唔好買，佢話買 Lego，因為可以親子一齊砌，都算！明明同佢兩父女講好只可以買一樣，佢都可以一買就買 10盒 Lego，兩個仲要夾埋話『咪一樣囉，都係 Lego之嘛，無買其他玩具呀！』激死，破壞晒訂好規條，咁縱個女只會令小朋友唔識珍惜。」
好彩陳是知仲細，無趕時尚追潮流物質概念，仲有空間調教。
「弊在陳可辛當個女好似大人咁傾偈呢，佢成日話自己 9歲已經好識嘢，唔同同齡小朋友玩，覺得人哋幼稚。我有時都會問：『唔使咁快催到個女咁成熟呀？』陳可辛成日話：『唔緊要啦，佢係我個女，佢係我個女自然就會咁！』我都唔知係啱定錯。」
感覺，聽落，你一言我一語句句都老夫老妻，為何埋門那一腳，就係唔响張結婚證書上簽埋個名呢？
「點解唔簽名呀？唔……都可以諗吓嘅，你唔講我都唔記得啦！」
無理由，這個問題，咁多年來一定有好多人問過。
「因為我覺得老咗著婚紗好唔靚，所以無諗過要搞 party，所以咪無去再諗囉，反正全香港都認定我哋係一 pair，周街都叫我做陳太。」
既然唔爭在，咪唔爭在好 casual咁簽多個名囉？
「簽埋個名都得，但唔搞婚禮囉，一係等個女齊頭 10歲時簽咗佢，一係就攞兒童身份證時，搵個理由食呢餐。好啦，你既然咁提議，就等我今年有時間認真諗吓啦！」
就簽咗佢啦陳太。 
撰文：趙朗楨
形象：吳夢珊
攝影： Angus Chan
化妝： Midco Chu
髮型： Seiko Sin@Hair Culture
全站熱搜
留言列表
{{ article.title }}
