上週五，純官巡視皇后大道中嘅周大福新鋪時，同記者大談 CY。（于港民攝）

中環人語

純官：我遊行撐 CY！……講笑啫

2013年01月03日 ~~ 第1191期香港《壹周刊》

一月一日遊行反 CY，身為佢頭幾號 fans之一嘅純官，當然要講啲嘢護主；上週五佢巡視旗下周大福業務時，就欣然接受記者嘅提問，仲要字字珠璣……

記：元旦嗰個遊行反 CY，你點睇？
純：我出嚟遊行撐 CY……講吓笑啫！我覺得 CY係希望為香港人做啲嘢出嚟，唔應該未做之前，就已經反對。
記：你唔覺得我哋俾咗好多次機會佢咩？
純：咁佢上任只係幾個月，你未上任已經反，點叫俾機會佢呢？
記：誠信有無問題？
純：誠信當然無問題啦，好相信佢份人，佢能力好得。
記：咁佢有無講大話？
純：我唔知，因為我無了解。
記：有無諗住了解吓？
純：我唔諗住向佢了解，我覺得僭建喺香港真係一件好小兒科嘅嘢。
記：咁講大話係咪小兒科？
純：我唔知佢有無講大話，都無了解到。
記：點解唔了解？
純：呢啲唔係最關鍵問題，最關鍵佢做嘅嘢係咪真心為香港好，為廣大市民謀福利……（就係咁，呢啲問題 loop咗十幾分鐘，純官先肯離去。）

維港新世界玩晒

除夕煙火由 IFC移師去會展，莫非 2013新世界玩晒乎？（于港民攝）

純官撐 CY唔係得把口，仲身體力行。話說過往除夕煙花（要政治正確，以後改名煙火矣），由新地同恒地科水，不過傳聞舊年捲入貪污案嘅新地，嫌煙花唔老黎，打退堂鼓，要政府墊底，俾班議員鬧到一面屁。今年嘅煙火匯演本來泡湯，好在有純官挺身而出 sponsor，仲將贊助費加碼到一千二百萬，當中由新世界負責一半，另一半由旅發局俾。今年新地嘅 ICC同 IFC梗係無得玩，煙火效果移師到新世界嘅會展，而同系嘅 K11頂樓都有雷射燈光，互相輝映，維港兩岸轉由新世界玩晒。咦，以後新地嘅「維港門廊」，會唔會轉手俾新世界呢又？

Give me a break

中環高消費，大家樂燒味飯都要$30無嘢飲。喺士丹利街皇后中心嘅蛇竇「老地方」都加晒價，快餐連餐飲要$31。小宗行遍中環，同大家另覓平霸午餐，首推租庇利街萬安大廈的香港洋務工會。呢度表明只招待會員，但只要閣下有工開，交$80入會，就可以享用$26兩餸一湯。食足 365日，入會成本約$0.2一日。呢度地方大，二樓、三樓兩層有三十幾張枱，小宗唔使等就有得坐，正！鍾意食 light啲嘅 OL，可以去鐵行里間福祿壽，專賣齋菜。堂食兩餸飯$30，湯、飯自助任裝，最緊要係零味精，咁樣食飽開工就唔會又渴又眼瞓啦。

洋務工會$26兩餸飯連例湯，餸菜四選二，款式日日唔同，唔要白飯有糯米飯。

齋菜每日有成十三、四款菜式，大家仲可以揀要白飯定紅米飯，夠晒健康。

福祿壽得四張枱，只能坐廿個人。所以大部分識途老馬，都選擇買外賣，因為仲平，$21，飲湯加$3。（于港民攝）

施永青：梁振英好過克林頓

插圖：王健威

最近語不驚人誓不休嘅施永青，對 CY又有妙論。佢同小宗講，話邊個上台做特首，都有反建制的人反對，「因為佢有原罪，香港人憎共產黨，覺得佢係黨員嘛。只要香港一日無普選，一日都會有人反政府。」佢仲話，花時間拉佢落台都無建設性，不過最正都係以下呢句：「僭建依啲係小問題，相對於克林頓搞完萊溫斯基又唔認，佢好好多啦。有邊個政客唔講大話呃你㗎？僭建扯到去誠信問題，睇你咩標準啫。」

中環奇景

中環聖誕大抽獎。禮物係咩？咪就係「那些年」嘅送禮佳品——樂家杏仁糖，成班耆英喺祖庇利街排隊玩夾糖，回到未發時也！（于港民攝）

自編自導自演：「吳長江拗腰」

插圖：王健威

雷士照明（ 2222）創辦人吳長江今年表現「拗腰大法」，五月時突然「被辭職」，與另一股東閻焱展開隔空罵戰，全線員工罷工力撐吳長江，生產徹底停頓，股價由三個幾急插至七毫幾，股民通通嚇到賴尿。點知，大家絕望之際，吳長江突然回朝，股價大升超過一倍，重上兩蚊，吳再於上週將手上超過一成股份賣俾上游公司德豪潤達，成功套現近十億港元，用嚟買入德豪潤達股份。
有知情人士早喺八月就同小宗講，話成件事係吳長江自編自導自演，搞到雷士股價大跌之後，自己就密密吸納，回朝之後會賣股。小宗當時唔信，點知佢真係表演拗腰彈，全世界跌到一地眼鏡碎，峰迴路轉，雷士風波好睇過 TVB劇多多聲！

金牙大狀講嘢
鬍鬚曾吞吞吐吐

曾俊華俾人個假象，好似政府會奉旨增加醫療福利開支。亦得等人知道人助天助乎？（《蘋果日報》圖片）

鬍鬚曾新年網誌指出，人口老化，醫療福利開支勢將增加；如若經濟不前，政府不難長期入不敷支。到其時，捨加稅之外，將要不斷發債云云。
財爺呢個講法只係講咗三分二，剩低三分一冇講到。呢三分一係乜？大家睇吓今日希臘、葡萄牙、意大利等歐洲國家即知之矣。《十誡》冇講過政府必定要永無止境咁增加開支，到咗某個地步，即使想好好照顧年老貧窮長者，亦會陷入巧婦難為無米之炊嘅困境。呢個係乜嘢地步？
好似西班牙咁，經濟不前，而有四分之一工人失業，咁政府點加稅呀？又如希臘，國家破產、國債淪為垃圾，發債又會有人要乎？到咗呢個地步，即使係醫療福利開支又有辦法唔咳咩？
吞吞吐吐，講嘢講得三分二，容乜易俾人個假象，以為政府奉旨會增加醫療福利？亦得等七百萬人知道人助天助，香港人當自強，唔好乜都靠納稅人乎！

中環人語迷你版

利用程序，玩弄中央於股掌。

估中邊個中環人講呢句說話，送你 PNY Lovely Attaché Flower施華洛世奇水晶別注版 USB Flash Drive 4GB一個
有意參加者，請於一月七日 24:00前將答案電郵 mailto:centralman@nextmedia.com
小宗只接受電郵，郵寄免問。

上週人語揭曉

今日都有少少火光嘅。

答案：梁志堅
得獎者： Winnie Kwan
中獎時間： 1:00pm 26/12/12

本刊員工及直系親屬不得參加。
為求公平及杜絕偷步搶答起見，請於星期三下午一時後來電郵競猜答案；在此之前發出之電郵作廢。
超過一位讀者估中，先到先得，恕不接受上訴。
答案及中獎者姓名將於一三年一月十日本欄揭曉。