先達手機鋪每日收埋收埋好多 iPhone 5同 iPad Mini，有時趕唔切要擺過夜，如果先達拉閘後有好多陌生人出入，你估班老細會唔出聲？

IGOSSIP

先達變毒場？

2013年01月03日 ~~ 第1191期香港《壹周刊》

上星期三，旺角先達一樓商場驚爆有毒販以開鋪賣手機為名，暗中賣毒品為實，警方喺鋪入面搜出市值四萬幾蚊嘅可卡因同 K仔，傳媒仲繪影繪聲話場內晚晚開毒 P散貨，搞到場內烏煙瘴氣。

實際係咪咁？問過先達手機鋪老闆同店員，大家都話好誇張，「先達每晚十一點就落大閘閂冷氣，店員雖然可以繼續留喺鋪入面做嘢，但出入一定要登記身份證，啲人買毒品點敢咁明目張膽？」至於喺場內索嘢開 P就更荒謬，「就算保安唔出聲，手機鋪老細同店員都會叫保安趕人啦，鋪入面隨時有幾百部 iPhone、 iPad，講緊至少幾十萬貨，唔怕俾佢哋偷咩！」其實小記都試過為採訪水貨 iPhone，朝早十點就入先達，當時就俾保安「抄牌」，入到鋪前等咗幾分鐘即俾保安趕番出嚟，先達入面開毒 P，唔係好信得過。

Facebook大公無私

Facebook私隱設定複雜到冇朋友，就連曾經做過 Facebook市場總監嘅 Randi，都搞唔清。

好多網民都投訴 Facebook私隱設定複雜，點 set都仲有機會洩密，嬲到震！其實唔使咁嬲，因為就連 CEO Mark Zuckerberg嘅家姐 Randi，都一樣搞唔掂。事緣上星期 Randi同屋企人聚會嗰陣， Randi放咗細妹 Arielle試玩新 app Poke嘅相上 Facebook，諗住自己人先會睇到，點知轉頭竟然俾陌生人 Callie轉放咗上 Twitter，佢即刻嬲到走去 Twitter踩場鬧人唔知喺邊度偷張相番嚟，後尾先發現 Callie原來係佢個妹嘅朋友，雖然 Randi私隱設定咗只有「朋友」先睇得，但因為佢 tag咗 Arielle個名，所以就連細妹嘅朋友都睇到。唔知自己係禍首就走去鬧人，認真面懵。

睇廣告免費打機

遊戲資料會先用幾分鐘時間下載入電腦，所以玩 game時都算流暢，係啲 games舊咗少少啫。

想玩高質素 game又唔想俾錢，邊有咁着數？就算你話而家 iOS同 Android都有好多免費 game，但質素只係麻麻，同埋當中某啲道具始終要俾錢買，唔算真正免費。最近，遊戲開發商 Square Enix就整咗個測試網站「 Core Online」（ beta.coreonline.com）俾玩家免費打機，啲 game仲要係《 Tomb Raider Underworld》（ 08年）同埋《 Hitman》（ 06年）嘅完整版，而且只係開 browser就玩到。當然，免費嘅代價係每玩廿分鐘要焗睇分零鐘廣告，睇完先可以繼續玩，講真分零鐘唔算太長，行開去個廁所飲啖水都夠鐘啦！