由「迷幻飯局」節外生枝變成「掌摑事件」，風波愈鬧愈大，關鍵人物黃浩雖然表面上早已就事件封嘴，但「掌摑事件」另一主角曾志偉，最終於十二月十九日被警方拘捕，本月中須返警署報到；而曾發表「妄想被迫害症」言論的梁烈唯，亦因未有就黃浩發出的律師信要求公開道歉，於十二月廿七日收到法庭傳票。

黃浩始終不肯罷休，有報道指，皆因他獲圈中一神秘富豪願擲八位數字力撐打官司，同時更有指黃於此事上經常對外聲稱有契爺向華民（向氏十三兄弟中排行第十二），甚至向氏整個家族撐腰！

連向家成員亦被捲入有關事件報道中，本刊日前遂跟向華民哥哥向華強（排行第十）妻子陳嵐求證。在圈中向來出名仗義執言的向太，既大罵黃浩令娛樂圈雞犬不寧，更表明會力撐被牽涉入「飯局」及「掌摑」事件中的各藝人。

對於黃浩恃「向」凌弱，向太即怒轟黃：「佢好缺德又周身屎！我忠告佢一句：放人一條生路，等於放自己一條生路呀！」

 

向太不認識黃浩（左），但表示他確是向華民（中）的契仔，「華民講過，如果佢再做咁多衰嘢，就唔會認佢o架啦！」

契爺發火

向家成員因黃浩被捲入「飯局」及「掌摑」風波，本刊日前得悉向太陳嵐於中環Mark Kim髮型屋整理頭髮，遂到訪向她求證。透過助手表明來意後，不平則鳴的向太最終首肯接受本刊獨家專訪。

問到向太可會認識黃浩本人，她不屑地表示：「我唔識佢！呢啲人我點會識啫？不過佢呢輪搞咗咁多周身屎出嚟，我先知佢係乜嘢人囉！眼凸凸o架嘛？係咪？」

對於外界有指，黃浩於此事上不時聲稱有契爺向華民，甚至整個向氏家族撐腰，她氣上心頭：「好多人都問過我，我都有求證過，華民老婆同我講，黃浩係華民嘅契仔，不過華民都講到明，話佢已經short上腦，如果佢再做咁多衰嘢，都唔會認佢o架啦！

向太也有很女性的一面，訪問當天，便在她的iPhone5找出這張相給我們刊登。「幅相係年半前喺個婚宴度畀人影，我好鍾意，影得好靚！」

「華民本身個人咁低調，我唔明白佢（黃浩）嘅用意囉！如果有人諗住契爺係邊個邊個，就唔敢對你點，咁對向家有個唔好嘅影響囉！

「有次食飯，連大伯爺（向氏兄弟的長兄）都問我：『嘩！黃浩係乜嘢人嚟o架？係咪冒充（契仔）o架？咁討厭嘅？』係，我哋向家係大家庭，但都只係普通老百姓，何德何能去照佢呢？一個人安份守己，根本就唔需要人照住！唔好話係我哋向家啦！所以呢，任何市民如果遇到有人話有向氏嘅人照住自己而為非作歹，請立即報警啦！我哋向家係冇資格照住任何人o架！」

 

行為缺德

談及黃浩十一月底忽然聲稱遭勒索，又指擁有藝人於其開設的一品花雕雞的開飯短片，引發起一一年十月徐濠縈等廿三人的生日飯局，被指為「迷幻飯局」，俠義心腸的向太，即皺起眉頭。

「呢件事我好嬲o架！我替我哋娛樂圈呢班手足冤枉呀！喂！如果人哋真係吸毒，你有帶，咪攞出嚟囉！就算真係有片，你咪警告香港市民囉！餐廳房間，點會有camera啫？想做乜嘢啫？咁係咪連廁所都有呀？

「搞咁多事出嚟恰人哋，佢哋好多只係小朋友嚟咋嘛！如果生安白造，話人吸毒，又話Eason老婆同人打茄輪，咁好恐怖呀！會破壞人哋家庭，騷擾到人哋小朋友（康堤）o架！好彩Eason信佢老婆啫，但小朋友嘅學校，可能會覺得個小朋友有個吸毒媽咪，又同人打茄輪，會唔會叫個小朋友唔好再喺度讀呢？佢自己都有仔女o架！有冇諗過後果呢？如果佢咁樣做真係好缺德！」