探熱針
搵食艱難 叛將馬浚偉 平價𢱑撈返無綫
去年九月，馬浚偉暗示被樂易玲打壓，憤而提出解約無 綫後，向外稱在內地搵定路數唔使愁，但自從 2012年初跟佘詩曼、胡軍合作完內地劇《建元風雲》後，至今再無着落，還被葉璇做監製的內地劇《紫釵奇緣》踢出局，就連王維基的香港電視，也嫌他獅子開大口唔吼。無地方落腳，唯有𢱑撈返無綫，搵昔日力撐他的曾勵珍做中間人，兼夾日日在微博擦鞋，名副其實馬死落地行。
撐佢返嚟。（設計對白）
會唔會再投訴？（設計對白）
坐冷板櫈
過去一年，在香港幾乎零曝光的馬浚偉日前出席活動時，自動波幫無綫口，勸林峯留低，不要意氣用事；另外又暗示自己年中會回歸香港拍電視劇，一百八十度轉口風，原來他正部署返娘家拍劇。
當初主動跟無綫結束十八年賓主關係，馬浚偉表示會轉攻內地，不過拍完《建元風雲》後，由於該劇推出時間遙遙無期，加上劇中只是做二幫的他，在國內知名度有限，乏人問津下，幾乎坐足一年冷板櫈。坐食山崩，本來算是無 綫一線小生的他，早前客串商台做節目《一圈圈》嘉賓外，就連酒樓騷都照接，通殺。
「馬仔好驚繼續都係咁，所以主動搵過梅小青，睇下 NOW有冇劇啱佢，又諗緊辦法返娘家，近呢幾個月，佢成日搵住（曾勵）珍姐，話自己好想同 TVB再合作，就算要佢剃頭都唔介意。除咗碼實珍姐，知道梁材遠有新劇開，馬仔都落足鞋油，生日請食飯，仲喺微博自稱養子，叫人哋養父，出晒力同 TVB人打好關係。其實 TVB條數都計得好盡，馬仔要返無綫，得一萬蚊一集，又唔可以揀劇，仲隨時可能係罐頭劇唔會喺香港播，試問邊個演員肯制。」知情者說。
王維基的香港電視簽咗不少無綫人，雖然馬浚偉表示同對方有傾過，不過就冇下文。
工作量大減，馬浚偉連商台主持都肯客串。圖為當日由陳志雲陪住開工。
獅子開大口
馬死落地行，原來有份演出的內地劇《紫釵奇緣》臨時將馬浚偉飛出局，王維基的香港電視又嫌他獅子開大口拒合作，可以落腳地方有限，就算做廉價勞工，亦唯有逆來順受。
「葉璇做監製部劇本來係有搵過佢，但投資方鍾意林峯，佢就冇得做。其實之前王維基 嘅香港電視都同佢傾過合作，但馬仔唔知定，開啲條件嚇親人，要有十幾萬一集，又要有權改劇本，仲要帶埋喺《建元風雲》入面合作過 嘅幾個藝人過檔，例如同佢傳過緋聞 嘅何彥霓，呢件事喺香港電視入面係個大笑話。」知情者說。
求證馬浚偉平價返娘家拍劇，他說：「農曆年之後先落實，至於價錢唔係我考慮範圍，反而係劇本質素同咩人合作最重要。」
未離開 TVB前，馬浚偉跟監製梁材遠合作最多，知道對方開劇，他近數月來在微博氹「養父」開心。
有指馬浚偉力薦跟他傳過緋聞的內地演員何彥霓過檔。
擦梅小青鞋
向無綫𢱑撈外，馬浚偉亦有向過檔 NOW嘅梅小青自薦，更在微博發功大讚梅小青劇本有質素。
擦梁材遠鞋
回心轉意
去年，王維基用銀彈攻勢掀起電視挖角潮，無綫不少藝人決定過檔外，還趁機控訴舊主苛刻，經理人部門揸弗人樂易玲成為眾矢之的。但唔夠一年，部分藝人開始食回頭草。
馬德鐘
借老婆把口鬧爆無綫做死人的馬德鐘，去年中開始改口風，尤其他有份孭飛的《飛虎》大收後，更開晒口話歡迎無綫隨時搵他，不再企硬外闖。
佘詩曼
在無綫做到死，試過全年無休，始決心離巢的一姐佘詩曼，年初拍完《建元風雲》後，未有接拍內地新劇，反而在香港頻頻蒲頭，有指她將會返無綫，跟黃子華合作新劇。 
留言列表
{{ article.title }}
