爛片回顧
2010年埋尾，一系列娛圈大事回顧、頒獎禮等年度結算項目輪住出籠。單睇今年上映嘅華語電影票房，《葉問2》以4,300萬成為香港大阿哥，不過依然有啲電影停滯不前，爛片充斥市面渾水摸魚。不少人前人後都身光頸靚的一線演員，叫座力原來嚇鬼。能夠有本事憑一己之力令電影公司損手爛腳嘅，就係郭富城及楊千嬅，攞硬今年屎帝屎后！攞呢個「獎」，大家睇怕唔使拍掌！
No.1 屎帝 城城僅值8萬
45歲嘅郭富城桃花緣極旺，觀眾緣就差一大截。《白銀帝國》年頭無聲無息在五間戲院上畫，結果開畫票房僅得萬三蚊，開一場十個觀眾都冇，最終埋單收得8萬，搞到拎咗成千萬美金投資嘅郭台銘嘔晒血。
帝國打唔成，暑假城城縮小範圍搞《全城戒備》，扮小丑扮肥佬喊打喊殺，到頭來只係收得340萬。呢個數字唔算嚇人，不過唔好唔記得，城城收緊800萬片酬，唔蝕就奇。
郭富城
《白銀帝國》8萬
《全城戒備》340萬
No.2 屎帝 余文樂黐親都死
余文樂客串兩個鏡頭嘅《精武風雲．陳真》收1,300萬，令丹爺幾千萬票房夢想幻滅。只有幾場戲嘅《童眼》收800萬，不過3D戲飛貴一倍，贏帳面啫！做男配角嘅《劍雨》票房唔夠200萬，古裝大片落得如此境地不如吞劍好過。擺明襯千嬅嘅《志明與春嬌》，口碑點樣傳頌，但做足兩個月700萬都冇。搞咁耐都唔掂，試下驚慄片《荒村公寓》啦，又嚇到院商心慌，收得20萬……哦，個荒村原來係戲院至真。
余文樂
《志明與春嬌》640萬
《荒村公寓》20萬
《精武風雲．陳真》1,370萬
《劍雨》165萬
《童眼3D》（客串）865萬
No.3 屎帝 劉華玩唔起科幻特技
五十歲嘅劉華一口氣開廿場個唱，實力非凡，不過呢段氣勢完全延續唔到落戲院。《未來警察》雷聲大雨點小，港式科幻特技又肉酸。喺威尼斯浸過鹹水嘅《狄仁傑之通天帝國》，特技毋疑略勝一籌，可惜劇本犯駁位搵狄仁傑真人解密都解唔通，套戲熬成個月只掹車邊cover到劉華千萬片酬，唔通真係要對住劉華唱番句「I don't wanna see! Goodbye!」
劉德華
《未來警察》323萬
《狄仁傑之通天帝國》1,180萬
No.1 屎后 千嬅跌下來豁出去
恭喜千嬅覓得有情郎，亦開始戥佢叫座力擔心。回想最風光年華，NG多過演戲嘅《新紮師妹》系列，係咁意收千零二千萬。今年孭飛兩套愛情片《志明與春嬌》同《抱抱俏佳人》，搞足大龍鳳都唔過700萬，嚇到一額汗。不過烈女不怕死，夠薑接拍爛片《財神到》，結果眾望所歸收29萬，絕對係佢嘅小城大件事。
楊千嬅
《財神到》29萬
《志明與春嬌》640萬
《抱抱俏佳人》590萬
No.2 屎后 大S落雨收柴
台灣幫大S喺老鄉捱咗十二年，08年先行運踩入影壇做女主角，《保持通話》大收令片酬升至80萬一套。以為修成正果，點知今年逢戲皆仆，《全城熱戀熱辣辣》睇見就㷫，今年9月上映《龍鳳店》直頭仆直，免費試映都冇人吼。大S都埋街食井水搞掂汪小菲啦，仲唔落雨收柴咩！
大S
《全城熱戀熱辣辣》285萬
《未來警察》323萬
《龍鳳店》80萬
《劍雨》165萬
No.3 屎后 阿嬌翻身無望
經過「淫照風暴」，阿嬌係首位全面復出的女星，《出水芙蓉》套戲擺入雪櫃咁耐，預咗成為炮灰。具備色慾元素嘅《前度》，阿嬌不再扮天真做盡正常女子該做的行為，收到340萬都算飲得杯落，不過相信如果阿嬌喺出事前都有呢種拼搏精神，《前度》有潛質收過千萬。
阿嬌
《出水芙蓉》105萬
《前度》340萬
以小博大
現今電影人北望神州，劇本風格唔啱港人胃口，票房差不足為奇。其實觀眾同少年食神一樣識食，就算冇裝潢嘅好嘢，都會自動波買飛撐，今年就有唔少刀仔鋸大樹的好片。
《歲月神偷》賺成倍
成本只有千二萬，其中350萬係政府基金補貼，電影上畫時夾啱時間攞埋柏林影展最佳影片水晶熊獎，搞到電影愈映愈熱，埋單收咗2,300萬，賺近一倍。
《分手說愛你》爆冷
房祖名同薛凱琪呢對過氣緋聞情侶擔正的《分手說愛你》，唔少鏡頭僅用DV拍攝。七百萬製作，最終收過千萬，行內人副眼鏡碎晒。
全年濕滯導演
2010年爛片氾濫，除了多得幕前一班屎帝屎后落力演繹外，幕後一班功臣都不容忽略，當中羅守耀同王晶兩位導演，對今年影壇「貢獻」，實在功不可沒。
No.1 屎導 羅守耀拍到驚
香港電影人傾盡全力討好國內市場，不過羅守耀導演就繼續自我，一年之內創咗三部低成本兼題材怪雞的爛片。年頭的《滅門》，完全滅絕觀眾入場意欲。3月一部《惡胎》，穿崩位多到令觀眾發惡。年尾一套《殭屍新戰士》票房更慘不忍睹，難怪羅導演拍完《殭》片後話拍到驚，宣布罷拍港片，
觀眾大可放心。
羅守耀
《滅門》256萬
《惡胎》164萬
《殭屍新戰士》132萬
No.2 屎導 王晶拍唔掂
晶哥用咗八個月時間，使咗幾千萬人仔拍套史上最大製作爛片《未來警察》，結果觀眾揀咗喺未來先睇。高科技搞唔掂，晶哥惟有繼續向低俗進發，硬笑料嘅《美麗密令》票房完全唔靚，另外一套《撕票風雲》仲勁，睇完隨時撕戲飛。
王晶
《撕票風雲》285萬
《未來警察》323萬
《美麗密令》480萬
抄得低手
近年國內「山寨」普及化，擴散到各行各業，乜都可以抄。一直倒模好戲嘅華語電影，自然按本子繼續抄，不過就被聰明觀眾一眼睇穿。
舊式笑料
星爺17年前嘅《唐伯虎點秋香》收咗3千幾萬，今年向華勝投資3千萬，搵嚟黃曉明拍續集《四大才子》，可惜戲中依然充斥大量舊式笑料，收咗36萬都叫還得神落。
攞命3D
當荷里活3D電影去到濫拍地步時，華語片先開始偷師，揼咗過億，自稱係史上亞洲首部全片3D電影《3D魔俠傳之唐吉可德》，片名趕客，卡士亦弱到齋得林嘉欣。於是總票房得9萬，成為全球嘅3D電影最低票房。
抄得太遲
07年出版嘅國內職場小說《杜拉拉升職記》熱爆，奈何今年先拍成電影版，抄都要遲過人，兩位主角徐靜蕾（右一）同莫文蔚都費事喺香港宣傳，結果開畫首日得千三蚊，得廿個人俾面。
唓，我咁靚仔都要做屎帝，真係冇天理！（設計對白）
城城犧牲唔少：《白》片剃光頭，《全》片扮肥佬（右圖），但都救唔到票房。
樂仔一年五部，產量驚人，喺《荒》片俾女鬼搞，《劍》片中扮浪子（右圖），但觀眾冇樣buy。
今年劉華孭飛嘅《未》和《狄》（右圖）兩部電影都要打到周身傷，但唔代表博到觀眾入場。
新婚流流，搞埋啲咁嘅嘢！（設計對白）
有丁子高落咗訂，千嬅都唔使接《財》片搞到自己咁驚嚇，但到佢認真拍套《志》片（右圖）又冇人共鳴，兩頭唔到岸。
衰就衰在咁遲先釣得金龜，否則大S又點會喺《龍》呢部爛片剝衫任咀咁慘。
阿嬌在《出》片做純情少女，毫無說服力。
羅導演（右三）搵得周秀娜擔正，當然唔蝕，《惡》就出動假公仔扮周全裸，可惜裸唔贏。
羅導演搵無綫姐仔廖碧兒上大銀幕拍《滅門》，仆直收場。
娜姐在《殭》片玩倒吊漏奶，可惜漏走票房。
《未》同《美》兩套爛片輪住虐待觀眾，難得晶哥夠晒樂觀，宣傳嗰陣鬼咁風騷。
《撕》片有任達華、陳法拉同三哥，卡士尚可接受，但冇人記得。
留言列表
{{ article.title }}
