我得寵：Stephy湊狗如湊B 7,802 
■玩具貴婦犬年糕即場聽從主人鄧麗欣發施號令，輕易做出指定動作。攝影：陳順禎
有多次養狗經驗兼思想傳統的鄧麗欣（Stephy），在照顧愛犬的過程中，學懂如何照顧弱小，盡顯母愛，雖然她未與拍拖多年的方力申拉埋天窗，但她坦言若組織家庭，可能要作出取捨：「一係唔生BB，一係唔再養狗，想付出時間專注一方，唔想另一方被忽略。」
撰文：張俊銘
鄧麗欣的寵物小狗「年糕」，屬toy poodle（玩具貴婦），現年兩歲半，在Stephy家中生活一年多。Stephy表示，年糕十個月大才遇上她被帶回家。Stephy當初想找較年幼的狗，給母親作伴，但找了很久也沒遇上合眼緣，直至見到年糕，Stephy說：「狗場主人話呢隻狗年齡比較大，冇人要佢，只會留喺狗場做繁殖，但我睇咗一眼就好鍾意佢，覺得係緣份，就帶佢返屋企。」
■Stephy和愛犬年糕的相遇，她形容似緣份注定。 愛犬聽教勁黐身
Stephy與年糕接受訪問前後也顯得甚有默契，牠懂得聽主人指令，打圈、彈跳及兩腳走路等照辦，逗得Stephy笑不停。Stephy指toy poodle屬聰明小狗，不用教很長時間就會學懂，她說：「普通嘅指令，坐低、舉手、轉圈，好快學到，我都唔記得點教佢，已經學識。最近教佢行樓梯，發覺佢有樓梯恐懼症，用一日教識佢上落樓梯，雖然落得好慢，但都叫做識。」
Stephy指年糕性格很嗲人，兩歲幾的牠卻依然像BB，Stephy一副冧樣說：「夜晚佢要瞓喺我大髀睇電視，唔會周圍搗亂，冇人喺屋企，佢會喺自己張床度瞓，返到嚟佢會靜靜雞迎接你，真係一隻好乖嘅狗仔。」
■Stephy形容年糕的性格很爛纏，十足小朋友般黐身。
與年糕相處年多，Stephy指愛犬很快融入家庭，但她慨嘆自己經常要到內地工作，與年糕較少時間見，但年糕卻很黐Stephy，似BB經常扭抱，Stephy說：「唔知點解，年糕成日好似好懂事咁，望住我嘅眼神，同我媽咪好似樣，唔知係咪對得我媽咪多，髮型都有啲似，因為我媽咪剪冬菇頭。」
■雖然年糕體形細小，但當牠和Stephy賽跑，一點也不輸蝕。 生仔考慮唔養狗
年糕與「未來爸爸」方力申相處機會不多，對於日後Stephy組織家庭是否仍會飼養寵物，她說：「組織家庭要諗諗，如果生小朋友未必會養狗狗，唔係寵物同小朋友相處唔到，係時間問題。如果有小朋友我會放多啲時間畀佢，同時唔想忽略咗狗狗，如果養緊梗係唔會唔要佢。」
Stephy指小狗也有情緒，若沒有時間陪伴，會令狗狗感到孤獨：「你點對佢，佢係知道，你有好多精采嘅生活，但狗狗喺屋企只有你，你唔陪佢就冇人陪佢。」她又謂照顧狗狗像照顧小朋友：「我當年糕係小朋友，當佢係BB仔咁照顧，似係為將來準備，當然好多其他照顧小朋友嘅事情，到時做咗阿媽就知道。」
留言列表
{{ article.title }}
