媽咪姐

勁歌最好嘢!

2013年01月18日 ~~ 第912期 忽然１周

當睇《十大勁歌金曲頒獎典禮》，竟然藝員多到俾媽咪姐有睇台慶嘅感覺。當林峯攞「最受歡迎男歌星」已經變成意料中事，由台灣組合棒棒堂攞「亞太區最受歡迎男歌星」先係全晚「最高潮」。對於呢個頒獎禮，媽咪姐真係無話可說！都係網民有 heart，邊睇邊鬧，仲嚴選埋幾個「必睇位」。 Wow，睇真啲，又幾 funny！

薛凱琪跌嘢




冇份攞獎但有份表演嘅薛凱琪，着咗件 tube上台。效果呢？非常「驚」喜，驚成件衫會跌呀。查實阿女，呢個世界有 push up bra同改衫師傅㗎噃！ 

林欣彤唔見咗嘢


傳聞抑鬱又厭食，收埋自己一排嘅林欣彤，終於喺《勁歌》現身。嘩嘩嘩，真係瘦咗又靚咗喎！但有啲嘢又好似唔見咗，大家看圖搵答案啦。 Let's play！





陳僖儀做多咗嘢


陳僖儀攞「最受歡迎女新人」金獎，忽然爆喊話「多謝 Paco」，哭聲仲大到直達隔籬廠。但，眼淚無滴，妝容完好無缺，企後面嘅 Super Girl見到都忍唔住反眼。哎呀，網友都話係奇技嚟咯！細路女真係唔識世界。





黎芷珊真好嘢


想當年黎芷珊同陳慧嫻拍住出道做歌星，不過都無唱好多年咯。今次佢喺《勁歌》做司儀又大唱鄭秀文金曲，無怯場，夠自然！ 46歲竟然鍊贏晒啲細佢十幾廿歲嘅走音歌手，媽咪姐話嘅。





鍾嘉欣晒吓嘢




嗱，唔好話媽咪姐懶，查實我都有金睛火眼睇實㗎！喺鏡頭後，就俾我𥄫到嘉欣 BB全晚叉開腳坐，仲跌晒膊，比大隻欣宜仲豪邁！ Wow，唔通呢個先係玉女真面目？ 

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    tvb4life 發表在 痞客邦 留言(0) 人氣()

    E-mail轉寄