無綫套話題劇《老表，你好嘢！》雖然只係播咗幾集，但已經成為唔少市民茶餘飯後話題，好似被指引發中港矛盾，以及被投訴抹黑內地人等等，激發網民熱烈討論。撇除呢啲是非話題，其實套劇絕不Heavy，輕輕鬆鬆笑一餐咪幾好，而且演員配搭又新鮮。
除咗主角王祖藍﹑郭晉安﹑萬綺雯﹑王菀之及張繼聰，出奇地有火花兼合拍外，《老》嘅其他角色都幾多人談論，好似飾演祖藍兒時好友「細細粒」嘅肥妹小寶，呢排無啦啦紅咗，雖然佢係肥妹仔一名，但勝在可愛又搞笑，形象幾入屋。
至於劇中飾演王菀之好友嘅鬼妹仔「聶小茜」亦都唔弱，鬼妹仔原名叫陳明恩（Corinna），父親係新西蘭人﹑媽咪係澳洲人嘅Corinna， 但喺香港出生長大。佢個角色都好搶鏡，因為喺劇中經常無厘頭爆喊，畀王菀之飾演嘅吳芝晴話佢喊到似鬼叫，「聶小茜」就自嘲：「我係鬼妹，梗係喊得好似鬼叫﹗」
咪睇Corinna係鬼妹仔一名，佢啲廣東話字正腔圓，流利過唔少本地藝人，同已經離開電視圈嘅河國榮有得揮。查實2006年喺香港演藝學院畢業嘅Corinna，已經唔係第一次拍劇，之前佢拍過《絕代商驕》﹑《讀心神探》及《名媛望族》等，演出經驗豐富。
除咗演得之外，Corinna仲好唱得，佢喺演藝時主修音樂劇，音樂根柢同唱功都有返咁上下。Corinna曾經唱過張學友《愛是永恆》，又於2007年為天后林憶蓮演唱會任和音，亦試過同蘇永康合唱《來夜方長》，盡顯唱功，唱得好聽過唔少時下歌手，令人留下深刻印象。「聶小倩」捧紅咗王祖賢，未知Corinna飾演嘅「聶小茜」，會唔會又爆紅呢？
關鍵。“蘋果日報”圖片
全站熱搜
留言列表
{{ article.title }}
