媽咪姐
君如毛姐收咗火喎！
賀歲片大戰如箭在弦，連續三年都輸俾曾志偉同一班無綫小生花旦嘅黃百鳴，為咗收復失地，於是就一口氣搵嚟吳君如同毛舜筠兩大阿姐做女主角，喺新片《百星酒店》齊齊搞笑。
君如毛姐都唔係省油嘅燈，要令佢哋埋位時唔爭戲搶鏡，的確令黃百鳴𢱑爆頭。據知套戲上年 10月喺杭州千島湖開拍嗰陣，劇組人員為怕加添火藥味，專登安排佢哋住喺唔同樓層之餘，仲有唔同化妝師服侍佢哋，避免兩位阿姐硬碰。不過世事難料，兩位甚有原則嘅阿姐，今次唔單止冇拗撬，仲齊齊叫黃百鳴加多啲佢哋同場戲份，費事嘥咗呢個組合咁話喎！君如同媽咪姐講：「今次我哋相隔十幾年再合作，大家都成熟咗。」毛姐又話：「我哋每日黃昏就會拍晒，之後仲同君如做 gym，好 relax㗎！」君如話大家「成熟咗」，真係可圈可點，畢竟兩位阿姐都真係「年少無知」過嘅！
經典再現
君如洗廁所呢個場面嘅概念，咪來自經典喜劇《家有囍事》囉。
有名你叫，所以套戲係講酒店發生嘅趣事。毛姐做管理階層，君如負責清潔，但兩人都要幫詹瑞文做腳底按摩！唔搵戲嚟做邊有得笑吖。
雖然兩位阿姐收晒火，但黃百鳴唔想得失邊個，喺海報上就將演員名貼埋上身，唔寫領銜主演嗰欄，費事有排名次序。
鄭中基同薛凱琪都有份支援黃百鳴，但鄭就話：「 Fiona中文麻麻，有時連人哋笑咩都唔知。」 Fiona撈咗咁多年都中文麻麻，劇本仲寫晒英文拼音，又真係好笑喎。
全站熱搜
留言列表
{{ article.title }}
