娛樂八掛大放送★

政擅元秋蔣麗芸一鳴驚人，在議事堂七情上面義撐CY，隨即引發網上大量「二次創作」，講到佢廿幾年前已情迷CY，愛火重燃「上咗腦」，講講吓真係有人相信，仲話可惜當年CY已結婚，至情花未結果。本刊為此詢問幾位熟識兩人的好友，都話「蔣梁戀」並無其事，只係網民同泛民惡搞，噏得出就噏。問問吓反而有知情朋友爆出Ann姐（蔣之洋名）那些年一段刻骨銘心的舊戀情，男主角是英年早逝的前立法局議員張鑑泉。

這個苦戀故事開始於八十年代尾，出身紡織世家的張鑑泉當時只有四十幾歲，已代表工業界連任兩屆立法局議員，與飛哥及莎姐合稱「三劍俠」，佢為人敢言，台型十足，口才又了得，被視為政壇明日之星。呢個時候，佢同Ann姐在人生路上交匯，並燃起火花。

那些年仍獨身的蔣麗芸（右小圖），與已婚立法局議員張鑑泉有一段刻骨銘心苦戀，可惜男主角受家庭壓力，情花未能結果，黯然斬斷情絲。

Ann姐八一年大學畢業由加國返港後，一直幫老父蔣震經營機器生意，更勇闖大陸開拓新天地，在工業界漸露頭角，成為行內注目的年輕貌美女企業家。當時張鑑泉既是立法局議員，又做過工業總會主席，同Ann姐自然時有接觸，兩人都在外國讀過書（張留學英國），同屬名工業家二代，加上性情啱key，由惺惺相惜發展到火熱相戀，特別是張鑑泉，情迷對方至不能自拔。

但這段情緣一開始就荊棘滿途，張鑑泉出生於保守家庭，好後生就奉家長之命成婚，Ann姐當時已三十幾歲，仍然獨身，自然希望張鑑泉離婚，名正言順投入自己懷抱。

張鑑泉是性情中人，一墮入情網就癲晒，亦立定主意誓要娶Ann姐，奈何當他向家長提出，即遭強烈反對，事後發展就如舊小說劇情，他無力搞「家庭革命」，但兩人感情又斬不斷，理還亂，在困局中痛苦不堪。有朋友憶述，當時他情緒十分低落，甚至喊生喊死，聞者都心酸。

苦戀最後以分手收場，張少一直耿耿於懷，因人生不如意，當時仲信咗陳振聰可以幫他扭轉命運，在辦公室周圍設下風水局。到九三年他出席記者協會晚宴時心臟病發猝逝，震驚全城，當時他只有五十二歲，政治前途無限，絕對係英年早去，有人認為他健康出問題同情場失意都有小小關係。

Ann姐幾年後同現時老公梁海明結婚，兩人關係唔錯，但似乎欠缺咗「張蔣戀」嗰份浪漫激情。早前她接受訪問時，就有小小埋怨老公不懂浪漫，唔會在生日同情人節送禮物，求婚時亦冇乜情趣，任她自己去珠寶店揀戒指，說時若有所失。

她發言撐CY時話好多男人連結婚紀念日都唔記得，顯然係有感而發，當時心裏面是否想到張鑑泉，就冇人知啦！

網民玩政壇元秋與CY「情義兩心堅」，點擊達三十萬，查實所謂「蔣梁戀」完全係惡搞，並冇其事。