So Comment

抵食老外煎餅　 Mr Bing（老金煎餅）

2013年01月18日 ~~ 第912期飲食男女

Mr Bing？姓 Bing？
老闆係個老外姓金（ Brian Goldberg），中文鋪名容易明啲「老金煎餅」咪阿老外「老金」賣佢嘅煎餅囉！再返返去英文「 Bing」係餅！ Jian Bing係煎餅。

什麼是煎餅？

中國各省各市，人人都識煎餅，絕對係走地街頭小食，冇地鋪的，有許多人係食煎餅作早餐，我預備入去食煎餅時，有兩個年輕少女在門口用普通話交談，一個叫另一個唔好入去買，為何一個三四蚊嘅煎餅而家要付三十多元！
於是我便八起上嚟同佢搭訕。她們解釋煎餅係佢哋由細食到大嘅早餐，通常放下錢，拿個餅便邊行邊食，佢哋都係第一次喺香港見到煎餅鋪！
她們說煎餅係似法國 crêpe，麵粉開漿，漿粉放在熱鐵板上，立即打隻蛋，同漿一齊在熱鐵板上攪勻，掃平做個餅皮，餅皮熟了就加醬、生菜、脆炸麵粉（像油條）另配料有芫荽、葱、北方榨菜（小小甜味又小小鹹味）、芝麻，冇乜肉的，可能有些少火腿，這個早點就賣三四蚊！

老金的煎餅……乙＋

Menu啱我睇，一眼睇晒！ 4個選擇（ 1）老金煎餅$30，有自製醬，辣椒醬，南乳，芫荽，黑芝麻，京葱，蛋和薄脆。我就減了辣椒醬，加咗肉鬆，真係唔覺有肉鬆，不過好食，減醬冇減錢，不過有肉鬆就加咗$5。
（ 2）烤鴨煎餅$48，有烤鴨，青瓜，京葱，酸薑，烤鴨汁，雞蛋，薄脆，好好食！
（ 3）叉燒煎餅$40，餡多了叉燒，冇試過！
（ 4）上海肉鬆煎餅$40，冇試，但我嘅老金煎餅加咗肉鬆，差不多啩！
另甜餅有（ 1）港式$28，花生醬，煉奶，蛋，薄脆，冇試。（ 2）星洲$28，椰子醬（ Kaya），椰絲，蛋，薄脆，好甜，我唔鍾意，個咖央又唔好食！
小食亦試了拍青瓜$12和香麻藕片$12，過得去。$12想點?!
聽聞日日夜夜排長龍，因為得兩個爐，但試想想，$30-$40食到你飽到死！我 3個人先至叫了兩份，但已好夠了，個餅真係有大概 13cm X 13cm，厚 4cm，好大㗎！香港人最鍾意，快、靚、正！ Mr Bing正做到。買完仲可以落樓下食。
Good Try， Brian！ Brian係 New Yoker，去北京讀書，日日上堂前就急急買個$2燒餅食，然後就去學寫和講中文，佢嘅普通話講得好過我呢。佢而家喺銀行做，開煎餅店乃係佢 Master degree的論文，後來真係好懷念讀書時候煎餅的陪伴，所以試吓開間小鋪在香港，相信 Brian一定有其他大計，因為佢係讀 Business呢！