一直都有云，偶像要做好粉絲榜樣，特別是一班心智未成熟的未成年粉絲，做偶像更加要起帶頭作用。不過，嘉欣BB鍾嘉欣，近期可能事業太過順利，不但電視上坐穩一線女主角位置，音樂上亦在兩個頒獎禮得獎，難怪得意忘形，日前竟然在拍攝外景後，貪方便唔用斑馬線過馬路，最弊同行學生粉絲有樣學樣，險象環生，認真教壞細路。採訪：張詠森
嘉欣BB最近在勁歌和新城兩大樂壇頒獎禮，共奪得三個獎項，成績不比一眾全職歌手遜色，心情自然特別靚。日前她在尖東為新劇《巨輪》拍攝外景，完工肚仔餓去買個三文治食，後面跟住成班着住校服的妹妹仔粉絲。
嘉欣買完後竟然無遵守交通規則，亂咁過馬路，一班粉絲為了跟實偶像，一於好少理照樣在馬路亂跑，認真牙煙，追星唔使搵命搏啩！
小心祖藍呷醋
不過，一班妹妹仔對實偶像，依然相當心甜，難得嘉欣BB向來親民，合照簽名有求必應，大家早已將交通安全意識拋到九宵雲外，樂得即場搞個微型粉絲聚會，但嘉欣作為偶像呢個壞習慣真係要改啦！
嘉欣拍完，就輪到戲中飾演她胞姊的李亞男、和男友的陳展鵬上場，兩人在街邊拉拉扯扯，休息時李亞男突然很細心地幫展鵬整好在胸前的相機帶，動作相當熟練，而受惠的展鵬亦相當奉旨，若然唔知亞男有個成日傳結婚的穩定男友王祖藍的話，一定以為佢哋有嘢。
亞男對其他男仔咁好，小心祖藍會呷醋呀！
嘉欣率領大批粉絲，齊齊亂過馬路，認真牙煙。
嘉欣跟粉絲過馬路時，有私家車緊貼他們身邊經過。
嘉欣在工作人員陪同下，到了對面的快餐店買三文治。
拍完一個鏡頭，展鵬唔知講咗咩，搞到亞男笑唔停口。
到正式拍攝時，反而是展鵬做主動拉着亞男的手。
亞男好細心幫展鵬整相機帶，而展鵬又表現得相當受落。
全站熱搜
留言列表
{{ article.title }}
