放暑假， Queenie在家教小朋友用食物做科學小實驗，用純忌廉 Shake幾 Shake，個個都成功整到牛油，有嘢學又有得食，小朋友零舍興奮！

親壹親

DIY炮製暑期班

2012年07月26日 ~~ 第1168期香港《壹周刊》

一年一度暑假又到！好多父母怕小朋友百無聊賴，事先報定各類興趣班，趁暑假繼續學習。不過專家教路，難得暑假大解放，家長同小朋友都無晒功課壓力，衝突減少，絕對是製造美好親子回憶的好時機。好似 Queenie，就會落手落腳同小朋友自組暑期班，約埋三五知己加入，以食物做科學實驗，可啟發課外興趣，又可增進親子感情。未有諗頭的父母歡迎取經！

自組科學班

去到超市，慈慈好快就去揀檸檬，一對手拎唔晒，其他小朋友幫手完成任務！

「將藍莓汁同 pancake粉撈勻，你估煎出來係咩顏色？」 Queenie以神秘語氣問，圍觀的小朋友理所當然地答：「紫色！」 Queenie笑住回應：「真係？一陣你哋睇清楚！」
家住錦田的全職家庭主婦 Queenie，是慈慈和 Rico的媽媽，自從今年在書店買了一套科學實驗教材後，決定趁暑假同小朋友一齊試玩！醒目媽媽明知小朋友鍾意放東西入口，用食物做實驗就不怕食壞肚，「試做科學小實驗，引導小朋友做不同假設和嘗試，都可培養正確學習態度。過程中要打蛋、磅麵粉、切檸檬等，可以順便學習生活技能，訓練手眼協調。今次仲有麥太同鮑太，帶埋小朋友伊玲同 Michael來一齊玩！」

超市尋寶遊

Queenie話 Michael雖然只係讀 K3，但性格比較成熟穩重，所以安排他負責核對購物清單。

去超級市場買材料都是學習一部分，「今日要買六樣材料，純忌廉、麵包、檸檬……」一接到任務，慈慈同伊玲做先頭部隊周圍搵， Michael拎住清單和記事簿負責記錄，小弟弟 Rico推車。四個小朋友好興奮，好似玩緊尋寶遊戲。三位媽媽則殿後觀察，必要時出手相助。 Queenie說：「我唔想小朋友覺得材料會自動出現在枱上，要知道邊度得來；小朋友再大一點就要學格價同去街市。」久經訓練，小朋友都識得主動向店員問貨品位置，有疑惑時又會互相討論。香港小童群益會成長發展中心主任王美玲亦同意，「去超市購物是一個有趣的親子活動，家長不但可從中觀察小朋友如何選購食物，亦可慢慢教他們看食物標籤。」

過程重於結果

「今日會嘗試自製牛油，亦會試用麵包、牛奶、 pancake來做實驗，講明先，未必一定成功，志在嘗試！」過程中，小朋友都非常落力，將忌廉放在膠杯大力搖造出牛油，「我無特別講解實驗原理，因為小朋友年紀仲細，硬生生將理論塞入腦都無辦法明白。反而自製牛油經驗好難忘，將來就會自己去搵答案。」
原本 Queenie教小朋友分別用水和檸檬汁在麵包上寫字，放入焗爐焗後，用檸檬汁寫的字就會烘燶，但過程中小朋友無依足指示，只焗出一塊普通麵包。不過他們依然滿心歡喜，用自製牛油搽落麵包，食得特別滋味！ Queenie認為，「大人唔好期望小朋友會依足吩咐做出預期效果，否則會好失望！對他們來講，實驗結果不重要，最重要是體驗過程。」

Queenie不怕小朋友切親手，即使受傷，下次就學識保護自己。 Michael靈機一觸，將三塊麵包疊埋一齊切，好快手！

為食小朋友，每樣材料都要試味， Rico差少少倒瀉杯奶，俾姐姐沒收就喊起來。

好玩實驗

自製牛油
材料：密實小膠杯、純忌廉（ 250毫升）、鹽
做法：將純忌廉倒至膠杯的三分一，合上蓋後猛力搖晃，直至杯底出現凝固物。
結果：搖晃過程中，忌廉中的水和油分離，倒去多餘水分後，便會出現牛油，加少許鹽味道更佳。

圖案麵包
材料：方包、凍滾水、檸檬
做法：畫筆沾水或檸檬汁，在方包上寫字，放入多士爐。
結果： 1.被水沾濕的位置水分較多，因此未有烤乾而保持原色。
　　　 2.檸檬汁屬酸性，高溫下，酸性令碳水化合物脫水，形成焦褐色。

變色 Pancake
材料：雞蛋、 pancake粉、藍莓汁
做法：將雞蛋和 130毫升的藍莓汁攪拌均勻，再加入 150克 pancake粉，用平底鍋將兩邊煎熟。最後，將煎好的藍莓 pancake沾少許檸檬汁。
結果： 1. Pancake粉含發粉，屬鹼性，混合藍莓汁，煎出來會變成綠色。
　　　 2.檸檬汁屬酸性，會中和鹼性的 pancake粉，變成粉紅色。

暑假搞邊科

難得放暑假，切忌為小朋友安排密集式學術課程，但又不能只顧玩樂而無所學，休息和學習時間要平衡，家長可依照下列方針訂立暑假大計。
•暑假開始，家長宜就小朋友在過去學年的成績及待人接物的態度，一齊做個檢討。由良好表現講起，給予鼓勵。
•到八月尾臨近開學，家長宜鼓勵小朋友就檢討結果，想想改善方法，迎接新學年。
•涉獵學校以外的另類生活體驗，如天文、生態、航天科技等方面課外知識，發掘興趣及學習動機。報讀課程時留意導師的專業資格。
•週末以外，平日至少半小時親子活動，如公園散步、讀圖書。

資料提供：香港小童群益會成長發展中心主任王美玲

專家讚：

•小朋友分工合作打蛋、切材料、幫忙清潔，增加實戰經驗，幫助提升自信心。
• Queenie配合小朋友的學習能力，沒有硬塞科學知識，做法值得欣賞，但可嘗試引導小朋友多發問。

專家建議：

•細心留意小朋友的互動情況，遇有爭執時，能否彼此尋求解決方法。
•家長可輪流做導師，增加小朋友與不同大人溝通的訓練。
•不時加入新血，令小朋友可在陌生的環境下與不同人建立關係。
•不同家長聚埋，易受不同教仔方法影響，宜堅持立場，否則善變會令小朋友無所適從。

資料提供：香港小童群益會成長發展中心主任王美玲

大自然學堂

小朋友開頭怕污糟不想隨地執樹枝樹葉，玩玩吓就豁出去，落力周圍搵當尋寶遊戲。今年只得四歲的 Yiu B話：「我玩得好開心！我鍾意執樹枝！」

平時生活在城市，好難得同大自然接觸。訪問當日，本刊邀請三個小朋友來到郊野公園試玩大自然遊戲，跑出一身汗。由智樂兒童遊樂協會大自然遊戲項目負責人岑威卓提供遊戲點子，年齡不拘，在一般公園都可以找到遊戲材料。「在城市生活的小朋友，偏重室內活動，家長應該安排更多遊戲選擇，例如在大自然中，利用簡單的物資如落葉、樹枝、石頭，即可隨意創作遊戲。不過緊記要尊重自然，不採摘花草、爬樹。」

大自然尋寶

九歲的 Jimmy不愛勞作，但為了同 Carson鬥靚，所以特別有心機。

玩法：周圍搜集形狀特別的樹葉、石頭同樹枝，準備一陣玩遊戲。
玩評： Jimmy
除了黃葉同綠葉，仲有一棵形狀似葱的植物同銅色樹葉，似地上執到寶，我這棵一定是全場焦點！

樹葉拼畫

Carson舉高幅畫遮住塊面話：「其實我畫緊自己！」

物資：樹葉、雙面膠紙、 A4紙、筆
玩法：用搜集得來的樹葉，用雙面膠紙貼在紙上，拼出不同圖案，可用筆加工。
玩評： Carson
我拼了自己個樣出來，用樹葉做頭髮和眼眉，再用筆在臉上點了好多油脂粒！

石頭競技

石子競技無特定玩法，小朋友又彈又推又撥，落力將對方推出競技場。

物資： F4紙、石頭
玩法：用一張 F4紙做競技場，放上石頭做棋子，兩人對賽，小朋友可用不同方法將對方的棋子彈或推出競技場。
玩評： Jimmy
好好玩，平時我成日同同學玩彈擦膠，次次都贏，彈石仔就真係第一次，石仔重身比較難彈，次次都輸！今次學識我會返去教同學玩。

樹枝劍球

Carson覺得自己親手造玩具特別有成功感，造完更投入地玩多陣。

物資：樹枝、麻繩、皺紋膠紙
玩法：將樹枝交叉拼成十字架狀，用皺紋膠紙紮實；用麻繩做一個繩圈，再將繩圈同樹枝綁起來，做成一個樹枝劍球。手持十字架，將繩圈拋入十字架內。
玩評： Carson
幾個遊戲之中，我最鍾意這個，可以學整玩具，仲可以帶返屋企繼續玩，好有滿足感！

資料提供：智樂兒童遊樂協會

八月即食活動

雙職父母未必有時間為小朋友安排節目，其實週末有不少活動可以當日先報名。

學歷史
香港歷史博物館導賞員教授製作漁船或電車模型，從而認識香港早期的交通工具。
日期/時間：即日起逢星期六、日/ 4pm至 5pm
網址： http://www.lcsd.gov.hk/CE/Museum/History
keyword活動→「香港故事」特備節目

親親大自然
香港青年協會有機農莊提供農地參觀及認識有機耕種，亦可食一餐有機午飯。
開放時間：每日 9am至 5pm
網址： http://organicfarm.hkfyg.org.hk

好玩嘉年華
位於大埔滘的白鷺湖互動中心提供各種攤位遊戲、 DIY手工藝玩意和水上單車等康樂設施。
開放時間：即日起逢星期日及公眾假期/ 1pm至 5:30pm
網址： http://www.lakeegret.com
keyword活動→ DIY歡樂嘉年華及康樂設施

醒你

科學教材《廚房裡的小科學家》（學研著，三采出版），一套六冊教用不同的食材做簡單的科學實驗，好玩又食得，適合假日親子活動。

智樂兒童遊樂協會網頁提供適合不同季節的大自然遊戲小點子，供家長參考。
八月十八日亦有「放玩一日遊」親子大自然遊戲體驗活動於清水灣郊野公園舉行。
網址： http://www.playright.org.hk/tc/index.aspx
keyword大自然遊戲