同你吟一吟
殼王幫樂大媽解圍
無綫將倫敦奧運安排明珠台播，另外又出動全台藝人，炮製扮嘢節目《玩轉三周半》，兩面夾擊有線奧運節目。
上星期二（七月十七日），將軍澳電視城所有劇集停廠讓路，俾《玩轉三周半》拍宣傳片，三二九個藝人出席，連大股東殼王陳國強都嚟埋做布景，相當大陣仗。
公司玩晒冷，旗下花旦當然冇怠慢，尤其係同大老闆殼王傳過緋聞嘅徐子珊，又托又唧，成功谷出三吋事業線，全場最養眼；但講到大合照排位，佢就及唔上視后胡杏兒同後台硬淨嘅陳法拉，連鍾嘉欣都不如，要企大外檔。
大鬥法，其實唔係幕前姐仔專利，幕後高層，同樣要爭取表現機會。當日樂易玲除咗充分發揮大媽本色，仲做埋 PA嗰份幫手嗌人埋位，更不忘喺大老闆附近，左穿右插，比起另一女高層余詠珊，勤快得多。
難怪當大家問樂易玲，有傳方逸華搞經理人公司搵佢過檔，殼王立即撲出嚟幫口話樂易玲只係要幫忙處理埋邵氏電影，絕唔係外傳坐唔穩。
照咁睇，樂大媽張櫈，應該仲好穩陣。
樂易玲左騰右騰安排藝員企位，之後又半拖半請老細埋位，輕重都照顧到。
心口肉唔算厚嘅徐子珊，當日谷出 Y字事業線，係眾姐中最搏一個，但排位就及唔上杏兒法拉嘉欣，企大外檔。
鍾嘉欣著裙唔坐得，唯有將 Laughing當櫈，借借力。
幾百友晒冷，由埋位到企好可以 roll機，前後要半個鐘多啲，年紀大嘅梁舜燕有工作人員敬老提供摺椅坐住等。
著住六吋高鞋，胡杏兒企咗陣就要坐低。
全站熱搜
留言列表
{{ article.title }}
