幼稚園，肯定是一生中最開心的求學階段。畢業了，小朋友頂着米奇四方帽，跟隨大隊準備上花車出巡，頭上太陽再狠毒都未驚過。暑假過後，成為小學生，艱苦的求學生涯，應該有排驚。

圖片故事

36℃畢業禮

2012年07月26日 ~~ 第1168期香港《壹周刊》

藍天，烈日當空，欣澳熱爆，氣溫三十六度！一群幼稚園學生聚集在迪士尼翠綠大閘外，頭戴米奇老鼠四方帽，披上鮮紅長袍，在門外等待，直至校長一聲令下，即時兩個一排，連跑帶跳跟住老師入場。
「嘩！米奇老鼠呀！」尚未就位，已傳來一陣陣歡呼聲，小人兒拼命要和這位嘉賓握握手，家長則爭位舉相機。
喂喂，小朋友，咪郁住，望呢邊笑吓先啦……
「嚓」一聲！恭喜畢業了！

每年六、七月，迪士尼偶爾會提早開門。踏正九時，米奇老鼠已經站在門口。這天，小人兒畢業了！
在迪士尼行畢業禮，感覺夢幻；但原來不是貴族學校的玩意，就連天水圍屋邨幼稚園都負擔得起。
「我哋上年開始喺迪士尼搞畢業禮，小朋友同家長都好鍾意，所以今年再搞囉！不過一定要有父母帶住嘅小朋友先可以嚟，唔夠 Miss睇住佢哋呀！」是日負責帶隊的天水圍幼稚園姜校長說。
與米奇老鼠影畢業相只是點子，對小朋友而言，可以在園內玩一整天才是重點。一脫下畢業袍，巧晴和好朋友蔚盈便興致勃勃，率先玩旋轉木馬，遠處望見大象灰耳朵即大喊：「爹哋！我要玩小飛象！」記者跟在其後，望見指示牌寫上「等候時間四十五分鐘」，呆了。同行的劉爸爸劉媽媽反應亦跟記者一樣，但始終敵不過小朋友的一臉渴求，還是乖乖跟隊。
中午，太陽爬得更高，一眾爹哋媽咪已開始熱得頭暈暈，但對小朋友零影響，巧晴和蔚盈連排隊時間也是嘻嘻哈哈笑着，更與攝影師玩起「你影我避」的遊戲，在人龍之中鑽來鑽去大叫：「嘩！哈哈哈，唔俾你影！」玩了數個機動遊戲，還未夠喉，二人便要跟隨老師指引登上花車巡遊，歷時約二十分鐘，之後又繼續玩轉樂園。
早已熱得謝了的劉爸爸悄悄對記者說：「今日熱到我哋無晒精神，好彩有你哋喺度頂住咋，唔係都唔知點玩到夜！」難頂都要捨命相陪，無計，畢業大過天！

小朋友的反應永遠是最真誠，與米奇老鼠排排企影大合照，小朋友早已被曬乾，有人𠵱起棚牙強擠笑容，有人早已熱得木無表情，只係差在未說出口的一句︰「好熱呀，影完未呀？」

心肝寶貝首次穿袍戴上四方帽，父母未入場已變做龍友猛影相，完全無視老師在旁急趕學生入場。

「笑吓啦！」許太準備舉機拍照之際，米奇米妮亦出動大鼻子相哄，可惜仍然不敵酷熱天氣，熱到面紅紅的雨晴懶理媽咪要求，繼續面燶燶無面俾。

太陽兜頭曬，蒸出濕漉漉的滿頭汗，小朋友的活力愈熱愈有，仍舊扎扎跳通處跑，要爹哋媽咪提醒才覺口渴，蔚盈（左）見水即時大啖大啖飲，巧晴（右）則只肯飲冰凍可樂消暑。

畢業禮的另一亮點是登上雙層花車巡遊，猶如皇室出巡，途人一見花車即報以掌聲兼拍照。

在街邊遇上米奇，小朋友頓時呆立當場，影相要趁早，不然下次至少要排隊輪三十分鐘。