探熱針
有底男家 嫌棄爛蒲唐貝詩
衰爛蒲的唐貝詩，去年被拍拖四年男友 Eric（毛玉萍兒子）飛走後，蒲格鮮明的她，一直冇着落。直至數月前，幾經辛苦搵到新碼頭，搭上在英國留學、屋企有景的新歡 Andy，可惜「底花」唐貝詩卻遭男友家人嫌棄。
七月中，唐貝詩慶祝二十四歲生日，在 party中同人講自己單身，講大話有苦衷，原來蒲精要洗底，戀情低調，搏男家好感。
早前唐貝詩正日生日，在媽咪寇鴻萍開設的「 L16」餐廳開派對慶祝，但據悉派對唔係入阿媽數，而係男友 Andy埋單。當日他在高大保鑣護法下現身女友派對，但慶祝一回埋完張單，他就先行告退，留下女友繼續玩。
唐貝詩與外形有幾分似吳卓羲的新歡 Andy拍拖數月，但其間亦有背仔偷食。
男友屋企開賭廳
唐貝詩未獲男友家人接納，睇 嚟母親寇鴻萍要出招幫個女討男家歡心。
二十四歲生日，唐貝詩聯同妹妹唐貝欣，好友黃榕及 LuLu（王璐瑤）開 party慶祝，新歡 Andy Cheung從夜場後門進場，避過傳媒耳目。今年二月，唐貝詩跟仍在英國攻讀工商管理、家底分量十足的 Andy撻着，再執到支好籤，但她卻不敢高調，原因是受到男家施壓。
據悉 Andy父親在澳門經營多個賭廳，有江湖地位外，身家更億計。 Andy的胞姐，去年中曾在夜店跟莊思華（莊思敏胞妹）捲入一宗爭執掌摑案；但 Andy本身卻是乖乖仔一名，與唐貝詩拍拖後，女友「業績」早已在張父掌握中，曾強烈反對寶貝仔同蒲精發展，更下令不准她將感情公開，十分嫌棄。
偷食萬寧哥哥
唐貝詩雖然聽命，不敢向外承認新戀情，但與 Andy拍拖四個多月，至今仍未獲男友家人接納，張父對她的反感，有加不減。
但這都是唐貝詩攞嚟衰，趁 Andy返英國，她便外出「搵食」，有次食萬寧哥哥（沈志明）後竟傳遍蒲場，更落到張父耳中。
「 Andy爸爸好緊張個仔，知佢同 Lydia拍拖之後就搵人收住風。 Lydia成日趁 Andy返英國，就去夜場搵嘢食。 Andy爹哋知佢偷食，嬲到要個仔即甩 Lydia。但 Andy好信 Lydia，佢爹哋都冇勉強，但就講明唔可以見光。」知情者爆。
男家施壓，唐貝詩唯有步步為營，連生日派對， Andy都要低調。女友正日當晚，有保鑣傍住的 Andy，只到場一會便閃。
「嗰晚 Lydia喺佢媽咪（寇鴻萍）間餐廳開生日派對， Andy後來專誠嚟埋單。」唐貝詩身邊人說。
原來如此，難怪 Andy老豆要到實！
生日前，唐貝詩跟友人到蘭桂坊夜場預祝生日，據知當晚新歡 Andy從後門進場，相當低調。
連搞兩日生日派對，在「 L16」慶祝的一場，生日蛋糕都有四個，但到賀的朋友只得十數個。
是非女
24歲的唐貝詩，因寸爆性格，無論與家人抑或朋友，都有過反目時候。又曾因發表盆景貓的低智言論，被全城圍攻。
出賣超盈
跟賭王何鴻燊四房長女何超盈好姊妹多年， 09年超盈跟當時的男友 Greg剛撻着，唐貝詩竟放料給傳媒，令戀情曝光，二人從此反面。
盆景詩
10年，唐貝詩在微博自爆訂購「盆景貓」，遭網民圍插虐畜心理有問題，就連媽咪寇鴻萍亦被指唔識教女，最後兩母女公開道歉。
阿媽冇情講
去年仍在英國讀大學的唐貝詩，突然公主病發，玩失蹤幾個月，寇鴻萍最後出動女兒契媽鄭裕玲幫手，母女才和好。
唔識寶
跟毛玉萍兒子 Eric Yu拍拖期間，有指唐貝詩毫不珍惜對方，喪蒲又公主病發，男方頂唔住，結果提出分手。 
唐貝詩被新歡家人藐爆，反之她的舊愛 Eric與新歡 Jacqueline拍拖以來，一直得母親毛玉萍接受。
留言列表
{{ article.title }}
