去倫敦睇奧運，最煩惱是搵食！隨街食個普通 Set Lunch都要十多鎊落樓，好貴唔捨得食！幸好今次有幾位本地薑教路，帶大家搵平食，花10英鎊就飽到捧住肚，又可追到奧運熱潮，保證唔會餓親。
記者、攝影：姚子浩
愛試新店 Sarah
由細到大居住倫敦，對倫敦新開餐廳瞭如指掌。
傳聖火尾站 市集食勻全球
明日7月26日，即是奧運開幕前的一日，聖火就會傳到倫敦西北部的 Camden Town。上兩個星期去到這個聖火尾站，到處已拉起了各國國旗做好準備，加上本來一到周末就人流極旺，所以這裏特別有盛事氣氛。這裏除了是後生仔買平衫的 Market外，也有好多街頭小食，由英式炸魚薯條、非洲燒雞、中式小炒到西班牙海鮮飯，都可在一條街食勻，十足美食版奧運！最重要是價錢夠平，每檔小食都只是三四鎊有交易，攞住10鎊行一轉，保證食到捧住個肚走。
今次搵到一檔牙買加燒烤，可能大家都想試大紅人保特的家鄉菜，這檔燒烤特別旺場，我足足排隊10分鐘先見到檔主。點了一份燒雞卷，雞肉上面有黑椒及秘製香料，夾在一堆雜菜內，一口咬落去辣得來又幾開胃，唔通這就是跑得快的秘方？之後見到旁邊的西班牙小炒實在太吸引，又忍唔住食了一份雞肉飯，問靚仔店員最睇好西班牙會在哪項運動奪金？他毫不猶疑說：「足球！贏了就是三料冠軍！」
■除了是遊客聖地，也眼見很多當地人開餐，貪這裏夠平民化。
■河畔設有電單車凳仔，買完小食坐在這裏邊食邊睇河景。
■大部份街頭小食價錢夠抵，三四鎊有交易。
Camden Town
交通：乘搭 Underground至 Camden Town站即到達
網址： http://www.camden.gov.uk
推介：西班牙雞飯
西班牙足球門將迪基亞
■西班牙球隊繼世界盃及歐國盃，有望捧走埋奧運金牌。
■西班牙小炒極受歡迎，雞肉及海鮮飯香氣四射。
■西班牙雞飯盛惠4鎊（$48），肉多飯少非常足料。
推介：牙買加雞肉卷
牙買加短跑手保特
■食過保特的家鄉小食，會跑得快點嗎？
■牙買加燒烤是保特的家鄉小食，大男人食一份已夠飽。
■牙買加雞肉卷有雜菜、烤雞肉，好惹味。5鎊（$61）
土生土長英國儍強
最鍾意食，要佢帶大家10鎊食一餐，佢話 Easy Job！
隔河觀主場館 好悠閒
今次去倫敦搵食，好在認識了幾位本地薑帶我搵平食，其中成日儍笑的「英國儍強」就帶我去了這間 The Counter Cafe，話可以望住奧運主場館飲咖啡！原來 Cafe位於 Roach Road，由一棟兩層的貨倉改建而成，跟主場館只有一河之隔，所以無論坐在岸邊或是二樓，都可以睇到主場館全景。我與儍強點了一份售9鎊的招牌 Big Breakfast，多士、薯茸、雙腸、豌豆番茄茸……份量大得連兩個大男人都夠飽，麪包是每日新鮮自家製，比起出面明顯有誠意得多。另外 Cafe本身就在一棟 Art Gallery裏面，食完仲可以順便行一轉睇當地藝術家的作品。
■ Big Breakfast9鎊（$108）
■推介大家坐戶外位，邊食早餐邊近距離望住主場館，非常寫意。
The Counter Cafe
地址：7 Roach Road, London
網址： http://thecountercafe.co.uk
愛環保 Kristen
她生於香港，愛環保愛自然，在留英讀書期間提倡都市中的環保農作。
真正新鮮 提倡奧運健康
講開奧運美食，之前當地傳媒不停鬧 M記居然可做官方餐廳，同提倡健康的奧運完全背道而馳。我今次識到一位混血靚女 Kristen，她介紹我到東倫敦一間全天然 Cafe，食即摘有機蔬菜，夠晒健康！原來 Kristen來自香港，因為讀書關係定居倫敦，熱愛農作的她為了推廣環保和種菜，就在一年多前成立了 FARM:shop，在城市中建立一個小農場，後園更栽種了各式各樣蔬菜，客人一落柯打即摘新鮮靚菜做出沙律及三文治等，那份真正的新鮮口味確實只此一家。
■即摘即食的蔬菜全無草青味，簡單配麥包及蛋沙律已無懈可擊。3.5鎊（$43）
■顧客喜歡坐在小溫室內，享受自然環境。
■種菜的水會流入自製系統，過濾後循環再用。
FARM:shop
地址：20 Dalston Lane, London
網址： http://farmlondon.weebly.com
碧咸點名名廚餐廳
聽講碧咸無份踢奧運有啲嬲，不過佢早前傳聖火時都非常識做，大讚英國有好多好嘢食，更教大家奧運期間要去位於小巷內的 NOPI！這是廚師 Yotam Ottolenghi去年初開的新餐廳，名氣拍得住 Jamie Oliver，所以 NOPI順理成章成為不少名人的新去處，主打地中海、亞洲及中東菜式。靚女 Sarah話相比起大廚的其他餐廳， NOPI屬較為 Casual的一間，我們坐在吧枱位置邊飲咖啡邊吹水，有講有笑，果然完全沒有名廚餐廳的侷促感覺。
講番菜式， Sarah推介我試招牌菜意大利芝士 Burrata，一般食 Burrata都會配番茄及羅勒，不過大廚就改為以新鮮桃肉配搭，入口感覺更 Fresh，而芝士面淋上烤過的芫荽籽，香味和芝士出奇地夾！ Sarah提提大家，奧運期間會有好多 Walk-in客人，所以唔想撲空的話，最好預先訂定位。
■碧咸公開畀貼士，教遊客睇倫奧要來 NOPI搵食。
■招牌菜意大利芝士 Burrata，配合新鮮桃肉一齊食，非常清新。12鎊（$144）
■每到午餐和黃昏， NOPI總是處於爆場狀態。
NOPI
地址：21-22 Warwick Street, London
網址： http://www.nopi-restaurant.com
Travel Memo
持特區護照或 BNO者毋須簽證。查詢：29013000（英國領事館）
英國航空經濟客位來回機票，由$4,455起。查詢： http://www.britishairways.com
1英鎊約兌12港元
鳴謝： Visit Britain、 Agoda Hong Kong
■ Tower Bridge
London EXPRESS：大型五環影相位逐個捉
■泰晤士河
除了各個比賽場館外，倫敦市內已經出現了好幾個巨型的五環標誌，成為今年遊客必到的影相位。當中最有氣勢的就要數 Tower Bridge正中間的五環，有11.5米高！另外，希斯路機場第五客運大樓及乘坐歐洲之星（ Eurostar）的車站 St Pancras International Station，都分別有兩個，好彩的話仲可以影埋位於泰晤士河之上漂流嗰個呢！
■ St Pancras International Station
■希斯路機場第五客運大樓
留言列表
{{ article.title }}
