| 陳淨心「關你叉事」响朵 愛港辣妹起底 |
港台《議事論事》早幾日擺擂台，一邊係長毛同黃之鋒，另一邊係最近勁搶鏡嘅Ann姐，加埋「愛護香港力量」召集人陳淨心，一開波就擦出火花。估唔到呢個新秀同長毛頂撞毫不怯場，充滿辣味，更爆出句「關你叉事」，即成為城中話題及網上惡搞題材。
呢位辣妹忽然响朵，究竟有乜底細，引起唔少揣測，有人話佢做過親中組織新界社團聯會理事，背後又得到潮州幫團體支持，係親中陣營分支出嚟嘅外圍新勢力成員，甚至同中聯辦有關。
本刊翻查資料，「愛護香港力量」成立於前年六月，近半年開始高調，多次拉大隊打正旗號挺梁，同泛民人馬硬碰硬，成立之初，陳淨心已經係召集人。本刊記者搵到佢查詢，問佢有乜政治背景，佢語氣激動回答：「我絕對冇任何團體同政黨背景，我雖然祖籍潮州澄海，但阿爺六十年前已嚟咗香港，阿爸一句潮州話都冇教過我。我係土生土長香港人，幼稚園、小學、中學都在香港讀，話我同潮州商會有關，做過梁錦培（新界青年聯會副主席）助手，全部唔係事實。」
佢話去年除夕搞挺梁遊行，廣發英雄帖，最後有幾個潮州團體表示支持，所以有呢個誤會。
講到被港台「嘟」，陳淨心仍怒氣未消，佢話當日去到電台見到支港英旗已好嬲，到長毛指住佢話係「政權嘅一隻狗」，佢至激動回應。當時佢話「我係咪建制派關你叉事」，但港台就嘟咗個「叉」字，令人誤以為佢講粗口，等於詆毀佢，港台一定要畀個交代，否則會有進一步行動討回清白！
「愛港」辣妹陳淨心（上圖右）同長毛硬碰硬，爆出句「我係咪建制派關你叉事」，台型十足，隨即一「叉」成名，成為網上最熱門話題，網民惡搞創意再湧現（下圖）。
全站熱搜
留言列表
{{ article.title }}
