五寶湯麵$52
五寶即牛腩、牛肚、牛脷、牛筋及牛尾，當中牛腩腍筋相間，好好咬口，食唔停！

潮𡃁便當

粉麵登埸

2013年02月20日 ~~ 第300期 Face

旺區租金猛如虎，迫得銅鑼灣老牌粥麵店利苑無奈結業、亦迫得各大小麵店，轉戰西環、土瓜灣等區，成為港式粉麵的生力軍，住附近的食客有口福！
望就望港鐵沿線伸展，不再令呢啲幼苗再度犧牲。

好咬口　筋肉相間牛腩

同朋友傾偈，不少人都抱怨屋企附近冇啖好食，平靚正的河粉粥店更是難求，開業不過 1個多月的亨哥，午市主打鄰近寫字樓生意，晚上變成街坊食堂。清湯腩即日來貨即日清，湯底以牛骨、豬骨等材料熬製，即使關門後都 keep住用慢火不停熬煮，確保一開門客人就有清湯腩食。沒有牛的粉麵類例如豬手麵、鯪魚球麵等，就會用上雲吞湯，即加入羅漢果、大地魚、鮮蝦等材料熬成的湯，味道清淡帶鮮， match番口形。

蝦子牛腩雲吞撈麵$36
蝦子卜卜脆，鹹香四溢，配合皮薄餡料足的雲吞，肉香在口內發放，好滿足！

鮮茄濃湯豬膶牛肉米線$36
番茄茄味濃郁，令湯底更加清新不肥膩，豬膶不偏不倚，唔會有朕「餲」味。

Fanny學生
鍾意呢度啲清湯牛腩，夠腍，之前嚟過一次，覺得呢度選擇多，所以再嚟。

亨哥清湯腩　
地址：長沙灣青山道 336號地下　
電話： 2729 2811
營業時間：星期一至六： 7am-10pm；星期日： 12nn-10pm

鮮甜　番茄魚湯

魚湯番茄米線$38
魚湯濃郁鮮甜，帶番茄酸酸甜甜，尤以甜味較為突出，建議食米線前飲幾口湯先。

如果未親臨現場，可能以為薰衣草是一間 cafe，跟粉麵拉不上關係，原來店主 Jackie，在對面街開了一間洗衣店叫薰衣草，所以開餐廳理所當然改名為薰衣草，並請來分弟弟阿 Dee主理。這位阿 Dee，超級喜歡分享，訪問當天就把牛河米線、甚至奶茶通通搬上來，不停勸菜， nice爆。曾在鯉魚門海鮮店內專責熬魚湯的阿 Dee，由於覺得香港人普遍食得太濃，所以來到餐廳幫手之後，不僅將魚湯發揚光大，並加入新鮮番茄，呈奶白魚湯甜而不腥，並帶香濃茄香，非常健康，而烹調清湯牛腩的湯底，亦特別加入黃豆，增加清甜味，由於黃豆有去油作用，更健康。

鮮蝦彈彈丸$48
彈彈丸即蝦丸將蝦肉打成膠後所製成，肉質尚算彈牙。

崩沙腩河$48
肉身腍軟，入口即化，冇牙阿婆都咬得入，而且略帶膠質，食後齒頰留香。

潮式滷水豬雜米$34
豬雜包括粉腸、大腸、腸心、肚及豬軟骨，最 buy豬軟骨，有嚼勁但唔會咬唔開。

食客街坊譚小姐
雖然呢度唔係開咗好耐，但我已經嚟過好多次，最鍾意食呢度啲牛腩，因為腩底好香好腍。

薰衣草餐廳　
地址：西環水街 9號 A鋪　
電話： 2858 0660
營業時間： 7:30am-9pm

細細粒　大地魚蝦肉摻雲吞

雖然新仙土瓜灣店開張已經半年多，不算新鮮事，但剛出爐的 2013年米芝蓮車胎人美食榜(即 300元以下有找的食店)，小店就榜上有名。店如其名，出名牛腩麵及咖喱，前者湯底用上 50kg牛骨、 20kg豬骨及 14周大的雞骨熬湯，過程中不停隔渣，湯身清澈但香濃，而牛腩大大件，牛味突出且肉身腍軟，咖喱棄用椰奶，務求令味道更辛辣，配埋店內麵包、薄餅食最啱。除了牛腩、咖喱，雲吞在蝦肉內加入大地魚，提升蝦肉鮮味， size細細粒，唔會迫爆口，雖然唔似老表入面個位細細粒咁爆，但亦無損驚喜！

蝦子清湯腩撈麵$46
雲吞蝦味濃郁，再加埋蝦子，鮮上加鮮。

咖喱牛腩河$38
咖喱辛香，愈食辣味愈出，分大中小辣，愛辣可選大辣試試。

鮮蝦雲吞麵$26
雲吞不算大粒，但入口蝦肉鮮香撲鼻，肉質腍軟，非常驚喜！

食客 Henry學生
鍾意呢度的咖哩，夠辣，辣得嚟牛肉好咬口。

新仙清湯腩咖喱專門店
地址：土瓜灣北帝街 29號八景樓地下
電話： 2590 6138
營業時間： 10am-12mn

特製　蝦子生麵

鮮鮑魚撈蝦子生麵$68
貫徹搞搞新意思的精神，麵內加入鮑魚，前所未聞。不過別要被鮑魚套去眼球，木耳選用東北貨，細細粒但好好咬口，還有芽菜、青豆、豆卜等，睇得出店鋪好注重客人健康。

未到麵店之前，聽到蝦子麵還以為是平時吃開在麵上放入蝦子的鹼水麵，不過這裏的蝦子麵，在製麵的過程中已經放入蝦子，所以每一個麵，麵身上都有無數蝦子斑點。
這個蝦子麵，乃店鋪開業前經過 3個月試味後特地要求供應商生產的，造麵時會將鴨蛋白、麵粉及蝦子打成麵糰，然後反覆擠壓，使之均勻細滑，最重要是，為令麵條口感更為軟滑，麵條成品後不會烘乾，保留「生」麵狀態，直接送到店內出售，相對市面上常見的「熟麵」，生麵保存期不長，必須當日使用，每日入貨，成本固然大增。除了用心製麵，店鋪亦主要走創意路線，主張菜單因應時令不時更新，搞搞新意思，例如當日有時令大蜆，店主就請筆者與攝影師試味，鮮甜美味，呢種 out of menu的驚喜，至 buy。

花菇蝦子海參撈蝦子生麵$68
生麵加入馬拉盞醬及瑞士汁去撈，更濃郁鮮香，花菇起碼有 5cm以上闊，海參 12cm長，勁揼本。

牛肉餅魚片頭湯麵$30
除了撈麵，這裡亦有湯麵，以車仔麵形式點嚟食。

碰碰麵撈麵專門店　
地址：旺角洗衣街 143號地下
電話： 2398 0810　
營業時間： 12nn-11pm