A貨騎呢
至於阮民安首惡搞版〈踩唔死我〉點擊率一星期亦過十萬，但 1,176個留言清一色插佢。
我嗰陣時我嗰陣時
最勁就係 E-Kids
乜嘢 BIGBANG
乜嘢 BIGBANG唔知佢哋喺邊
搜尋氣
賴死唔轉行 阮民安：唔通叫我做 sales咩？
02年以跳唱男子組合出道嘅 E-Kids成員阮民安（ Tommy），喺娛樂圈打滾 11年， E-Kids解散後一直冇斷氣，仲接連發生醉駕、欠債及賣假飛等事件，騎呢事一單接一單，被人笑佢似娛圈曱甴，卻堅持唔肯走。 32歲 Tommy上週二年廿八當日竟敢將 K-pop王 G-Dragon的 MV惡搞成〈踩唔死我〉放上 YouTube，結果，當然惹來 G-Dragon粉絲瘋狂圍插。
被人狂踩仍然得戚，只因他覺得自己堅係紅過。死守娛樂圈，他說：「唔通叫我做 sales咩？」有冇人請先？
惡搞 GD玩嘢
原版型仔
韓國萬人迷 BIGBANG成員 G-Dragon，單曲〈 CRAYON〉喺 YouTube點擊率超過 2千萬。
06年 E-Kids解散後， 3人各有發展，郁達人（右）去年 2月舉行過《 KASA郁達人音樂會》，而林詠倫（中）現教人跳舞， Tommy表示三人仍保持聯絡。
只得 5呎 4吋的阮民安，訪問堅持要戴黑超，對於騎呢新聞一單接一單，佢亦次次有解釋：「賣假飛我都係俾朋友害，我已經即場賠錢平息咗，警察都知，唔關我事！」是非纏身，連恩師兼前老闆阿叻公開說過：「唔會再理呢個人！」
雖然我𠵱家好少喺幕前出現，又冇唱歌出碟，但係我一直都喺呢個圈，我都叫有知名度呀！大家見我好似冇嘢做，其實我有去大陸登台表演拍電視劇，我係有收入㗎，都夠自己生活，不過我咁奀做咗冇人知啫！
我從來冇諗過離開呢行，我有好多嘢想做，我仲係 artist喎！唔通我出去做 sales咩？實俾人話我玩嘢啦！咁多年嚟，除咗頭幾年（ E-Kids年代）叫紅過吓，我都唔覺自己紅。好多人話我係小強，但我絕對唔係死心不息，只不過想繼續拍吓電影、唱歌，最終想有自己嘅製作公司，到呢一刻都係。
07年， Tommy加入寰宇後，與玉女江若琳傳緋聞，後傳 2人拍拖半年分手。
其實我都唔明點解，耐唔耐就有啲騎呢新聞（年初 BIGBANG演唱會賣假飛事件和冇錢交租被趕）發生，可能以前以為自己紅講嘢得罪人啦，人哋咪鍾意攞我嚟開玩笑。經歷咁多年之後，我突然諗到寫首歌嘲笑自己，用 G-Dragon嘅歌係因為佢係我偶像，加上呢隻歌內容都係叫人唔好咁認真，玩吓開心吓，同我嘅原意一樣。拍呢個 MV預咗俾 BIGBANG嘅 fans鬧爆，但係我好開心喎，始終都叫有人留意呀！我唔係想搞啲嘢出嚟等人知道我仲喺度，亦唔係想靠 YouTube翻身，拍 MV完全冇動機， just for fun。
好多人話我抄，又話我侵權會俾人告，如果咁都俾人告，咁「福祿壽」扮林峯同周星馳嗰啲咪俾人告死？我尊重版權、亦支持二次創作，大家放鬆啲去玩啦，唔使太認真嘅！ 
採訪、撰文：張佩姍
攝影：周凱瑩
化妝： Karrie Yun@Karrie Yun Makeup
髮型： Eton@double H Salon
服裝： JOYRICH
場地： Fantasy Factor
留言列表
{{ article.title }}
