壹號頭條
150噸膠珠 生態政治大災難
十號風球「韋森特」襲港期間，七個貨櫃被吹倒落海，六十億聚丙烯膠珠散落本港西南水域，漂浮至沙灘，堆積如雪；更漂到魚排，不少養魚疑因進食膠珠而死亡。事發後，環保團體發起執膠珠行動，市民一呼百應。
生態大災難擺在眼前，政府卻束手懶理，只一味愚民指膠珠無毒。生態、政治災難夾擊本港，署理特首林鄭月娥週一召開跨部門會議，展開「慢半拍」救災行動。
珠新聞在這個星期鋪天蓋地，一眾師奶圍在賣魚檔前七嘴八舌。「我驚食咗啲膠落肚呀！」本週二，家庭主婦李女士圍在牛頭角街市的魚檔前，向記者坦言擔心「膠珠魚」影響人體健康，決定暫時「罷吃」，不買任何種類的魚，「等政府做完嘢，真係無晒事先食啦。」
另一名家庭主婦袁女士同樣決定短期內不買海魚，以免誤食「膠珠魚」，「我就唔係好驚，但煮俾屋企人食都係穩陣啲好，呢排點都唔買（本地海魚）啦，深水魚又貴，惟有揀淡水魚啦！」
市民聞魚色變，不少魚檔檔主大嘆倒霉，檔主葉先生向記者大吐苦水︰「希望你哋（記者）幫我哋澄清吓啦，啲街坊以為依家咩魚都唔食得，但其實好多魚檔平時入好少本地魚，我就賣深水魚，紅衫、大眼雞嗰啲，全部都唔係本地魚，但係大家都唔敢買魚，生意跌咗兩、三成喇，我今日都入少三、四成貨，驚賣唔出。」另一檔主鄧先生的魚檔生意亦跌兩至三成，「好多街坊問我哋，啲魚有無膠珠，我惟有同佢哋澄清啲魚係喺南海運嚟，平時我都有賣本地魚，大概佔一至兩成，但我諗住入少啲啦。」
李女士擔心「膠珠魚」影響家人健康，索性暫時不買魚。
魚檔檔主葉先生向記者大呻好慘，為怕賣不出魚，倒蝕收場，少訂了近四成魚。（王偉洪攝）
魚排受災
養魚戶懷疑魚排內的死魚，是因誤食膠珠而反肚。
膠珠災難，禍起上月廿四日颱風韋森特襲港，在十號風球下，載有合共一百五十噸「聚丙烯」膠珠的貨櫃，被強風吹落海，貨櫃毀爛，六十億粒膠珠隨水漂浮，威脅馬灣、長沙灣、芝麻灣、蒲台等多個西南海域一帶的魚類養殖場。
「我哋要請人嚟打撈膠珠，近呢幾日批發商見唔對路，又唔肯收魚，日日都蝕緊錢㗎啦。淨係講我魚排啲魚，已經有四至五成嘅魚食少咗嘢，都唔知係咪食咗啲膠珠！」在大嶼山長沙灣養魚的離島區養魚業協進會主席鄭少華慨嘆，膠珠事件令他與其他養魚戶蒙受損失，估計小戶每天損失數千元，大戶每日損失一至兩萬元。
他批評政府未有通報，令養魚戶未能及早防範，「之前見啲膠珠係咁漂埋嚟，都唔知咩事，係呢幾日睇新聞先知咁大鑊，搞到依家都唔知餵唔餵魚好，驚佢哋食食吓連啲膠珠都吞埋。」
他希望政府盡快釐清膠珠對魚的影響，並協助他們向有關方面追討賠償，「搵人清理膠珠、賣唔到魚，樣樣都係錢，啲魚又唔食嘢、唔死但係養唔大，最後又係要蝕錢，希望有得賠啦！」除了西南海域一帶的養魚戶，其他區域的養魚戶亦相當擔憂，吐露港養魚戶羅先生指，夏天吹東南風，膠珠隨時流向新界東北區的養殖場，「暫時未見到有膠珠，最驚係十日八日後先漂埋嚟，但大家已經丟淡咗件事，到時我哋就唔知點算啦。」
膠珠襲港
環保團體揭發
颱風過後，大量膠珠陸續湧至大嶼山芝麻灣一帶的魚排，有漁民更撈起一整袋膠珠。
首先發現膠珠的是關注本港沙灘清潔問題的環保團體 DB Green成員 Tracey Read。「我第一日見到都嚇親，成個沙灘都俾膠珠覆蓋，有半隻小腿咁高，從來未見過。因為我知道膠珠留喺沙灘上嘅後果，所以我即刻通知政府同要令人知道。雖然政府無公布，但大家今日都知道了，一起來清潔。」上月廿五日，來自澳洲、在本港住了七年的 Tracey發現愉景灣附近的三白灣有三十袋印有「中國石化」字樣的聚丙烯，散落一地的膠珠多如積雪。
她即時聯絡中石化及多個政府部門，但政府卻一直對事件「放軟手腳」，直至上週六，傳媒廣泛報導，政府才於本週一急召跨部門會議，商討對策。
記者連日來到訪愉景灣、南丫島、東澳、石排灣等多個沙灘，見到不少市民自發到來清理膠珠。他們坦言，是從網上得知消息，部分人更互不相識，「我哋都係喺高登組團過嚟，因為睇過啲相知道呢度嚴重先嚟！」一班在東澳沙灘執膠珠的年輕人說。「最衰都係政府封鎖消息，係靠人傳人先知道，我明白政府唔夠人手處理得慢係正常，但係 common sense嚟講政府應該公布件事！」
不通報
膠珠襲港，全城哄動。根據《船舶及港口管制條例》，凡香港水域內有人、貨物或裝備墮海，須立即向海事處報告，並須於廿四小時內，以書面提交事故全面詳情，不過，上月廿四日當海事處知悉有一百五十噸膠珠墮海，卻沒有通知其他政府部門，亦沒有着手處理。
出事的貨輪「永信捷一號」是屬於廈門永信捷海運有限公司，原由廣州開出駛往汕頭，打風當晚途經果洲群島附近水域，其間有七個貨櫃被吹落海，當中六個載有「聚丙烯」膠珠，其餘一個載有玻璃樽。
中石化總經理李建國週日帶隊到南丫島石排灣清理膠珠，並向 DB Green的 Tracey了解災情（上圖），一直強調中石化在事件中沒有責任的他，週一接收社民連的請願信（右圖）。
（鄒潔珊攝）
各自為政
事發後三日，食環署和環保署才收到報告有海灘受膠珠污染，卻各自為政，亦未有向公眾公布事件，而環境局局長黃錦星和食物及 衞生局局長高永文則分別在事發後八日及十日才獲悉事件，不過，仍然不察覺事件的嚴重性，更從無打算向外公布事件。
環境局局長黃錦星在週日到沙灘視察，結果被市民當面斥責太遲公布事件，叫他「執膠」！食物及 衞生局局長高永文，被傳媒問到有關事件時，只不斷強調膠珠無毒，不會危害市民健康。
在群情洶湧下，特首梁振英仍然在本週休假五天，對事件不聞不問，政府見事態越演越烈，本週一上午署理特首林鄭月娥主持跨部門會議。
傳媒廣泛報道膠珠事件後，黃錦星才跑出來巡視沙灘，更問非所答答非所問，完全不在狀態。
政府後知後覺，事發後兩星期才舉行跨部門會議，研究解決辦法。（李育明攝）
政治災難
林鄭月娥仍然死撐政府部門溝通機制沒有問題，當中只有公布機制需要改善，又不承認政府故意隱瞞。高永文則辯稱事件有演化過程，當初評估並不嚴重，所以由各政府部門根據原有機制自行處理，到有需要時才向上級匯報。
面對已經造成的生態大災難，政府各部門完全缺乏溝通，環保團體不斷炮轟。「遲做好過唔做嘅，但嘈咗咁耐，政府先郁一郁，真係似補鑊多啲。」世界自然基金會高級環境保護主任（海洋）李美華批評政府透明度低，又於事發兩週後才召開跨部門會議，是「慢半拍」的行為。
她更不滿政府只重視食物安全，忽視今次事件對海洋生態的影響，「淨係講有無毒，人食咗落肚會唔會有問題，但係除咗俾人食用嘅魚類，喺附近海域有海龜，又有中華白海豚，希望政府長期監察呢批膠珠對海洋生物嘅影響，現階段最緊要就係盡快清走啲膠珠。」
對於漁民的損失、今次清理膠珠的費用，以及一連串追究責任問題，海事處指由於現時仍未確定貨櫃被吹落海時貨輪是否在香港水域內，所以無法確認能否追究，即使貨輪當時在香港水域內，亦要先與律政司商討。中石化發言人回應查詢時承認膠珠是由他們生產，事發時正託運給買家，所以即使有責任問題都應在船公司，不在中石化身上。
理工大學物流及航運管理學系教授閻洪指出，船公司在運貨途中，貨櫃墮海，對香港造成污染，港府可依據國際慣例，向有關公司追討賠償。「係咪船公司嘅設施有問題？定係有人為錯誤？如果對方用颱風係天災作為抗辯理由，咁究竟係船公司定係貨主決定喺十號風球下都要出海？只要證明有人或者公司出錯，成功追討賠償嘅機會就會大啲。」他認為，貨櫃墮海位置是否在本港水域並非重點，關鍵是當日貨櫃為何墮海，所以港府可以據理索償。
為息民憤，高永文週一到芝麻灣巡視魚排，安撫漁民。
不少熱心市民在炎熱天氣和猛烈陽光下，長途跋涉到離島執膠。
究竟膠珠有無毒？
浸會大學生物系系主任黃港住指，聚丙烯本身無毒，常用作製造食物容器，而有關膠珠屬惰性物料，不會主動吸收海中毒素，「大部分有機污染物，好似致癌嘅多氯聯苯（ PCBs），會積喺淤泥中，但啲膠珠係喺海水漂浮，除非啲海水真係好污糟，有機污染物就會黐住膠珠，但都要累積好長時間，先會變成高濃度嘅污染物。魚類食咗被污染嘅膠珠，大部分毒素會積喺魚肝、腸、腎等內臟。」
但他認為政府絕不能忽視有關問題，「膠珠留喺個海越耐，風險就越大，應該盡快打撈膠珠，亦要拎啲魚去驗一驗，長期監察膠珠造成嘅影響。」黃港住認為，大量膠珠流向海面，的確會影響海洋生態，「唔覺意食一粒半粒或者無事，但今次數量咁大，萬一啲海洋生物誤食大量膠珠，又消化唔到，積咗喺腸，隨時會食唔落嘢而死。」 
留言列表
{{ article.title }}
