驟眼看，這個組合有點怪。

不是容祖兒身邊不是「師兄」、杜汶澤身邊不是阿田的那種怪，而是二人目光的一致度，太合拍，怪！

「你晤好以為佢係天后，其實減番佢入行年資，中學生嚟咋！」杜汶澤以一副知心友的口脗道。

「係o架，我十六歲入行，之後好多嘢都有人照顧晒，唔唱歌我都唔知做咩好。」容祖兒旋即緊接。

在華麗的舞台上，容祖兒總是自信滿滿，其實有苦自己知，「我試過喺演唱會着住好重嘅水晶衫，又唱又跳幾首歌之後，一落台就係咁嘔。」

這一切，杜汶澤都記錄在案，用在他監製的電影《DIVA華麗之後》中。他經歷過人生高低起伏，由嘉多利山住到郊區村屋，反璞歸真；至於阿澤認識天后已久，但真正交心就只在這兩年間，明白她渴望平淡，「你估佢唔想好似普通人咁，踢拖落街篤魚蛋咩？得先得o架！」

那一致的目光，正看着對岸的平凡，正是華麗天后暫仍遙不可及之處。

 

被噓的幸福

「入行咁耐，我冇經歷過畀人噓嘅階段。」說這句話時，容祖兒並沒予人晒命的感覺，因為下一句已是：「我喺簽唱片公司之前，已經畀人彈鐘，直到簽『英皇』，即係我連畀人噓嘅機會都冇。」

她身旁的杜汶澤，護航地多加一句：「佢哋錫你吖嘛！就係驚你畀人噓所以先唔簽你呀！」

容祖兒報以一笑，拿起私家暖壺，喝一口暖水，再說：「我從來都唔覺得畀人噓，畀人批評係慘事，反而有啲幸福添！因為有呢啲嘢先可以令自己成長，做得好啲。

「初出道嘅時候，Mani會同我講，我爭啲台型，我就覺得，我可以變得好好，唔係一開始就彈出，但係通過做每樣嘢，我睇到自己成長，都係一件好事。」

劉浩龍（左二）在《DIVA》中飾演保母車司機，與容祖兒（右二）有不少對手戲。

有指「祖師戀」呈女尊男卑形勢，但實情只有兩位主角才最清楚。

出埠講男友

說到好事，不得不提容祖兒的戀聞，還算是新鮮熱辣的，自然是她跟劉浩龍這段情，祖兒到台灣宣傳國語碟，亦不忘一提「男友」，說：「我跟男朋友很好。」相對來說，訪問時她則較為含蓄。

「其實最大前提係開心，我明白人生去到某啲階段，係為咗呢樣嘢（開心），感情喺人生入面係有唔同嘅衝擊，工作亦都有好多唔同嘅選擇。喺感情上，我某程度係一個信直覺嘅人，而且感情係兩個人嘅事，錫我嘅人明白就OK。」

說得玄之又玄，天后對感情的演繹，大概可辦講座，但看着容祖兒一臉認真，老土一點還是要祝她快樂，不要學她戲中角色般迷惘尋死，她隨即回復調皮說：「梗係唔會啦！我唔會去到咁極端嘅。

「有唔開心嘅事，我好快就唔記得，我有呢樣好，聽吓歌、瞓吓覺就已經冇事。仲有，屋企人嘅支持係好重要，我冇（祖兒在《華麗》中的角色）咁消極。」

母親與弟弟在祖兒心目中佔有極重要的位置，最近她為其母慶祝過生日，才離港工作。

一吸一呼一線間

祖兒充滿正能量，而杜汶澤剛戰勝極罕見的米勒費雪症候群，正面思想直情超標，甚至到達極度活躍的狀態，除早段他不停為祖兒護航外，說到自己，他亦如是。

「應該咁講，個病對我嚟講冇乜特別，我唔怕死嘅，我哋日日都喺生死之間，只係唔覺咁解啫。初時話我有呢個病，我打坐嘅時候（即換上打坐狀），咁就呼吸啦！我吸一啖氣，咦，冇呼番出嚟喎，咁我等啦，等極都冇呼出嚟。

「嗰時我好calm，只係諗：『乜咁快就嚟？』再等多陣，終於呼番口氣出嚟。你諗吓，我冇噴番啖氣出嚟就係咁先。所以呢，唔使諗太多，如果我驚就分分鐘死快啲添。生命依家對我嚟講，好簡單，只係『依家』。」

大病已癒，阿澤夫婦二人再度活躍，把握活着的每一分秒。

死亡沒離我太遠

「活在當下」的大道理，未必需要杜汶澤的親身演繹，一般人亦略懂一二。只是阿澤親身經歷過生與死的臨界點，身旁還有與他走過低潮的田蕊妮，因病拜拜，捨得嗎？

「冇話捨唔捨得嘅，我死咗，阿田會有筆錢，我哋冇乜負擔，生活應該唔成問題。人難免要一死，我有個哥哥幾歲就去咗，你以為佢（死亡）唔喺你附近咩？日日都有人死啦！」

杜汶澤笑對死亡，說到阿田在他休養時對他的支持亦然。「阿田喺大陸拍劇，我日日喺度，唔同女仔就係咁嚟探我，薛凱琪、江若琳、容祖兒咁，啲女多到佢（田）即刻要返落嚟啦！」

為治病，阿澤與阿田遠赴美國閉關禪修。

搔八年之癢

一聽就知那是杜汶澤的另一番戲言，但他跟天后的友情，並非兒戲，而且二人在圈中浸淫多年，「自動波」功力深厚，以下為兩人的一段自由短打。

杜：杜汶澤　容：容祖兒

容：我哋第一次合作係八年前《身驕肉貴》。

杜：係喎，嗰時我都未簽「英皇」，一見你我就諗：「有咩可能一條友可以keep住咁high？」

容：我係咁o架喎。

杜：後尾先知吖嘛，所以一諗住開呢部戲，我就諗起你，部戲講樂壇天后，唔搵你拍都要問你攞料啦！

容：（向着我）佢真係好識套人料o架！

杜：唔係套料，我真係諗起你o架，我好記得，有次啱啱簽咗「英皇」，喺尖沙咀撞到你，嘩！你着住對八吋高踭鞋，仲要揸住一袋二袋，佢（一指容祖兒助手）又一袋二袋……

容：出function吖嘛。

杜：係囉，嗰一刻你踩住嗰對鞋，行嗰條凹凸不平嘅路，畀我感覺好顛簸。於是我諗，究竟一個樂壇天后，真實嘅生活係點o架呢？搵埋你拍就啱晒！

容：多謝喎奸製（監製）。

杜汶澤與容祖兒在《DIVA》中分別飾演經理人與藝人，有指電影是後者的自傳。

祖兒稱阿澤為「兄弟」，兄弟養病期間，她也登門探訪，予以支持。

奸製的美學!

容祖兒口中的奸製，於訪問拍照期間，手持一部古董寶麗萊充當攝影師，其中一幅就成了天后至愛，她還上載至微博分享。

一般人眼中的天后，則對本刊攝影師的作品甚為着緊，轉景時即執起攝影機，細研沙龍。

杜汶澤則保持近年一貫的從容，見天后檢視就說：「你覺得靚就靚o架啦！佢（指本人）都揀張靚嘅先出啦！」

美學只在乎主觀的心，本刊還兼顧商業元素，跟奸製一樣，有大眾收貨，才稱得上「掂」。

 

奸製的作品