近日無綫小生輪流曳曳，林峯、黃宗澤、吳卓羲紛紛換畫，而且三大小生都鍾情「國貨」，被傳戀上於內地出身的北方佳麗，搞到一身蟻。眾人北望，另一小生鄭嘉穎卻玩突出，撇甩內地模特兒女友徐靖雯後，轉而戀上本地薑，更特別喜愛「鬼鬼哋」的華姐，向陳豪學習。

本刊發現，鄭嘉穎趁與苟芸慧在《怒火街頭2》演夫婦，不時借故討好對方，並安排多場激咀戲以求擦出火花。可惜，卻久攻不下，於是轉攻另一華姐宋熙年。早前，鄭嘉穎便相約女方去酒店吃自助餐，兩人撐枱腳之時言談甚歡，鄭嘉穎完全懶理宋熙年有男友陳智燊，頻頻大獻殷勤。

鄭嘉穎與宋熙年傾得十分投契，席間女方偶然放聲大笑，還不時深情地凝望着男方。

早前，鄭嘉穎與內地模特兒徐靖雯傳出緋聞，女方更在他家逗留七十二小時，但他死口不認情侶關係，其後兩人一齊出席活動時，他還刻意避開。

提高警覺

今年四十二歲的鄭嘉穎，自年多前被拍到，招呼國產女模徐靖雯到西貢村屋相聚七十二小時後，因為懷疑對方放料，即時主動提出分手，至今一直保持單身。而徐靖雯見鄭嘉穎唔肯認頭，也火速搭上香港富二代歌手周子揚，兩人撻着後高調承認對方身份，並不時遊街示眾，似是對鄭嘉穎發出無聲抗議。

有傳無綫高層樂易玲，眼見最近一眾小生紛紛「食完」國產靚女後中招，曾特意召見鄭嘉穎，提醒他應以事業為重，建議他於這幾年搏殺期「禁慾」，尤其要遠離主動親近的內地女子。鄭嘉穎亦見過鬼怕黑，不禁對飛來蜢提高警覺，死忍爛忍。不過，早前他拍《怒火街頭2》，卻轉而迷上「鬼聲鬼氣」的苟芸慧，有工作人員透露：「鄭嘉穎個人平時黑口黑面，扮晒巨星款，但係今次拍《怒火2》，佢成日講笑扮cutieo氹苟姑娘（苟芸慧），又成日撩佢自拍合照。

用餐期間，有食客認出鄭嘉穎，於是上前打招呼，宋熙年竟然表現得十分尷尬，整個人傾側。

前幾日套劇搞首映宴，佢仲主動同苟姑娘頂酒添，其實佢想撩個女仔飲酒就真。你話冇嘢就假，仲有呀，平時啲戲邊有咁多咀戲？今次佢兩個成日咀，唔知係咪有人特登安排嘅？」據知苟芸慧拍《怒火2》時，正和○八年香港先生少年組冠軍羅天宇拍拖，曾公開表示只愛男友一個，今年二月兩人雖然宣布分手，但鄭嘉穎似乎仍未能乘虛而入。

對○九年的國際中華小姐冠軍苟芸慧久攻不下，鄭嘉穎竟轉攻○七年華姐冠軍的宋熙年。本刊早前發現，在銅鑼灣出席完活動的鄭嘉穎，刻意避開耳目，駕車到尖沙咀東部香格里拉酒店，原來他相約了宋熙年歎下午茶自助餐。比女方早到的鄭嘉穎，還甚有風度，幫對方揀食物及斟咖啡，後來宋熙年過了半小時才到達，卻無阻兩人雅興。兩人愈吃愈開心，宋熙年更不時大笑，看來甚冧男方。其後有食客認得鄭嘉穎，過來打招呼及要求合照，宋熙年竟然即時尷尬彈開，未知是介意沒有人認得自己，還是怕被人發現和鄭嘉穎撐枱腳，會令男友陳智燊不高興呢？