探熱針
新碟冇宣傳 逼唱 out歌 陳法拉開拖鬧老細
陳法拉終於一嘗心願，由花旦變成歌手，上月底在零宣傳情況下「秘密」推出首張 EP，只賣了個多星期，仍未知銷量如何，但唱片公司老闆何哲圖，已下定決心，不再與對方續約。
據知，向來有性格的陳法拉，對唱片公司各種安排均不滿，更毫不留手，親自打電話鬧老闆，雙方陷入僵局，何哲圖更即時 cut晒陳法拉所有宣傳，無聲無色地，幫她出了張 EP算數。
出師不利
撈過界做埋歌手的陳法拉，出師不利，首次以歌手身份上《勁歌金曲》唱 live，出現連環走音，落人話柄，處女唱片才上市個多星期，就接獲「星揚娛樂」公司老闆何哲圖不再續約通知，令她變成一碟歌手。
出碟時間同斷絕關係近乎同步，何哲圖此舉擺明落陳法拉面。據知二人除了在簽約初期有商有量外，關係持續惡化。
「法拉向來都好有個人立場，好似明知 Herman（何哲圖）鍾意啲歌手陪佢食飯宵夜擦佢鞋，法拉偏偏唔俾面，堅持唔去呢類飯局。所以到佢同 Herman話想唱啲比較另類嘅歌，唔想淨係唱 K歌， Herman亦睬佢都傻，偏偏揀咗一大堆國語改編歌俾佢唱，法拉覺得依家都唔興唱改編歌，覺得好 out，加上不滿 Herman迷信，指定要佢著黑白色衫，雙方關係愈拉愈緊。」陳法拉身邊人說。
上月中，法拉同 Herman出席記者會，兩人在台上已經冇交流兼面左左。
第一次上《勁歌》唱 live，陳法拉狂走音，最後要錄四次先收貨。
同屬無綫花旦的鍾嘉欣同陳法拉簽埋同一間唱片公司，但待遇有很大分別，鍾嘉欣深得 Herman愛錫。
週二（ 7/8），法拉出席唱片活動，老闆 Herman沒有出現，只派了兩名職員到場，而法拉被問到有關不獲續約問題，她都極為迴避，乜都話唔知。
聯手封殺
Herman企硬要陳法拉唱改編歌，她最終唯有妥協，但出來的反應同她預計一樣，被批評老土，所有電台的流行榜都上唔到，就連本身所屬的 TVB勁歌金榜都一樣。
「法拉見到咁梗係唔滿意，叫經理人打俾 Herman，點知對方冇反應，法拉就自己嚟，打俾 Herman，仲將所有不滿數晒出嚟，投訴咁耐以來做得一次電台宣傳同上過一次《勁歌》，之後就再冇安排佢做任何唱片宣傳，又話佢揀嘅歌唔掂，開晒拖！之後 Herman就叫埋掌管 TVB綜藝科嘅老婆余詠珊幫手，聯手打壓法拉，唔安排佢喺節目度唱歌，無綫親生女都無情講。」一名幕後工作人員說。
勢成水火，陳法拉明知唱片公司不會再為自己宣傳落功夫，唯有不停在微博推銷新唱片，自行促銷。
唱片公司唔宣傳，陳法拉唯有在微博谷銷，在網上搞預訂，送簽名又送海報。
陳法拉能唔能夠繼續做歌手，要睇「老公」薛世恒屋企所開的 Neway唱片會否收留「家嫂」。
唱唔掂
無綫近年力谷藝員多線發展，不斷將旗下小生、花旦力 sell給唱片公司，簽約做歌手，當中幾乎全軍覆沒，只有林峯一個仲有得唱。
黃宗澤
08年， Bosco泊到林建岳碼頭簽約東亞做歌手，先後推出過兩張專輯，但反應未如理想，近年已再冇新歌推出。 
徐子珊
09年，徐子珊加盟恒藝亞洲唱片公司，更推出首張個人唱片《 Kiss Me》，做跳舞歌手，奪得多個新人獎，可惜一年後，恒藝亞洲倒閉，徐子珊再搵唔到新碼頭出碟，歌手夢碎。 
吳卓羲
05年，吳卓羲主唱劇集《酒店風雲》的片尾曲《別怪她》，唱到街知巷聞，後來簽約 BMA進軍樂壇，推出過一張唱片便絕跡樂壇。 
王祖藍
08年，王祖藍在英皇歌唱大賽中擔任表演嘉賓，被吳雨睇中，簽約成為唱作歌手，先後推出專輯《處處祖藍》及福音大碟《 All about Loving You》，但銷量麻麻。
留言列表
{{ article.title }}
