後台唔收花籃折現做善事，前台亦甚少觀眾送花，相信歌迷也是響應學友的「捐款派米」行動。
紅館睇騷
拒收花籃　折現贈米　 50歲學友個唱斬件上
2011年04月21日
繼○九年舉行過百場「世界光年巡迴演唱會」，張學友捲土重來，去年尾開始，先在上海、廣州、北京及成都等地舉行了三十一場「 1/2世紀演唱會」，計埋進行中的香港二十場，以及打後至十一月份暫定在台灣及新加坡等地的廿多場巡迴唱，進賬過億。
三年來唱唔停，年屆五十的學友寧願賺少啲，香港站分段進行，唱五場休三日，間住唱回氣，但求以最佳狀態演出。為歌迷着想外，學友更謝絕朋友送花籃，寧願要大家折現，買米佈施。
唱五場抖三日
為數二十場的「 1/2世紀巡迴演唱會」上週四開鑼，無論 opening的小型音樂劇、搖滾系列及經典快歌重現等部分，學友都跳到身水身汗，年屆五十，平日雖然有 keep住打網球、做 gym、跑步，但近年常被聲帶勞損問題困擾，為免重蹈失聲覆轍，他索性 book了一個月紅館檔期，個唱分段進行，唱五場抖三日，斬件上！
「學友本來可以破自己嘅場數紀錄，但為免影響聲線同體力，寧願間住做，唔開騷嘅日子，單係場租每日蝕幾萬，但佢想演出水準有保證，賺少啲冇所謂。」學友身邊人說。


又唱又跳，學友在音樂劇環節與女 dancers跳足半個鐘，有不少抱起翻身超難動作。


劉強舒淇幫拖
今次演唱會，有聲有畫，學友重金禮聘劉偉強做導演，舒淇做女主角，拍了一套短片，配合《花花公子》、《你是我今生唯一傳奇》及《你的名字我的姓氏》等十首作品，同步播放，短片講述他與舒淇經歷互相傾慕、拍拖、結婚、濃情轉淡到最後白頭到老的愛情故事，「呢個小音樂劇講咗我對愛情嘅睇法。」學友說。不期然令人聯想當年他與老婆羅美薇感情，出現危機的傳聞。
晚晚唱足三個鐘，學友預告叫觀眾要準時入場，八點三開騷，逾時不候。


唱經典快歌，學友重演當年 hit爆的《餓狼傳說》、《這個冬天不太冷》及《頭髮亂了》等經典跳舞及招牌動作。
 
發哥發嫂首場到紅館睇學友演出，到 encore部分才離開。
 
搏到盡的學友在個唱上擘一字馬後還彎身抱腿，跳舞時又來一個燕式平衡加大鵬展翅動作，全部高難度，年屆五十，寶刀未老。 


派米唔收花
近百場巡迴，內地如成都站最貴飛售價四千人仔，北京等其他地方亦要二千幾，香港站貴飛六百八十，最抵！進賬過億的學友不忘做善事，要求各方好友將送花籃的錢捐出贈米。
「學友覺得買花浪費金錢，啲花籃要揼又唔環保，所以將朋友嘅心意集齊，買米捐去團體，霆鋒、栢芝、 Chilam、袁詠儀、草蜢等都有響應。」演唱會工作人員說。


與舒淇拍攝的小型音樂劇不乏嘴嘴鏡頭，學友與女 dancer坐在飛天韆鞦， ending時大銀幕打出學友對愛情的睇法：「……一段關係如缺少了愛與包容，就注定會失敗。」 


學友以一曲《月巴女且》懷念故友，與台上特大肥姐吹氣公仔及卡通肥姐大跳勁舞。

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stinglife 發表在 痞客邦 留言(0) 人氣()

    E-mail轉寄