阿妹，我叫林曉峰搵你做二奶！（真實對白）我有你就夠啦，阿哥！（設計對白）

《盛女》停不了呀！雖然五位「盛女」中，得Suki搵到男朋友Zion，又盛傳對方係「溝女王」，唔知呢鋪係咪搵到真愛，但相比其他冇拍拖嘅，試吓又無妨喎！不過媽咪姐認為真正有「着落」嘅，係「義氣女」Bonnie同「整容人生教練」Winnie姐先啱，事關佢哋冧得掂現任商台CEO陳志雲。陳總開句聲，881台就專登喺凌晨12點半黃金時段搞咗個《大龍鳳》節目俾佢哋，仲搵埋開咪經驗豐富、口才了得嘅林曉峰做主導傍住，使乜驚呀！


第一集打頭炮搵咗錢嘉樂做嘉賓，單係佢同Bonnie似失散龍鳳胎呢點已經有noise啦。第二集仲厲害，林曉峰出動老死鄭伊健……女友，即「阿嫂」蒙嘉慧，聽吓佢大談「伊麵」，成功拱照「盛女」。聽咗兩日，媽咪姐就覺得Bonnie仲未適應做一小時節目， 佢只係講咗唔夠15分鐘嘢，要努力學習喇！不過曾做小三嘅佢自爆特別鍾意壞人：「志明（電影《春嬌與志明》的男主角張志明）呢種我遇過呀！靚仔、花弗、口多多，身邊女伴多到四圍轉，對我呼之則來，揮之則去。但我仍然聽佢使囉！覺得佢對我唔好係應該㗎。」嘩！為乜做女仔做到咁犯賤呢？阿女，媽咪姐自問無本事做你嘅人生教練喇。只可以贈你兩句——愛自己，男人先會愛你呀！


早前，幾位「盛女」同人生教練Winnie姐得陳總引薦，可以連續幾晚踩上陶傑的《光明頂》做嘉賓。你睇Winnie姐幾風騷囂張，似乎佢早已知道入台成功。

《盛女》編導岑應好吹得
講起志雲愛將，其實仲有位無綫新聞部編輯岑應！佢被大師欽點，借調去製作《盛女愛作戰》，做導演又寫埋稿。據知岑小姐亦係一名「盛女」，同節目中嘅「盛女」Mandy係friend，經常相約夜蒲飲嘢。當然，除咗飲得，岑小姐吹煙都一樣咁得，有相你睇㗎！ ####


錢嘉樂（圖）認真唔話得，為咗拱照Bonnie，趕收工去商台幫手。 而Bonnie似乎好冧，離遠見到人已經say定hi。之後嘉樂仔仲戴埋假髮扮Bonnie，更自嘲大家嘅鼻窿大最似， 成功幫Bonnie爭到報紙版位。


俾失散龍鳳胎搶晒鏡，Winnie姐惟有離奇露吓條後腰醒一醒。再睇真啲，佢都幾認真地帶埋iPad去開咪，仲同手袋仔襯埋色㖭！


岑應（左）經常相約friend底「盛女」Mandy（右）夜蒲隊酒，仲唔介意上載「面書」任你睇。


早前，岑應陪班「盛女」去尖東帝苑酒店做訪問，佢趁空檔同工作人員出門口吹水。


兩分鐘後，佢拎出純薄荷萬揸上手，撈味十足， 好有大家姐風範喎！慘在佢同事要局吸二手煙呢。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄