何超雲狠飛皮草太子黐表哥　超雲：改變一個人真係好難忽然1周 784期－娛樂八掛大放送★

賭王何鴻燊三房長女何超雲（Florinda），今年1月與皮草太子王大業（Andy）撻着，但兩人拍拖半年便屢傳分手。上周五（7月30日）超雲直認兩人性格不合，將男友降呢做朋友。據知超雲狠飛男友，除因對方不懂o氹她外，亦因賭王不喜歡男方太cool。超雲曾嘗試作出挽救，企圖改變男友，但男友卻依然故我，令超雲忍不住於facebook大呻：「原來要改變一個人真係好難。」
改變唔到男友惟有分手，超雲轉頭已黐住表哥Ricardo，並於facebook大晒貼面合照。超雲又靚又青春，甩拖使乜驚！

facebook爆分手
何超雲與王大業今年1月開始拍拖，二人不時於facebook晒恩愛，6月兩人仍是甜蜜蜜，但7月已經愛情急轉彎，最後超雲宣布回復單身，更獲異性朋友支持，朋友Duck wong說：「大家有機會喇！」認真搞鬼。

上月初社交圈已傳出超雲與拍拖半年的王大業醞釀分手，其中一個原因是王大業得罪賭王。知情人說：「賭王出名好風度，好少擺明唔鍾意一個人，賭王嫌大業太cool唔識做。每次到大宅，大業都好少同賭王傾偈，所以賭王亦好少理佢。到後期大業送完超雲到大宅就走，過門不入，搞到雙方關係更僵，令超雲好難做。」

晒表哥親密合照

超蓮爆家姐心情好
本周日（1日）賭王三太陳婉珍及二女兒何超蓮於東港城出席東華活動時，提到超雲分手，三太撐女兒冇公主病，而超蓮則說：「佢哋兩個嘅嘢唔好問我，但家姐心情ok，仲好興奮去睇林峯。」

寧睇波唔陪女友
知道爹哋唔鍾意，超雲即要求男友o氹賭王，可惜王大業我行我素，唔聽女友枝笛。知情人說：「超雲想男友做啲嘢o氹吓賭王，但大業日頭要返工，連陪女朋友嘅時間都唔多，點會再花心思諗計o氹賭王，超雲覺得男友唔夠錫佢，隔膜咪愈嚟愈深。」至於外傳二人因「公主病」對「公子病」各不相讓而分開，知情人承認：「超雲嬌生慣養，梗係要求男朋友樣樣都服侍周到，但係大業本身家底都唔差，拍拖初期都會做足門面功夫，但相處耐咗就覺得唔需要。超雲咪覺得佢唔夠殷勤，未做足男朋友本份，感情迅速冷卻。」
記者在超雲facebook發現，6月底王大業仍以「LG（老公） love u too」向女友表愛意。到7月11日超雲竟在facebook留言：「原來要改變一個人真的好難，甚至是沒有可能，道歉不等於明白，明白更不等於付諸實行。」據知當時正值世界盃尾聲，熱愛睇波的Andy，放工寧願睇波都唔陪女友，搞到超雲好冇癮。7月22日超雲更以英文寫道：「single VS in relation？don't know which should I choose...struggling.」，披露正在考慮分手，但仍在掙扎。想不到翌日她已將facebook個人資料，由in a relationship（拍拖）改為single（單身），決絕分手。

與表哥甜蜜合照
上周五（7月30日）甩拖的超雲由男助手陪到紅館欣賞林峯演唱會，她直認同王大業分手。不過她亦留有一線，「依家係冷靜期，兩個人相處耐咗，認識多咗，有少少唔夾好正常。」
呢頭宣布甩拖，超雲轉頭已於facebook大晒與表哥Ricardo的親密合照，情傷迅速痊癒。記者將照片給超雲媽咪三太陳婉珍看，並問兩人可有發展機會，她即說：「超雲冇咁快有新男朋友，呢個係我家姐個仔，我哋兩家好多時都有家庭聚會，親戚之間嘅感情好好。」
其實何家早有閉門一家親先例，如三太陳婉珍的六家姐陳婉芳，前夫便是賭王胞姐六姑娘何婉文的次子孫鏡祺，另外賭王堂弟何鴻章與賭王胞妹十姑娘何婉琪早年亦大玩姊弟戀，並誕下何東舜銘，所以超雲和表哥發展不無可能！

半年情快來快去

何超雲上周五（7月30日）公開宣布與王大業分手，記者嘗試聯絡一直未表態的王大業，但他將電話轉駁到公司，同事一直以：「佢開緊會」來迴避記者。