邊個話娛樂圈人情薄？有樂壇教父之稱嘅戴思聰上月病逝，周二（3日）喺北角香港殯儀館設靈，周三（4日）出殯。兩日來，唔少佢生前嘅學生，當今樂壇嘅天王天后，紛紛到場致祭，祈求老師一路好走。
劉德華全程照顧師母
劉德華雖然跟戴老師學唱歌只係一段短時間，但佢非常有心。出殯當日，佢一早10點鐘左右已到達殯儀館，而且喪禮上坐足全程，之後跟埋上山，仲去埋解穢宴，佢嘅心意真係可見一斑。二五話俾媽咪姐聽，喺靈堂內，劉德華一直陪喺戴師母身旁，兼且扶出扶入，照顧周到。因為咁，連身為義子嘅陳曉東亦埋唔到戴師母身邊，可以專心扶靈。
東東跪辭義父
辭別儀式開始，陳曉東以義子身份跪拜戴老師，成個頭貼到落地，十分懇切。之後再講咗段悼詞，憶述同戴老師嘅往事（右圖）。
王菲唔怕相沖
今個月8號就41歲生日嘅王菲，唔怕相沖，專程由北京來港出席喪禮。周二傍晚六點，佢去到殯儀館。二五話佢有入後堂瞻仰戴老師嘅遺容，仲雙手合十唸經足足十分鐘。
黎明沉默哀悼
咁啱咁蹺，王菲前緋聞男友黎明喺王菲到場前幾分鐘嚟到。二五話佢坐喺禮堂家屬旁邊第一排，王菲就坐喺佢後幾排，但兩人完全冇交談，只係分別同戴師母擁抱慰問。Leon逗留咗約一個鐘後離去，全程差唔多冇開過口，實行以沉默悼念良師。
8月4日出殯
戴住黑超，一面嚴肅嘅劉德華，早上十點左右抵達靈堂，雖然一言不發，已引起混亂。
劉德華全程坐喺前排，專心聽親屬致悼詞。
出殯時，佢雙手扶實哭成淚人嘅戴師母。
喺火葬儀式後，佢跟隨大隊坐旅遊巴往銅鑼灣富豪酒店出席解穢宴。
抵達酒樓，由於記者眾多，佢一手扶戴師母，另一隻手又要扶實戴蘊慧。前一晚常伴喺師母身邊嘅東東就殿後（下圖）。
8月3日設靈
王菲喺助手（右）陪同下抵達靈堂時，一言不發，但就企定定任影，大會安排兩個保安貼身照顧。
湯鎮業（右），同其餘兩虎黃日華（左）、苗僑偉（中）一齊到場。湯鎮業翌日仲有份扶靈。原來佢哋當年都跟過戴老師學唱歌。
到晚上十點幾，家屬燒祭品俾老師，戴蘊慧（左）、戴辛尉（右）兩姐妹哭成淚人。
身為義子嘅東東，亦雙手合十禱告。
Leon由唱片公司高層王凱文（右）陪同下到場。現場有唔少圍觀者叫佢，但佢一言不發急步進入殯儀館。
曾被禁入靈堂嘅鄭嘉穎，當晚喺電視城開工，佢同記者話：「依家心情好複雜，搵到唔阻到人嘅時間先去拜祭老師！」
留言列表
{{ article.title }}
