娛樂八掛大放送★

近年港姐被插質素每況愈下，所以六嬸方逸華下令今屆港姐要重振聲威，仲搵咗高層何麗全全權負責揀蟀。結果今屆平均質素真係回升，不過大熱之選8號彭慧中同11號李文煊，因為負面新聞纏身而冇得留低。新鮮出爐的三甲因為唔夠靚而俾網友勁插豬扒，無綫再次老貓燒鬚。
班網友群起圍插句句到肉，先插季軍莊思明似周啟邦獨子周國豐。繼而再插冠軍陳庭欣包面大牙肉，同前港隊籃球三分王翁金驊係失散兄妹。除了大牙肉，本刊更搵到陳庭欣喺英國讀大學時嘅恐怖包面相，睇嚟佢為咗選港姐，都好努力瘦面喎！

賽前陳庭欣（Toby）表現同外貌均屬陪跑分子，唔似得8號彭慧中勁多新聞，又冇季軍莊思明有拿督老竇撐腰，22歲任職人事顧問的陳庭欣爆冷跑出，即被網友狂插係豬扒港姐。
本刊記者發現陳庭欣在TVB官方網誌內，放了不少在英國曼徹斯特讀大學嘅生活相，相中素顏嘅佢唔單止有大牙肉，其包包面黑眼圈更見礙眼，點睇都唔似港姐冠軍。陳庭欣在努力瘦面同經無綫改造後，才開始見得人。

上海有男友
雖然決賽前夕突然爆出陳庭欣因冧掂康泰太子爺黃進達（Jason）而奪「旅遊大使獎」，不過決賽當晚，她大方向傳媒表示已有一位拍拖年半的內地I.T李姓男友，她說：「我男友都好支持我參選港姐，佢喺上海工作，起初佢都有唔開心，因為港姐要集訓，我哋有成兩個月冇見面。不過佢都好體諒我，我贏咗之後都即時打俾佢，我哋仲約好今個月尾我生日時一齊慶祝。」
賽後陳庭欣坐大會車直駛入黃竹坑已婚警察宿舍，原來其父親是警務人員，只屬小康之家，難怪陳庭欣得獎後說：「我唔使靠人幫手，亦唔擔心俾人話造馬。」

無綫被指賽果不公
而另一位被網友喪插嘅港姐季軍莊思明（Lisa），一開始就挾着莊思敏個妹之名參選港姐，成為傳媒焦點，未正式入圍已被網友踢爆有個開酒吧嘅TB密友李詩藍。Lisa成為港姐季軍後，又被一眾網友指她貌似周國豐，有網友甚至提意Lisa參選港男。除網友狂插外，廣管局亦收到11宗不滿莊思明奪得季軍嘅投訴，亦有2宗投訴港姐賽果不公平。睇嚟港姐呢個名銜真係唔係個個都受得起。

莊思明被封猩猩季軍
莊思明攞季軍後俾人話屋企有米，仲有著名大狀清洪做後台，再加上決賽當晚俾髮型師大整蠱set咗個花師奶頭，唔少網友都話莊思明似男人，甚至有人覺得佢似周啟邦個仔周國豐。最慘都係有網友話佢似猩猩同狒狒。不過莊思明好大方，仲喺微博上多謝大家手下留情。

大熱彭慧中贏人氣
雖然彭慧中大熱倒灶，不過憑其甜美樣貌及驕人身材，瞬間就被無綫高層樂易玲同何麗全[目及]中，慶功宴上多位高層更主動同佢傾偈（右圖）。問樂小姐對彭慧中嘅印象，佢話印象都幾深刻，「我都睇好佢，不過當晚只係傾兩句未算深入，之後我哋都會叫佢返TVB casting，到時再詳細傾。」

港姐冠軍得主陳庭欣身材平均，決賽當晚表現穩打穩扎，不過就有唔少網友批評佢笑得肉酸，得獎後大笑露牙肉甚無儀態。

陳庭欣爆冷奪冠後，一眾佳麗只顧湧向亞軍張秀文同季軍莊思明，冇人即時上前祝賀佢，睇嚟佢人緣認真麻麻。

09留學照
曾於英國曼徹斯特讀大學嘅陳庭欣，於英國寓所外拍照，當時陳庭欣闊面猶如Pizza一樣，與現時瘦面甚有距離。而相中手拿相機、與陳庭欣穿情侶裝嘅男仔，疑似陳庭欣在英國認識的I.T李姓男朋友。

2010年奪冠
奪冠後返警察宿舍
陳庭欣爆冷奪冠後，由大會車送返位於黃竹坑已婚警察宿舍，上樓後更與一眾追訪傳媒揮手道別。

大學畢業
去年陳庭欣大學畢業，其父母及一眾親友遠道從香港飛去英國出席愛女畢業典禮。不過因為當地經常落雨，所以一班人被迫留喺室內影畢業相。

做兼職Sales
家境只屬小康的陳庭欣課餘都要到名店Huge Boss做Sales賺錢，圖中的外籍女士是其同事。

全家祝賀
陳庭欣返家前，約三十名親友已於其住所內舉牌等候，其父母亦顯得相當興奮。

收利是
為咗攞個好意頭，陳庭欣入屋後仲向每位長輩攞利是。

拿督老竇送車賀女
莊思明選港姐，拿督老竇莊寶同阿媽高調撐場。本周一晚（2日），莊氏一家去中環萬年大廈嘆中菜慶祝，莊思明順應記者要求錫拿督老竇，拿督仲話打算買架車俾阿女當獎勵。

無獎一身輕嘅彭慧中，在慶功宴上盡顯鬼妹仔性格，四出同人搭訕，仲同叻哥傾得好開心。