兩個轆專區

單車電影節 2013踩入香港

2013年01月16日 ~~ 第1095期交易通．搵車快線

單車熱浪流遍世界各地，經過二百幾年嘅演化之後，單車除咗係一種運動之外，仲已經昇華成為一種文化藝術。而呢種文化藝術不單喺香港，其實喺世界各地亦同樣無間斷地成長。作為單車發燒友，如果有機會能夠感受一下世界各地單車嘅文化氣息嘅話，當然係一世難忘。今年，呢個機會就終於喺香港出現！

舉辦咗 13年嘅單車電影節（ Bicycle Film Festival，簡稱 BFF），一直以嚟從世界各地搜羅過無數咁多部獨立影片播放，目的係想透過單車種種故事，表達出人們嘅喜怒哀樂，帶出單車背後嘅深層意義。嚟到 2013年，單車電影節終於首次來到香港藝術中心舉辦，今次主辦單位除咗準備咗 6個單元嘅單車電影之外，仲同場加映單車攝影展及古董單車展。車友們不妨趁住呢個機會，一齊感受一下單車無限嘅可能性！

2013單車電影節　香港站

地點：香港藝術中心
日期：即日起至 1月 25日
網址： http://www.hkac.org.hk

用單車發放正能量

單車電影節創辦人 Brendt Barbur

單車電影節源於 2001年嘅紐約，創辦人 Brendt Barbur喺一場單車意外之後，啟發出開創單車電影節嘅念頭。 Brendt Barbur認為，雖然單車令自己遇上重大意外，但如果熱愛單車嘅話，就要更加識得用正面嘅態度面對。「我希望能透過單車電影節，建立出一個與電影、音樂、藝術相關嘅交流平台，向所有熱愛單車嘅人發放出正能量，將踩單車美好嘅經驗分享到世界每一個角落。」

向香港啟航

香港單車電影節主辦單位 Flwrider負責人 Brian

單車電影節多年嚟巡迴全球舉辦，去過倫敦、多倫多、洛杉磯等大城市外，就連墨西哥都舉辦過，已經成為咗世界最具規模嘅單車文化活動之一。今次「 2013香港單車電影節」活動由 Flwrider主辦，一系列嘅活動仲包括有古董單車展、單車攝影展。今次香港能夠成功舉辦單車電影節，全靠 Flwrider負責人 Brain向 Brendt Barbur推薦香港呢個彈丸之地。
「喺 2007嘅一次 Fixed Gear單車聚會中我認識咗 Brendt，知道佢一直都有搞單車電影節，所以都好想佢試吓喺香港舉辦。但着手做起嚟原來難度好高，一直都解決唔到播放電影嘅場地問題，一般戲院好似百老匯、 UA當然唔會睬我。直至認識到香港藝術中心嘅負責人，詳細傾咗個計劃之後，我哋喺 2012年年尾終於決定舉辦。」

自發性投稿

每年將電影投稿嘅情況踴躍，篩選過程 Brendt花盡心機。

第 13年嘅單車電影節，一如既往，所有電影都係獨立電影。而每年嘅 1至 4月， Brendt就會接受投稿，被選出嘅作品就會於下屆嘅單車電影節中播放。 Brendt話，雖然冇任何獎金、禮品，但每年嘅投稿情況都非常踴躍，收到過百部電影。「每年所選擇嘅影片要求，都會因參展嘅地方而有所不同，好似台灣地區，我哋就會揀一啲節奏效快，但較少對白嘅電影為主，因為台灣人英語能力會較歐美地方弱。而今次香港，就揀番一啲以紐約市為背景嘅電影為主，目的係想帶出發源地係紐約嘅訊息。」

電影重點推介

今次香港首次舉辦嘅單車電影節，將會為香港嘅朋友播放一共 50套以單車為主題嘅微電影。 Brendt已將咁多部電影組合成 6個單元，可惜電影已經喺剛過去嘅五、六、日頭 3日於 agnè s b.電影院播放。不過，直至 25/1都會喺展館內輪流播放，想睇就要入場捕吓心水影片嘞！睇過嘅搞手 Brian重點推介嘅有，單元一〈香港愛紐約〉嘅〈絕密秘技〉；單元四〈單車遊世界〉嘅〈極速野貓戰〉；以及單元六〈刻骨銘心之旅〉嘅〈念愛兒〉。

《極速野貓戰》

極速野貓戰其實係美國一個速遞公司之間嘅比賽，喺影片裏面，攝影師係會以第一身嘅拍攝手法追蹤其中一位參賽者，喺馬路同車之間左穿右插。完全感受參賽者追趕時間嘅緊張節奏，坐定定睇都令人有窒息嘅感覺。
娛樂性：★★★★★
藝術性：★★★★★

《念愛兒》

講述一名單車場地工匠對過身車手兒子嘅思念，呢名工匠仲騎住愛兒嘅戰車，去完成佢無法完成嘅路程。將父子感情描述得真摯細膩，絕對係一部扣人心弦嘅作品。
娛樂性：★★★★
藝術性：★★★★★

《絕密秘技》

講述一名滑板高手嘗轉玩花式單車嘅過程，雖然片長只係短短 5分鐘，但場面緊張，有時睇到主角失手，都會戥佢覺得痛。
娛樂性：★★★★★
藝術性：★★★

罕見珍藏車

Spin Carbon以碳纖製造：重量不到 6磅。

點樣玩單車其實真係好個人，主流嘅梗係拎出街狂踩，有啲就鍾意喺部單車上畫畫，大顯畫功。而今次喺單車電影節裏面所展出嘅公路單車，就係由一位唔願意透露姓名嘅單車迷提供，佢所收藏嘅單車超過半百，但最有趣嘅係車主係唔會踩單車，只係以收藏為樂，所以話玩單車，邊個話一定要踩㗎？
雖然呢個單車展名為《古董單車展》，但大部分都係意大利名牌 Colnago，只係有 30、 40年歷史，未必稱得上係古董，不過就部部都各有故仔，有啲仲係超高科技添呀！

Spin Carbon Spec.

車架： Spin Carbon
前叉： Spin Carbon
套件： Clavicula THM 2× 10
輪組： Spin Carbon
約價：$260,000

Spin Carbon　科技單車展

好似呢部全碳纖單車咁，今年由美國單車公司 Het Fairwheel Podium所製造，全車除咗條胎，全部都係由碳纖製造而成，就連座位都係專人特製。而且 Spin Carbon呢部車仲係只會收 order製造，唔會量產發售，而車廠仲可以替客人為部車自訂車名。不過唔計運費， Spin Carbon造價差唔多 26萬，擺明係高檔玩意，而且就算有錢買，都要等半年以上先可以到手。呢部車仲標榜全球最輕，成車重量唔到 6磅，罕有得嚟，仲係高科技之作。

呢套 Clavicula THM套件，新買都差唔多要$20,000。

Spin Carbon波手與手掣設計分開，保留一點老爺車風格。

座位連座通一體化設計，減少多餘部件。

Brake用左 ax lightness，淨係訂製都等咗半年。

Colnago Nuovo Mexico　教宗級單車

雖然展覽上嘅古董車唔多，但都有啲大有來頭。好似 Colnago呢部 Nuovo Mexico咁，喺 1973年製造，全球限量 500部，全車布滿 Colnago標誌梅花拉花，車頭仲有人手雕刻嘅梅花圖案。當年創辦人 Colnago都係送呢部單車畀教宗若望保祿二世，幾威！

Colnago Nuovo Mexico以鉻鉬鋼製造，成 40年車齡，保養尚算理想。

手把以真皮包裹，不過已出現唔少裂紋。

焊位刻上 Colnago嘅梅花圖案。

Colnago當年親手將 Colnago Nuovo Mexico轉贈畀教宗若望保祿二世。

Colnago Nuovo Mexico Spec.

車架： Colnago Nuovo Mexico
前叉： Colnago Nuovo Mexico
套件： Campagnolo Super Record 2× 9
輪組： Colnago Nuovo Mexico
約價：$130,000

Colnago Master Time Trial　絕版 Lampre拉花

至於呢部 Colnago Master Time Trial，一睇車身顏色就知係 Lampre嘅專用車。 Lampre係一隊意大利車隊，佢哋首次出現於單車界就係喺 1990年。佢係為咗 1990年嘅歐洲計時賽而造，當年因贊助 Lampre車隊，仲用咗佢哋專享顏色做拉花，深受 Lampre車迷愛載。但可惜呢款拉花嘅 Colnago Master Time Trial並冇對外發售，呢部車都係由隊內友人轉贈，十分貴重。

貫徹 Lampre車隊風格，車身主色以紫藍配搭。

Colnago Master Time Trial手把亦印有 Colnago Logo，非常別致。

Colnago Master Time Trial車身柱位成六角形設計，可增加硬度，設計有助計時賽加速。

Colnago Master Time Trial Spec.

車架： Colnago Master Time Trial
前叉： Colnago Master Time Trial
套件： Campagnolo Super Record 2× 10
輪組： Campagnolo 7075
約價：$180,000

Colnago CT1 Team MAPEI　環法選手度身訂做

而呢部 Colnago CT1 Team MAPEI，就係喺 1997年製造。當時為咗慶祝 Michele Bartoli加盟 MAPEI車隊， Colnago決定特登造嚟畀 Michele Bartoli比賽， 2000年嘅環法 Michele Bartoli都係用佢作賽。當時 Colnago CT1 Team MAPEI全球限量 300部。

Colnago CT1 Team MAPEI車身同樣鉻鉬鋼製造，全球限量 300部。

前叉以碳纖製造，喺當時已屬高階車款。

MAPEI嘅車隊圖案係色彩繽紛嘅立方體，非常搶眼。