Beauty Hunt
贏在終點線上 JW
黎明（ Leon）天王力谷的新靚聲 JW（ Joey Wong），明明 10年已經首現身，仲同衞蘭共享《勁歌》金曲金獎，卻因要返回英國繼續學業，事業退回起點，事隔兩年，終於有新快歌〈 Do Me More〉登場。
06年曾參加「 Spice It Up學園祭」獲得亞軍，當年僅敗於小巨肺 G.E.M.，如今小巨肺已升呢更夠膽批評商台不公，但 JW近乎原地踏步。難得 JW識諗：「我知道終有一日會輪到我，我好期待呢一日。」做歌星最緊要有自信，而且樂壇長途賽，起跑慢，最緊要衝線快過人啫！
JW（ Joey Wong）雖然只得 22歲，年紀輕輕但想法絕對成熟。明明與 G.E.M.同屆參加歌唱比賽，眼見同輩站穩陣腳， JW說：「我唔覺得輸蝕，而且根本冇得比較。因為每個人經歷嘅嘢都唔同，我知道終有一日會輪到我，我好期待呢一日。我識 G.E.M.，不過唔熟，大家都忙，根本冇時間見面，佢近排啲新聞我都唔清楚。其實喺我哋嗰個年代，有好多出咗道嘅歌手都有參加唔同嘅歌唱比賽，好似許廷鏗同糖妹，佢哋𠵱家都有好成績，我唔會羨慕，但我會戥佢哋開心。」
JW新歌〈 Do Me More〉，雖然同日本歌姬安室奈美惠首歌一樣名，不過作曲係黎明愛將雷頌德、 MV更由黎明執導，完全係老黎 style。
Profile
JW（ Joey Wong）
年齡： 22
學歷：倫敦 King’ s College地理系學士
最愛本地歌手：方大同
最愛外國歌手： Rihanna
今年目標：挑戰廣東話 R&B
唔明黎明講乜
對於老闆 Leon的教導及照顧， JW當然感激，但原來 JW並不覺得 Leon似老闆。「佢似哥哥多啲，佢（ Leon）都當我係妹，我哋傾偈可以傾到好似 friend咁。其實個個都話佢好多金句，但我又唔覺喎，我記得佢講過，話自己啲金句如果用國語講，根本唔難明，係香港人聽唔明喎！佢會講故事咁同我哋講道理，不過唔知係唔係我中文差，所以成日唔明佢講咩！」嚟緊 JW仲會返大陸做宣傳，實行北望神州拼事業！
JW父親跟黎明是世交， JW入行自然要搵天王照顧。 10年出道， JW同衞蘭合唱一首〈男人信甚麼〉 hit到拿了《勁歌總選》金曲金獎，但可惜事隔兩年現在又要重新起步。 
採訪、撰文：張佩姍
攝影：葉曉明
髮型、化妝： MT Make Up
形象： Bryan@the Flaming
服裝： another
場地： STUDIO CITY
留言列表
{{ article.title }}
