面對面
呆佬擺酒 劉以達
劉以達與妻子冼美珍結婚 15年後，才一圓擺酒夢，將於下月 27日廣邀圈內外朋友同樂一晚，順手慶祝埋劉以達新碟面世兼當天 50歲生日正日。
一換上借來的中式裙褂，玩得的劉氏伉儷自動波擠眉弄眼擺起甫士，達哥笑說：「我咁樣着會唔會好似阿旺？」我答道：「唔係似，係直情係！」
訴說最窮的日子
本來是披頭散髮、迷幻前衞的音樂先驅，多得 96年周星馳獨具慧眼，請他為電影《大內密探零零發》做電影配樂兼扮女人，一身人妖行頭，一句幽怨「大~~夫~~」，劉以達從此以後開多一瓣搞笑財路，再也正經不回來。
眼神或許有些游離，說話亦總是一，在影樓玩到褲都甩明顯冇底線，不過說起音樂老本行，劉以達的韌力絕不會比舊拍檔黃耀明少。 91年達明拆夥後，一直沒停過自資夾 band出唱片的劉以達，擺酒日推出的新碟又是自費十多萬，明知蝕硬：「明哥都係我當年登報紙搵返嚟之嘛……我以前乜都冇嗰陣，都係自己闖㗎啦，𠵱家仲有老婆陪我一齊闖添，闖得開心！」
全世界都笑他太瘋癲，達嫂冼美珍卻說，劉以達在她眼裏，還是 23年前認識的那個文藝青年。這就是老婆仔對阿旺的意義，懂不懂？
Canton愛情故事
劉以達都幾好笑，一方面很坦白，說八十年代一星期落幾晚 D、一晚走幾場，無非為咗溝女；另一方面，死口唔認 89年在 Canton Disco問當年 18歲的達嫂攞電話是想溝人：「我係為我本漫畫做資料搜集！」
資料搜集？劉以達除了音樂，亦愛繪畫，堅稱當年自己想自資出漫畫書，漫畫內容有關宗教，夜麻麻在 Disco埋少女身，開場白你估佢唔到：「我問佢信咩宗教，喺邊度拜神咁囉……」口說不是自己杯茶，又約睇戲又上契，還約人深夜去《天若有情》個教堂門口傾心事，劉以達當年另有女友，達嫂話，正式展開追求攻勢真的是八年以後：「 91年我去澳洲讀書，同佢斷咗聯絡。返嚟以後，佢話我打扮似 TB，戴眼鏡、歷蘇頭又亂着衫，我聽佢話除咗眼鏡、扯番直啲頭髮，佢至對我刮目相看，有一日打畀我吞吞吐吐，扯完一口大氣問我：『我可唔可以追你？』我回佢四個字：『放馬過嚟！』」
一句放馬過嚟，眨眼十五年，兩公婆繼續享受二人世界，在所有人眼裏滑稽騎呢又迷迷哋的達叔，達嫂眼裏還是 23年前夜店裏的文藝青年：「你唔好以為佢冇脾氣，我俾人話時，佢試過好大聲咁鬧走人幫我出頭，我一路掃佢背叫佢冷靜，個心其實不知幾甜；追我嗰陣，佢試過覺得襯我唔起，喊到流晒眼淚，做女人求咩呢？就係求俾人覺得如珠如寶個感覺啫；就算係最困難嘅時候，我都唔會怪佢：人做娛樂圈你做娛樂圈，點解做到要借錢交租，但係佢會咁諗，我同佢講，無人無經歷過呢個位，我真係唔介意㗎老公……婚姻就係咁㗎啦，唔通好境就同你一齊，困境就走先咩？呢啲唔係婚姻，係搵笨！」
98年結婚時，劉以達忙拍電視劇無暇擺酒，相隔 15年，終於還餐酒畀老婆，順手慶祝自己 50歲牛一。
劉以達除了玩音樂、搞笑耍家，其實亦寫得一手好字、畫得一手好畫，儲埋不少畫作，願望是年底開畫展。
耶穌打救有方
90年代達明一派紅到裂， 96年兼職做笑匠、電影電視劇接不停，搞到無期擺酒還捱到一身病，兩公婆最困難是 06至 08年間，冇碟出、冇騷做，電影工業北移客串角色買少見少，達嫂亦一早辭工幫丈夫手，二人窮到要借錢交大埔村屋屋租，食物亦要靠教友接濟，劉以達還是說：「我哋信嘅呢個上帝爸爸，畀咗我音樂同繪畫嘅天分，又令到我行吓坐吓，自己都唔記得做過啲乜，又可以惹人笑喎，呢個上帝爸爸真係好得㗎！做人起起伏伏有乜所謂，最緊要𠵱家有個人陪我一齊闖吖嘛！我以前一個人闖都係咁啦！」
新歌〈烏托邦〉 MV，劉以達結他、 Bass、打鼓、主唱，一個人玩晒， 80年代他的音樂路，也確實是從一個人開始：「我唔鍾意讀書，係鍾意音樂同畫畫。成日逃學練結他，後尾去咗讀嗰啲有錢就讀得嘅中學，旺角，大同中學（已結校）。我阿爸喺的士公司返工，屋企住彩虹邨，哥哥又係書蟲，邊有錢邊有人支持我玩音樂？為咗搵錢買樂器，我咪走去應徵畫師，畫嗰啲東方之珠行貨囉！」
所謂「東方之珠」行貨，即是尖沙咀遊客區那些至今仍有擺賣的香港夜景水彩畫，劉以達沒學過畫畫，卻有天分，別人要學一兩年的功夫，他用兩三個月就學滿師，一個人一整天啤十幅一樣樣的「東方之珠」，每幅賺五十，畫了兩年，賺夠兩支結他、一部電子琴、擴音器、一套鼓，就離職登報請人夾 band。千挑萬選，飛走來見工的蔡一傑、蔡一智兩兄弟，請了黃耀明，組成達明。
「我搵到錢，不過剩唔到錢，我興趣多！」劉以達喜歡砌模型、儲玩具、迷蝙蝠俠，早前才用萬多元在網上買來復刻版蝙蝠俠制服，當然還有最貴的興趣，音樂：「我唔鍾意聽大唱片公司話，自資出唱片明知係蝕，都一定要做。所以要祈禱祈禱祈禱，叫上帝畀我多啲錢我哋，喺呢個樂壇起革命就好啦！」
劉以達說自己年輕時絕不搞笑：「我頭髮長到膊頭，又唔出聲，試過小息畫畫俾同學撩，我一張凳車埋去，從此再無人敢搞我。」
搞笑以前，劉以達在電影配樂界分量十足， 93年更憑電影《誘僧》獲得金馬獎最佳電影配樂。《蘋果日報》圖片
96年為《大內密探零零發》配樂被周星馳發掘客串一角：「我個女人妝要化三個鐘，劉嘉玲話我個女人妝仲靚過佢！」
入行 32年，手頭上還是冇乜幾個錢，出入巴士、租住村屋，話要祈禱，問上帝要多些錢，也不是為了買樓，是想在樂壇搞革命：「出面好多細路，唔知我係夾 band出身。我都想佢 哋聽 咗我啲歌，會嘩一聲『有料到喎！』雖然唔係話好順利，上帝嘅安排又好奇妙，逆境 咗一兩年，又好順利咁搞番音樂。其實都好開心，領略到另外一樣嘢，我同明哥，不和過、拗撬過，一齊番，默契就返晒嚟，我哋係不同世界嘅人，音樂就將我哋擺埋一齊。」
神愛罪人同志
曾因音樂路向不同拆夥，去年再合體，一個是虔誠基督徒、另一個則在演唱會上出櫃，的確是不同世界的人。對於老拍檔的性取向，劉以達說：「好多喺聖經上面記載嘅文字，好多 find out都唔係神話，係講耶穌。第二次世紀大戰，唔係香港，好多探險家都去搵呢樣嘢……」搵乜？達嫂在一旁補充是挪亞方舟。達哥繼續：「信耶穌呢，當耶穌未誕生前，我哋叫拜神，個關係好疏離，個神係咩就咩，好驚佢，當耶穌嚟咗，我哋點解叫佢救世主，唔係重建，適當時降世，係個精神，其實我覺得呢……」愈講愈遠，達嫂又忍唔住：「不如我幫你講啦！」劉以達喝住阿嫂：「你唔好講住，上帝差派佢嘅兒子，唔知點樣整出嚟，整整整，就變咗我哋講嘅聖靈，佢做完就返去上帝身邊坐喺度……」「人 哋問你同性戀呀！」「就到啦，就到啦……兩、兩、兩……兩分鐘……（上帝）創世做咗兩個人，亞當同夏娃，開始犯罪。人係有罪性……我唔鍾意呢個人，我就攞把刀，捅落佢個心口，諗咋喎，都犯咗罪。」甩甩 cut cut，最終用了十多分鐘，劉以達其實是想說聖經裏「你覺得自己沒有罪，就向妓女砸石頭吧」的故事：「除咗耶穌同神，每個人都有罪。聖經唔主張男男，明哥係犯 咗罪，但係邊個冇犯罪呢？神愛世人，神呢，其實呢，都好愛同志。」 
85年登報紙搵拍檔搵到黃耀明合組達明一派， 91年兩人因為音樂路線不相同拆夥收場。
拆夥十多年來達明不時合體開唱，去年黃耀明更在達明演唱會上出櫃，劉以達說：「明哥有罪。」
89年相識， 97年相戀，達哥達嫂 98年在中環註冊結婚時，俞琤亦有道賀。
淚中有笑
做了 32年音樂，達明的光環大部分落在明哥身上，自己身邊又冇乜幾個錢，劉以達說，還是很內疚，始終沒能力置個「自己地方」送給老婆：「 掹 掹緊㗎，不過我做 咗咁多年都係呢個模式，都係地下，圖個快活囉！」
一邊說，達嫂站在一旁點頭：「做隻碟，唔計自己人工，碌盡人情咭，都要十幾萬。係蝕㗎，都會畀佢做，惟有同佢講，老公，我 哋要睇 餸食飯囉！」
冷面笑匠亦有笑不出的日子，雖然不容易，不過兩個人一齊捱，淚中帶笑。 
留言列表
{{ article.title }}
