電影版陳浩南之後，重戲嘅有山雞、包皮等，但 game入面佢哋只係大配角，反而太子同大飛係更重要角色。

漫遊毒物

Android古惑仔 3G勾結陳浩南

2013年01月16日 ~~ 第295期 Face

元旦撐梁遊行爆出古惑臨記醜聞，仲有人即場大叫「 CY勾結新 X安」，連牛佬都專登喺《古惑仔》加入抽爆 CY水嘅情節；撞啱相隔 16年，王晶開拍嘅《古惑仔：江湖新秩序》，又啱啱上埋畫，呢期古惑仔威番晒！有漫畫有戲就唔少得有 game，《古惑仔》真係食住呢個勢推出第 3代 online game，今鋪仲首次踩入 Android平台，用 app就玩到，唔使成日捕實喺電腦前，出街都可以「行古惑」！

遊戲類型：經營社團動作遊戲
開發公司： Gameone
支援平台： Android（ iOS版即將推出）
售價：免費
官網： http://tb3g.gameone.com

操作簡化　少動作

雖然隻 game叫「 3G」，但唔理係 3G、 4G定 WiFi，只要連到線上 server就玩得，不過暫時佢只支援 Android， iOS同 web版要遲啲先推出。用手機玩，操控點都冇電腦 keyboard加 mouse咁就手，所以佢嘅玩法比一般 online game簡化，除咗開戰嗰時有動作外，其他嘢都係用文字交代，冇得好似一般 MMORPG咁走嚟走去，反而似玩以前 facebook隻《義氣仔女 Online》。

同普通 MMORPG一樣要成日𥄫實個管理版面，記住啲𡃁有幾勁，同埋多唔多道具，咁先知道搶咩地盤有勝算。

一開波得陳浩南同細細粒跟你，但勁人啲地盤隨時有 10幾人看守，所以收𡃁好重要。好彩啲𡃁見你有「騾」就會跟你，唔使派錢㗎！

爭地盤嘅地圖，竟然係港鐵路線圖，仲要冇東西鐵線，唔通新界冇古惑仔？

手動自動我話事

開戰若選擇手動，就先要篤人頭（紅圈）揀操控邊個，然後篤對方個人走埋去，再篤旁邊啲出招 icon，就可以攻擊人。

隻 game一開波，已經話你係洪興區域揸 fit人，連陳浩南都係你馬仔，遇着龍頭蔣天生話重組緊十二坐館，你嘅目標就係要帶領社團做出成績，登上坐館個位。咁要點做呢？都係離唔開收多啲𡃁，然後去開戰，同其他社團爭地盤。
打鬥過程最特別係有得揀手動或自動戰爭，平日返緊工、淨係想升呢時，可以揀自動 mode，由得電腦操控打到完為止；到自己得閒時，就可以玩番手動，憑技術挑戰人強馬壯過你嘅玩家。驚自己實力唔夠咩？仲可以用「劈友系統」，請電腦幫你搵個 lv.差唔多嘅對手嚟同你打，藉此練功升呢。當然仲可以「吹雞」，搵朋友一齊晒馬去圍攻高幾班嘅對手。

大天二都玩！

接替謝天華做新版大天二嘅何浩文，本來都係 online game迷，不過佢話𠵱家冇乜時間喺屋企打機，只得閒玩手機 game，所以話都想玩吓呢隻《古惑仔 3G》。「打機就一定想拳拳到肉，但𠵱家多數係等埋位時拎部機㩒幾下，可能未打完一場又要放低部機，所以電腦自動幫我打埋仲啱我。」

古惑江湖 20年

眾所周知，《古惑仔》係牛佬（原名文啟明）喺 92年成立漫畫公司「浩一」嘅開山作，至今出版超過 20年，由周刊出到 3日刊，截至上星期，已經出到第 1,573期，係全港連載期數最多嘅漫畫（《龍虎門》有分新、舊著，單一計唔夠《古惑仔》多）。 20年嚟，《古惑仔》除咗正傳外，仲衍生出無數外傳漫畫、電影同 game，地位就好似江湖漫畫嘅金庸小說，其他同類作品一定走唔甩受佢影響。

陳浩南其實係劉華！

原來根據原著人設，陳浩南今年已經 44歲，唔好以為仲係羅仲謙嗰隻花𡃁！連牛佬都講過南哥做到銅鑼灣揸 fit人時已經成 29歲，同伊健當年嘅年紀幾接近。不過，陳浩南嘅原型其實係緣自劉華，好多封面都係照住劉華嚟畫，但後面又會突然變番普通樣，好似 IQ博士咁。

90年代初期
江湖書最興照住明星相嚟畫封面， 90年代初劉華梗係首選，有時連內文大頭都會忽然似埋劉華。

90年代後期
直到舊電影版出現後，漫畫南哥先至變咗伊健，《古惑仔》出台灣版，同埋浩一再出版姊妹作《洪興仔》時，都喪畫伊健做封面。

千禧年代
去到近年，港漫已唔再興畫明星封面，浩男哥可以長期用番漫畫面相真樣見人，更唔怕變脂粉味羅仲謙，好彩！

來懷念過去...

《古惑仔》有 20年歷史，唔只見證住香港黑社會嘅轉變，仲經歷咗港漫由盛轉衰、古惑電影熱潮平靜完再起嘅年代，就連 online game嘅演化，佢都扮演住重要角色，真係大家嘅一個集體回憶，可以靠佢「來忘掉錯對，來懷念過去。」

從暴力色情到政治

早年《古惑仔》漫畫真係極盡暴力同色情之能事，勁多劈友劈到斷手斷腳同搞嘢場面，但唔少 fans覺得近年收斂咗，更加入唔少政治諷刺，內容格調提升咗，連南哥都退出咗江湖做正行生意，唔怪得佢嘅巨型人像可以進駐漫畫星光大道作參展。

真實
最近《古惑仔》有期講東英大佬請咗個擅長講大話嘅智囊叫「 CY唐振英」，仲教大佬點講大話隱瞞僭建，寸到咁白，梗係喺 fb洗板咁瘋傳。

牛佬自從幫《爽報》畫過《至「喪」檔案》啲重政治意味漫畫後，就俾網友視為民主先鋒，見最近 CY啲語言偽術咁「古惑」，同埋古惑仔喺廁所派錢畀遊行臨記，梗係搵《古惑仔》嚟惡搞啦！